Sanjo hari katiko kami nio pulang ka rumah dari kantua, tadanga surang kawan mangecek, “indak takana pulo mambaok kampia”. Banyak barang nan ka dibaok pulang. Dek ndak ado kampia, bacari asoi itam untuak panggantinyo.
Kini ko lah ndak banyak urang manyabuik kampia. Urang kini labiah tahu jo tas atau tampek mambaok barang-barang. Nan mudo malah manyabuiknyo jo gudibek (goodie bag) untuk tas jinjiang nan ancak-ancak ko.
Daulu maso ketek, takana dek ambo, urang gaek di kampuang mambaok kampia ka pasa. Apak-apak mambaok kampia rokok untuak mambali rokok anau. Kampia nan dibaok ketek ukurannyo, untuak mambali anau jo tambakau. Kampia rokok ko acok pulo dibaok dek amai-amai katiko manjalang urang kampuang, maimbau baralek.
Kok amak-amak, kampia ko paralu bana katiko kamatian. Amak-amak mambaok kampia nan baisi jo bareh. Kampia nan dibaok ukuran manangah. Kampia na tabuek dari pandan ko lah baragi rononya. Indak coklaik takah kampia rokok, ado nan rononya sirah, hitam, kuniang, sampai ijau taruang. Ukurannyo banyak pulo dari nan ketek, manangah, sampai agak gadang sampai tamuek duo liter bareh.
Salain kampia, ado pulo nan mambaok bangkiah. Kampia ko tabuek dari daun anau, bangkiah itu tampek takah embe nan tabuek dari rotan. Di Tanah Data, masyarakaik nan mambaok bangkiah ko biasonyo nan punyo tali darah jo nan maningga. Masyarakaik ko wajib mambaok katan jo karambia nan ditutuik jo daun lamak.
Daulu katiko kampia nan baisi bareh alah baagiah ka urang rumah, amak-amak nan padusi pai ka lasuang nan ado di halaman rumah untuk manumbuak ampiang atau bareh katan. Amak-amak manumbuak ampiang ko sampai kampia nan dibaok dibaliakan dek urang nan kamalangan.
Tapi kampia kok indak tapakai katiko kamalangan sajo. Katiko maimbau urang kampuang untuak pai baralek, dipakai lo kampia ko. Kampia nan dibaok baisi daun siriah, gambia, sadah, jo rokok. Urang nan ka baralek mambaok kampia ko ka rumah-rumah urang nan ka diimbau untuak datang baralek atau ka upacara-upacara adaik.
Kini taradisi mambaok kampia ko ka tampek urang nan kamalangan atau maimbau untuak baralek lah indak ado lai di kota. Maimbau urang-urang pai baralek ka rumah lah diganti jo undangan, kok indak jo gulo-gulo nan dimasuakkan ka dalam asoi. Lah ndak ado nan mambaok kampia. Baitu pulo kok ado kamalangan. Indak ado bana amak jo amai di kampuang nan mambaok kampia. Kok ado nan mambaok bareh, kampia lah baganti jo tas moderen. Indak kampia nan tabuek dari daun anau.
Jadi katiko kawan tadi manyabuik lupo mambaok kampia, kampia nan disabuik indak kampia nan dipakai katiko maimbau urang kampuang pai baralek atau kampia nan dipakai untuk mambaok barek ka tampek urang maningga. Kampia nan disabuik iolah gudibek atau tas untuak barang-barang nan ka dibaok. Zaman buliah moderen, tapi kato-kato nan dipakai kawan ko masih kato-kato lamo. Katonyo tampek mambaok barang masih layak disabuik kampia.
Bahkan, kampia ko dipakai pulo untuak peribahaso. Kecek urang Minang, mansiang baru ka bacari, kampialah salasai sajak kapatang. Mukasuiknyo, rundiangan baru ka dimulai, tapi hasilnyo alah tahu daulu. Jadi, kampia punyo makna nan dalam untuak manjalehan taradisi urang Minang sarato manjadi kieh katiko manyampaian makasuik hati.
