RAGAM MAKANAN RANG AWAK (6)
Kalau handak dikatokan makanan Minang banyak manggunoan santan jo lemak, memang indak bisa dipungkiri. Tapi harap dipahami, urang Minang indaklah makan makanan banyak lemak satiok hari. Makanan tantu divariasikan jo makanan nan indak banyak lemaknyo.
Gulai Gajeboh, nan acok pulo disabuik Gulai Cancang Gajeboh, adolah salah satu Gulai khas Minangkabau nan manggunoan dagiang jawi jo kandungan lemak nan cukuik banyak.
Dalam percakapan urang Minangkabau, istilah gajeboh acok dipakai untuak manyabuik bagian dagiang nan banyak manganduang lemak, tarutamo lemak nan malakek di dagiang atau lapisan lemak nan agak taba. Karano itulah Gulai Gajeboh babedo dari randang.
Kalau randang dimasak sampai kuahnyo kariang, Gulai Gajeboh tetap mampatahankan kuah nan cukuik banyak. Kuah santan nan kayo rampah basatu jo lemak jawi sahinggo menghasiakan raso nan sangaik guriah.
Bagi sabagian urang, justru lemak nan lambuik itulah bagian nan paliang dicari. Indak sado potongan dagiang jawi bisa mahasiakan Gulai Gajeboh nan samo. Potongan nan mampunyai keseimbangan antaro dagiang jo lemak akan maagiah tekstur nan labiah nikmat. Lemak lambek-lambek lunak kutiko dimasak basamo santan jo bumbu.
Takah kebanyakan masakan Minangkabau, kekuaikan Gulai Gajeboh talatak pado racikan bumbu. Bumbu dasarnyo biaso terdiri dari lado merah, bawang merah, bawang putiah, sipadeh, kunyik, langkueh, sarai, daun limau, daun salam atau daun kunyit, tergantung resep, sudah tu santan jo garam.
Lado maagiah raso padeh sekaligus warna merah-oranye pado kuah. Kunyik maagiah warna jo bau harum. Langkueh, sarai, dan daun aromatik maagiah bau nan kuaik.
Bilo bumbu dimasak basamo santan jo lamak jawi tu, tabantuaklah kuah Gulai nan pakek, gurih, padeh, jo harum. Dagiang nan banyak lemak dipotong sasuai ukuran nan diinginkan. Bumbu nan alah dihaluskan sudah tu dimasak basamo rampah sampai masak jo harum. Santan dimasuakkan sacaro bartahap. Dagiang dimasuakkan ka dalam kuah, sudah tu dimasak jo api sedang atau api ketek.
Salamo mamasak, santan musti dijago supayo indak pacah. Kuah diaduak lambek supayo tetap basatu. Bilo lah masak, kuah manjadi labiah pakek dan bau rampah samakin kuaik. Raso utamonyo adolah gurih, padeh, kayo rampah, jo berlemak.
Bagi urang nan suko makanan berlemak, bagian lemak nan lambuik justru manjadi kenikmatan utamo. Bilo dimakan basamo nasi hangek, kuah Gulai nan kayo lemak basatu jo nasi sahinggo mahasiakan raso nan kuaik.
Namun bagi urang nan indak biasa jo makanan berlemak, Gulai Gajeboh bisa taraso cukuik barek. Karano tu, makanan ko labiah elok dimakan sakadarnyo, indak balabihan. (Tan Parpatiah)
Baca juga: Teh Talua
