Manyabuik istilah meneer jo inlander, Mak Uniang galak tasanyum. Sabab kecek Mak Uniang, dek urang awak sajak saisuak, si Ulando tu cuma kajadi olok-olok sajo.
Ulando masuak ka Minangkabau ko, satangah manyasa. Rugi gadang si Ulando tu.
Kalau dibandiang apo nan dipabuek Ulando jo pajak nan nyo dapek di Ranah Minang ko, jaleh ndak saimbang.
“Tekor Ulando di Minang ko,” kecek Mak Uniang di surau belok, sudah sumbayang Mugarik, ka anak-anak nan mangaji.
Bara tu biaya mambuek jalan keretapi dari Padang ka Sijunjuang, ka Bukiktenggi sampai ka Payokumbuah, kecek Mak Uniang. Alun lai mambuek tambang batubaro jo simin padang, tambah Mak Uniang pulo.
Samantaro, uleh Mak Uniang, urang awak ko mambayia pajak basigalia. Payah Ulando mamintak. Banyak kilahnyo. Alasannyo, padi dek mancik, biruang banyak, pataunan malapeh. Macam-macam alasanlah pokoknyo. Kok kalayi pitih kalua, tambah Mak Uniang, cuma takalo inyo namuah mambayia zakat. Tapi zakat tu, diagiahan ka sanak sudaro sajo. Ka mamak, ka kakak, ka adiak, malah ka apak rang rumahnyo bagai bazakat.
Ado curito lawak. Sakali wakatu, curito Mak Uniang, datanglah Gubernur Jenderal Ulando nan jadi pucuak pimpinan di Sumatera Tangah.
Tibo di Sangka dicaliaknyo urang mananti tagak-tagak pinggang sajo. Takah ndak ado hormatnyo ka Meneer tu. Ado lo surang dari nan manunggu tu, batanyo ka ajudan si Meneer ko, nan juwo urang awak.
“Sia ko Ndan?” tanyo saurang masyarakat nan tagak pinggang tadi.
“Gubernur wak mah. Inyo baru pindah dari subarang.”
Mancaliak ado nan batanyo jo baso Minang. Meneer tadi batanyo lo ka ajudan. “Aphaa katanya?”
“Dia bertanya Tuan. Tuan siapa katanya,” jawek ajudan.
“Teghuss kahmu bilangh apha?”
“Saya katakan, kalau Tuan seorang Gubernur Jenderal, berpangkat tinggi. Baru pindah ke sini jadi pucuk pimpinan.”
“Bhaghuzz. Bhaghuzzz,” kecek Meneer.
Sudah tu urang awak tadi batanyo lo liak. “Lai ado mbawo rokok paja ko ndan?” keceknyo ka ajudan sambia manunjuak Meneer jo muncuang.
Mancaliak nan batanyo tadi mangecek baliak, si Meneer batanyo lo ka ajudan, “Apha khatanya?”
“Dia nanya, apakah Tuan ada membawa rokok.”
“Oww, tenthu adha. Ini adha,” kecek Meneer sambia mambiak rokok dalam saku baju jasnyo.
Sudah tu Meneer langsuang maagiah ka urang awak tadi. Sudah rokok ditarimo. Nan urang awak ko, langsuang lo mauluaan, rokok di muncuangnyo ka Meneer, mintak toloang bakaan sakali jo korek api.
Sambia manggeleang-geleang, Meneer tapaso mambakaan rokok urang awak tadi. Takah inyo mambakaan rokok untuak induak samangnyo.
Kudian dari ajudan dapek kaba. Baso si Meneer salut jo urang awak ko.
Katonyo, salamo mamarintah sakali ko nan tajadi takah ko. Samaso baliau jadi residen di subarang, takalo turun ka kampuang-kampuang, rakyat basusun basimpuah laki-laki padusi di sapanjang jalan.
Tibo di Minangkabau, lah naiak pangkek, jadi Gubernur Jendral, ndak ado urang basimpuah di tapi jalan manantinyo. Induak-induak nan manyambuik kadatangannyo, takah di subarang basalimuik kain panjang satangah badan, ndak sobok di Minangkabau.
Ado bana surang baduo, tapi inyo batangkuluak tanduak, duduak di tampek nan tinggi. Amak-amak ko bawibawa mancaliak Meneer dari pintu ketek rumah gadang. Samantaro nan apak-apak asiak tagak-tagak pinggang, sambia galak mancimeeh lagak gaya si Meneer di kadai-kadai. Kok ado bana nan di tapi jalan, inyo bajalan takah cupak anyuk. Ijan ka marukuak mintak paramisi lalu, manyapo sajo takah kawan samo gadang, maimbau sambia manggarik mato ka Meneer tu.
“Oghang negeri kamhu ini, seperti raja-raja semuwa ya?” kecek Meneer ka ajudan sambia baliak ka Padang.
“Ya, Tuan. Tadi itu benar raja-raja semua yang menyambut kedatangan Tuan,” jawek ajudan santai.
“Baitu santiangnyo urang awak ko sajak dulu. Lai jaleh dek kalian?”
Ijan sampai kalian isuak murah sajo dialua dek urang lain,” pasan Mak Uniang ka Malanca jo kawan-kawan, sangkek mangaji di surau maso dulu.
