Sawahlunto — Lembaga Kerapatan Adat Alam Minangkabau (LKAAM) indaklah cukuik kalau hanyo manjadi palindung adat jo tradisi. Di tangah parubahan zaman nan makin capek, lembaga adat dituntut pulo hadir mandampingi anak kamanakan, tarutamo generasi mudo nan kini tumbuah dalam dunia nan sarato dek teknologi, gawai, jo media sosial.
Dek karano itu, LKAAM diharapkan dapek mambangun karajo samo nan labiah rapek jo pamarentah, indak hanyo dalam urusan adat, tetapi juo dalam palayanan kapado masyarakat, pembangunan sosial, jo pamajuan kabudayaan.
Hal itu disampaikan Wali Kota Sawahlunto, Riyanda Putra, katiko mambari sambutan pado acara pangukuhan Pangurus LKAAM Kota Sawahlunto maso bakti 2026–2031, nan dilaksanakan Kamih (17/9/2026).
Manuruik Riyanda, tantangan nan dihadapi lembaga adat kini alah jauh babedo dibandiangkan jo maso dahulu. Anak kamanakan tumbuah dalam suasana nan serba capek barubah. Informasi datang baruntun dari HP, media sosial, jo baragam ruang digital nan indak mengenal bateh.
“LKAAM punyo paranan nan penting dalam mandampingi anak kamanakan manghadapi baragam parubahan dek globalisasi jo kamajuan teknologi informasi. Parubahan iko paralu kito sikapi jo bijaksano, supayo generasi mudo dapek mamanfaatkan teknologi untuak hal-hal nan positif, sakaligus mamahami risiko nan dibawonyo,” ujar Riyanda.
Dek demikian, nilai adat jo nilai sosial budaya, manuruiknyo, paralu taruih dipakuaik. Nilai-nilai nan alah diwariskan dek niniak mamak dari zaman ka zaman jan sampai hanyo tingga dalam carito atau upacara adat.
Adat jan hanyo diwariskan, tetapi harus pulo dirasokan manfaatnyo dalam kahidupan anak kamanakan. “Nilai adat indak cukuik hanyo diturunkan dari satu generasi ka generasi nan lain. Nilai-nilai itu harus pulo hadir dalam persoalan nan dihadapi anak kamanakan saban hari,” kato Riyanda.
Kantua Baru
Pamarentah Kota Sawahlunto manyatokan komitmennyo untuak taruih basinergi jo LKAAM. Salah satu wujud dukungan nan disampaikan Riyanda adolah pembangunan Kantua Sekretariat LKAAM Sawahlunto pado tahun 2026.
Kantua baru tu diharapkan indak hanyo manjadi alamat resmi lembaga. Labiah dari itu, kantua tu handaklah manjadi tampek batamu, barundiang, manyusun program, jo mempatageh garak LKAAM di tangah masyarakat.
Di sinanlah ninik mamak, alim ulama, cadiak pandai, bundo kanduang, generasi mudo, jo unsur masyarakat lain dapek basuo jo barundiang untuak mancari jalan kalua dari baragam persoalan nan dihadapi anak kamanakan.
Dek karano itu, tantangan pangurusan LKAAM nan baru bukanlah ringan. Lembaga iko dituntut supayo labiah dakek jo masyarakat jo labiah peka manangkok persoalan nan tajadi di tangah anak kamanakan.
Tarutamo pado maso kini, ketika generasi mudo labiah banyak manghabiskan waktu untuak barinteraksi di ruang digital.
Adat Harus Tatap Hiduik
Pangukuhan Pangurus LKAAM Sawahlunto maso bakti 2026–2031, dek karano itu, indaklah sakadar acara mangganti pangurusan lamo jo pangurusan baru.
Kepado Dahler Datuak Panghulu Sati nan dipercayokan manjadi Ketua LKAAM Sawahlunto maso bakti 2026–2031, basamo saluruah jajaran pangurus nan baru, Riyanda barharap amanah tu dapek dijalankan jo sabaik-baiknyo.
LKAAM diharapkan dapek mamparkuat paranan sesuai jo kebutuhan masyarakat, indak hanya manjadi lembaga nan basuaro dalam urusan adat, tetapi juo manjadi tampek batanyo jo bapijak bagi anak kamanakan dalam manghadapi parubahan zaman.
Maso bakti 2026–2031 manjadi kasempatan bagi pangurusan baru untuak manjawab tantangan tu. Adat harus tatap hiduik, tetapi caro manyampaian jo manjalankannyo paralu pulo manyasuaiakan diri jo zaman.
Pangurus LKAAM Kota Sawahlunto maso bakti 2026–2031 dikukuhkan pado Kamih (17/9/2026). Dahler Datuak Panghulu Sati dipercayokan untuak manjadi pimpinan lembaga adat tu. Pangukuhan dilakukan Ketua LKAAM Sumatera Barat, H. Fauzi Bahar Datuak Nan Sati, melalui prosesi pati ambalau. (Tan Parpatiah)
