Bujang Manar Sorang tokeh gambia panik dek mangana untuang. Puta ka suok puta ka kida, sakali-sakali tampak cameh nan balabihan. Kadang-kadang bujang duduak di kurisi, kadang-kadang pindah ka janjang, kadang-kadang mangaluah manggauik kapalo,
Induak Samang alun membayia piti gambia pakan kini. Tabayang dek Bujang Manar, anak buahnyo lah manunggu balanjo untuak iduik sakaluarga di rumah. Baa ndak ka panik, Bujang Manar mamikiaan bisuak siang anaknyo ka timbang tando, piti alun kalua.
Anak nan bunsu Bujang Manar sibuk main Tiktok dalam biliak. Tiok sabanta maminta HP iPhone, padahal ayahnyo pusiang tujuah kaliliang mamikian gaji anak buahnyo, tambah pulo ansuran bank nan manyasak. Bujang Manar duduak tasanda di janjang rumah mamikian joalah ka dibayia-bayia piti anggota ko.
Ndak lamo sudah itu, urang rumah Bujang Manar maimbau, “Masuklah, Da, manga Uda duduak di janjang tu, ndak taraso ari ujan tu?” Hari lah baransua patang matoari lah mulai hilang.
“Manga Yati maimbau Uda?”
“Duduaklah Uda dulu.”
Sambia malap abuak udanyo nan basah kanai ujan, Yati jo Bujang Manar duduak baduo di ruang tangah dan mulai bacarito.
“Ado apo, Uda? Baa dek kusuik bana nampaknyo? Apo nan tajadi!” Yati mamanggia Bujang Manar jo sebuikan Uda.
”Patang Uda manamui induak samang untuk mamintak piti gambia, tapi alun cayia, gambialah batimbang sabarek 4 ton. Lah sabalik kampuang maminjam piti jo tetangga, ndak ado nan manyalangan, utak panik kapalo sakik. Baa ko aka lai, Yati?”
“Kok baitu baa nyo, Da, wak cubo batenggang ka tampek Mak Etek di Bukittinggi dulu.”
Singkek carito Bujang Manar jo Yati sampai di rumah Mak Etek tu. Bujang Manar mulai mangambangan carito. Akhianyo sasudah bacarito panjang leba, Mak Etek paham dan mamikiaan apo nan bisa dibantu. Mak etek nan indak pulo punyo simpanan, tapi inyo paduli jo anak kamanakan, akhianyo Mak Etek mangecek, ”Pakailah BPKB oto ko dulu, mudah-mudahan bisa maringankan. Itu nan Mak Etek adonyo.”
