Padang – Ampiang saparo jawi jo kambiang Sumbar ko datang dari lua provinsi dek karano awak lun talok mancukuiki kebutuhan surang. Mako iko adolah perluang untuk sektor taranak.
“Ampek puluah persen kebutuhan dagiang jawi jo kambiang taranaknyo barasa dari luyar provinsi,” kato Gubernur Mahyeldi kutiko bapidato di alek ulang tun nan ka 70 Universitas Andalas, patang ko.
Mako Gubernur maajak Unan tarutamo Fakultas Peternakan untuk sato mandorong supayo produksi jawi jo kambiang di Sumatera Barat ko bisa maksimal, sahinggio dapek mancukuikan kebutuhan masyarakat dan indak paralu lai mandatangkan jawi jo kambiang dari lua.
“Bialah jawi jo kambiang awak sajo nan awak manfaatkan nanti kalau jumlah produksi bisa maningkek dari nan ado kini,” kato Nyiak Datuak Marajo ko.
Mahyeldi baharok bana melalui Fakultas Peternakan Universitas Andalas handaknyo dapek dicarikan jalan kalua supayo tingkek produksi peternakan masyarakat lokal ko makin maningkek. Gubernur mambukak salaweh-lawehnyo peluang untuak bakarajosamo antaro Unand atau Faterna jo Pemprov Sumbar.
Kecek Gubernur nan acok disapo Buya ko, penguatan produksi dagiang jawi jo kambiang dapek mandukuang peningkatan hasia sektor peternakan di Sumatera Barat. Kondisi ko (produksi nan maningkek) juo dapek meningkekkan kesejahteraan masyarakat.
“Kito mahaROKKAN, Fakultas Peternakan khususnyo Universitas Andalas bisa maadaaan karajo samo untuak manjawek permasalahan-permasalahan ko,” kecek Mahyeldi.
Gubernur juo baharok Sumatera Barat bisa maningkekan produksi pertanian, peternakan, jo perikanan sacaro bakalanjutan. “Dengan takah tu, ndak paralu wak tagantuang bana jo produksi provinsi lain, sebab awak bisa mamamanuhi kebutuhan wak surang,” katonyo. (Tan Parpatiah)
