Pariaman — Piaman ndak pernah langang, batabuik mako batambah rami, Kota Pariaman kini mulai dipanuahi dek urang rantau, wisatawan, jo masyarakat nan datang dari babagai daerah untuak manyaksikan Pesona Budaya Hoyak Tabuik Piaman 2026, salah satu alek budaya gadang nan paling ditunggu-tunggu di Ranah Minang. Puncak acara pado 27 jo 28 Juni 2026 dipakiroan manjadi pusek perhatian ribuan pangunjuang dari dalam maupun lua Sumatera Barat.
Untuak meriahnyo alek Tabuik, PT Kereta Api Indonesia (Persero) Divisi Regional II Sumatera Barat manyadiokan sabanyak 8.480 tiket KA Pariaman Ekspres untuak malayani mobilitas masyarakat nan ka pai ka Pariaman.
Kepalo Humas KAI Divre II Sumbar, Reza Shahab, mangatokan bahwa kareta api kini manjadi pilihan utamo masyarakat karano praktis, nyaman, dan murah untuak manuju Pariaman.
“Untuak mandukuang mobilitas masyarakat pado puncak Festival Tabuik, kami manyadiakan 8.480 tampek duduak salamo duo hari palaksanaan,” katonyo, Salasa (23/6/2026).
Sampai tanggal 23 Juni 2026 pukua 12.00 WIB, sabanyak 3.825 tiket alah laku atau sakitar 45 persen dari kapasitas nan disadiokan. Angko ko dipakirokan masih akan taruih mananjak sasuai jo makin dakeknya jadwal puncak perayaan Tabuik.
KAI pun maimbau masyarakat untuak sabalunnyo mamasan tiket supayo ndak kahabisan tampek dan dapek manikmati alek budaya tahunan itu dengan nyaman.
Bagi masyarakat Sumatera Barat, Tabuik bukan sajo tontonan, tapi juo warisan budaya nan sarat makna sajarah jo nilai adat. Tradisi nan diadokan satiok 1 sampai 10 Muharram ko punyo rangkaian prosesi nan panjang, mulai dari pembuatan tabuik, maarak panja, maatam, hoyak tabuik, sampai pado prosesi puncak mambuang tabuik ka lauik, nan salalu manjadi magnet utama bagi ratusan ribu pangunjuang.
Raffi Ahmad sato lo maajak rami-rami ka Piaman mancaliak Tabuik
Salah satu prosesi nan alah berlangsung mariah adolah Maarak Jari-Jari pado malam Sinayan (22/6/2026). Dalam prosesi ko, Panja diarak dek duo kelompok, Tabuik Pasa jo Tabuik Subarang, manguliliangi kampuang jo iringan gandang tasa nan manggugah sumangaik masyarakat. Arak-arakan dari duo kubu itu batamu di Simpang Tugu Tabuik, disambuik sorak-sorai warga nan tumpah ruah ka jalan.
Sekretaris Daerah Kota Pariaman, Afrizal Azhar, mangatokan bahwa rangkaian acara Tabuik marupokan bagian penting dari upaya pamarintah daerah dalam mambangkikkan sektor pariwisata jo ekonomi masyarakat.
“Hari ko kito manyaksikan prosesi Maarak Jari-Jari nan marupokan bagian dari tradisi Kota Pariaman nan salalu dilaksanakan satiok tahun. Kegiatan ko juo manjadi upayo mandukuang visi misi daerah dalam mangambangkan pariwisata,” ujarnya.
Afrizal manambahkan, puncak Pesona Budaya Hoyak Tabuik Piaman 2026 pado 28 Juni nanti akan dihadiri dek Wakil Menteri Kabudayaan RI Giring Ganesha, disamping sajumlah pajabat pamarintah pusat, provinsi, jo kabupaten/kota tatangga.
Samentaro itu, gaung Tabuik tahun ko juo sampai ka tingkat nasional. Utusan Khusus Presiden Bidang Pembinaan Generasi Mudo jo Pekerja Seni, Raffi Ahmad, malalui video khusus manyarukan saluruah rakyat Indonesia untuak datang jo manyaksikan mariahnya Pesona Budaya Tabuik Piaman 2026.
Menurut Kapalo Dinas Pariwisata jo Kabudayaan Kota Pariaman, Ferialdi, ajakan dari Raffi Ahmad manunjukkan bahwa Tabuik kini makin diakui sabagai salah satu event budaya nasional. Apolagi tahun ko Tabuik baliak masuak ka dalam Kharisma Event Nusantara 2026 (KEN), nan marangkum 110 acara wisata jo budaya tarbaik di Indonesia.
Tabuik memang punyo daya tarik nan luar biasa. Selain prosesi adat nan unik, pangunjuang juo disuguhi pamentasan seni budaya Minangkabau, silek tradisional, gandang tasa, pasar rakyat, sampai kuliner khas Piaman nan manggoda salero. Tan Parpatiah)
