Nan Bapasan: BUYA H. MAS’OED ABIDIN
Satiok pagi nan datang, adolah karunia Allah Subhanahu wa Ta’ala nan patuik kito syukuri. Cahayo matahari nan manyingsiang dari timur, angin nan basiru lambuik, jo danyuik kahidupan nan ka dimulai, samonyo mangingekkan kito bahaso umua nan dipinjamkan Allah masih ditambah lai.
Dek karano itu, alangkah eloknyo awak mangawali pagi jo doa, mangadu nasib ka hadapan Allah, mamohonkan palinduangan, ilmu nan bamanfaat, rezki nan halal jo amalan nan ditarimo.
Rasulullah SAW mangajarkan kito untuak mambaco:
“Bismillahilladzi laa yadhurru ma’asmihi syai-un fil ardhi wa laa fis samaa’ wa huwas samii’ul ‘aliim.”
Artinyo, jo manyabuik nama Allah, indak ado sasuatupun di bumi jo di langik nan dapek mamudharatkan, karano Allah Maha Mandanga lagi Maha Mangatahui.
Sasudah itu, kito dianjurkan pulo mambaco:
“Allahumma inni as aluka ‘ilman naafi’an, wa rizqan thayyiban, wa ‘amalan mutaqabbalan.”
Ya Allah, ambo mamohon ilmu nan bamanfaat, rezki nan baiak, jo amalan nan Engkau tarimo.
Doa-doa iko bukan sakadar rangkaian kato, tapi panguat hati untuak mangarungi hari jo penuh barokah.
Makna Hijrah Nan Sabananyo
Banyak urang mamaknai hijrah sabagai perpindahan tempat sajo sabagaimano Nabi Muhammad SAW jo kaum Muhajirin pindah dari Makkah ka Madinah.
Namun dalam kahidupan kini, hijrah juo bisa dimaknai sabagai parubahan diri dari nan kurang baik manjadi labiah baik.
Ado tigo hal nan paralu diingek tantang hijrah.
Partamo, kaputusan nan baik lahia dari kasadaran hati akan nilai-nilai kabaikan. Sasaurang nan sadar jo kasalahan dirinyo akan taragak untuak barubah.
Kaduo, hijrah baarti basadio manjalani parubahan ka arah nan labiah samparono sasuai jo sunnah Rasulullah SAW.
Katigo, hijrah baarti basadio mancapai kaadaan nan labiah baiak dari sabalunnyo, baiak dalam ibadah, akhlak, maupun muamalah jo sasamo manusia.
Hijrah nan dilakuan jo ikhlas karano Allah indak akan sio-sio doh. Rasulullah SAW basabda bahaso barangsiapo maninggakan sasuatunyo karano Allah, maka Allah akan manggantikan jo nan labiah baiak.
Janji Allah iko adolah panguat bagi urang nan ingin barubah walaupun langkahnyo masih singek-singkej.
Lalu, baa caro mamulai hijrah diri?
Salah satu jalan nan mudah namun gadang manfaatnyo adolah mambiasokan diri jo dzikir.
Dalam kaheningan dzikir, hati nan gundah manjadi tanang. Pikiran nan kusuik manjadi janiah. Jiwa nan galisah mandapek cahayo pituah.
Waktu luang nan ado jaan dibiakan lalu baitu sajo. Isilah jo manyabuik nama Allah. Kutiko bajalan, bakarajo, manyupir kandaraan, manunggu antrian, bahkan kutiko baristirahat, lidah kito masih bisa basah jo dzikir.
Dzikir pendek nan mudah dibaco antaro lain:
Subhanallah
Masya Allah
Alhamdulillah
Laa ilaaha illallah
Allahu Akbar
Laa haula wa laa quwwata illa billahil ‘aliyyil ‘azhim
Kalimat-kalimat iko ringan di lidah, namun barek timbangannyo di sisi Allah.
Salain tu, biasokan pulo mambaco dzikir sasudah shalat fardhu. Mambaco istighfar, tasbih, tahmid, takbir jo tahlil marupakan amalan nan sangat dianjurkan.
Begitu juo dzikir pagi jo patang. Dzikir pagi dibaco sajak sasudah Subuah sampai matoari tabik, sadangkan dzikir patang dimulai sasudah Ashar sampai matoari tabanam.
Hijrah diri indak akan samparono tanpa mambanyak shalawat ka Rasulullah SAW. Satiok kali awak barshalawat, Allah akan mambarikan sapuluah kali rahmat kapado awak.
Mako jaan biakan hari balalu tanpa shalawat. Jadikan shalawat sabagai bungo nan maharumkan hati jo panguat cinto ka Rasulullah SAW.
Khusus pado hari Jum’at, ulama-ulama menganjurkan untuak mambaco Surah Al-Kahfi. Rasulullah SAW manyabuik bahaso urang nan mambaco Surah Al-Kahfi pado hari Jum’at akan dipancarkan cahayo antaro duo Jum’at.
Labiah dari itu, barangsiapo manghafal sapuluah ayat pertamo Surah Al-Kahfi, mako Allah akan manjagonyo dari fitnah Dajjal.
Kahidupan di dunia iko indak lamo. Hari nan lalu indak akan babaliak. Umua nan tasiso sabananyo adolah modal untuak manyiapkan baka ka kampuang akhirat.
Karano itu, marilah kito saliang mangingekkan dalam kabaikan, saliang manasehati dalam kabanaran jo kasabaran. Jaan malu untuak mamulai hijrah walaupun dari langkah nan paling singkek. Sabab parubahan basar salalu dimulai dari niat nan tulus jo langkah nan sederhana.
Mudah-mudahan Allah mambari taufik jo hidayah-Nyo kapado kito sadonyo, mamudahkan jalan hijrah awak dari nan kurang baiak manjadi labiah baiak, dari nan lalai manjadi ingek, jo dari nan jauh manjadi labiah dakek kapado Allah Subhanahu wa Ta’ala.
Aamiin Ya Rabbal ‘Alamiin.
Wassalamu’alaikum warahmatullahi wabarakatuh.
