Sinayan patang ado mahasiswa dari Internasional Islamic University Malaysia datang ka Ranah Minang. Barombongan dari Program Studi Arsitektur. Sia nan ka manyangko baso sampai kini urang Melayu di Malaysia masih suko mangkaji Minangkabau. Dek itulah mangko datang urang ko ka Universitas Andalas.
Dek bakunjuang ka Fakultas Ilmu Budaya Universitas Andalas, tarutamo ka Program Studi Sastra Minangkabau, dosen jo mahasiswa babagi pulo tantang Minangkabau. Baagiah tahu baa bana rumah gadang, baa bana urang Minang dari daulu dari muluik ka muluik se baraja, jo baa malanjuikan warisan nan ado.
Dr. Eka Maigelia nan jadi narasumber manjalehan bana baso dulu urang Minang ko hiduik dari alam. Sagalo nan ado di alam diambiak untuk hiduik, tarutamo soal bahan makanan. Mulai dari bahan takah rabuang, pucuak ubi, cubadak, jo paku. Ado pulo bahan kinconyo takah kacang panjang, tapak leman, rabuang, jo gabelo.
Kok bumbu usah disabuik, lah jaleh kunyik, langkueh, sipadeh, lado, jo bawang. Nan palamak samba, nan wangi ado daun kunyik, sarai, jo daun limau. Untuak paagiah raso asam, ado asam kandi jo asam tunjuak. Nan ka pambungkuih samba ado daun pisang jo daun karambia. Kok ka maagiah rono makanan, ado daun pandan nan ka manjadi ijau, kunyik untuak kuniang, jo lado untuk nan sigah.
Nan disabuik ko lai acok juo tasarobok jo urang daulu sampai urang kini. Nan indak itu iolah daun pinjolang, nan dipakai katiko mambuek pangek situjuah. Pangek situjuah ko isinyo cubadak, paarumnyo daun pinjolang. Daun pinjolang ko acok juo disabuik daun pinjolang lauik. Kok di Jao namonyo daun katumba. Daun ko amaiklah arum takah katumba. Dek arum itulah baun anyia nan ado pado ikan jo dagiang jadi arum. Urang daulu katiko masak nyo masuakkan daun pinjolang ko ka pangek, gulai, asampadeh, jo randang.
Baitu bana urang Minang manjadian alam ko takambang jadi guru. Indak ado nan sio-sio. Resep lamak samba ko yo sadonyo diambik dari tanaman nan ado. Dari sinan mahasiswa Malaysia ko tahu baso sampai kini urang Minang indak maninggaan alam nan takambang jaid guru.
