Padang — Urang tuo-tuo Minangkabau lah lamo maingekan, “jaan mantang-mantang”. Mantang-mantang awak bagak, sagalo kadisipak sajo. Apo nan hiduik di muko bumi iko ado haknyo untuak diharagoi. Kuciang nan indak pandai mengecek jo babahaso manusia punyo hak untuak hiduik ndak buliah diasab, bisa-bisa awak baurusan jo polisi, babayia utang dibueknyo.
Kasus panganiayaan sikua kuciang sampai mati nan dilakukan dek surang anak laki-laki di kawasan Pasar Raya Fase VII Padang kini masuak ka ranah hukum. Aliansi Keadilan untuk Kucing Indonesia (AKKI), Sinayan patang (13/7), malaporkan kajadian tu ka Polresta Padang.
Laporan itu dibuek baradasarkan dugaan palanggaran Pasal 337 Undang-Undang Nomor 1 Tahun 2023 tantang Kitab Undang-Undang Hukum Pidana (KUHP), nan mangatur panganiayaan ka binatang.
Ketua AKKI, Nita Indrawati Arifin, mangatokan, video nan terekam CCTV baredar di media sosial lah mambuek hati urang banyak jadi pilu.
“Di dalam rekaman tampak surang anak laki-laki manggangu sikua induak kuciang nan sadang manjago anak-anaknyo di dalam dus. Anak-anak kuciang diambiak untuak dijadikan mainan anjiang. Induak kuciang mancubo mampertahankan anaknyo, tapi malah ditokok. Salah sikua anak kuciang tu akhirnya mati,” kecek Nita.
Manuruiknyo, langkah hukum nan diambiak AKKI bukannyo dek mancari hukuman sajo, tapi untuak mambari paringatan ka masyarakat bahaso manyeso binatang indak buliah dianggap main-main ataupun kalakuan biaso.
Nita basamo Tati Ita Warni, Rina jo Elda, nan didampingi Animal Lawyer Indonesia, Eko Kurniawan, barahok kasus iko diproses sampai tuntas, supayo jadi palajaran bagi urang banyak.
“Laporan kami alah ditarimo Polresta Padang jo Surat Tanda Penerimaan Laporan Nomor STTPL/378/VII/2026. Kami barahok aparat manjalankan proses hukum jo sabana adil, supayo ado efek jera jo masyarakat tahu bahaso maasab binatang ado akibat hukumnyo,” kato Eko.
Eko juo mangingekan, Padang pernah diguncang kasus sarupo pado awal September 2023. Waktu itu tigo urang mahasiswi tabukti mambari minuman kareh jenis soju ka sikua kuciang Persia. Pangadilan Negeri Padang manjatuahkan hukuman duo bulan pinjaro jo masa percobaan ampek bulan ka pelaku.
Manuruik Eko, Pasal 337 KUHP baru lah jaleh mangatur larangan manyakiti, malukoi, ataupun marusak kasahatan binatang tanpa alasan nan patuik. Artinyo, nagara kini mambari palindungan hukum ka binatang dari sagalo macam kalakuan aniayo.
Samentaro itu, Tati Ita Warni nan turun langsung ka lokasi kajadian mangatokan pihaknyo barhasil manyalamaikan induak kuciang nan dipanggia warga jo namo “Gemoy” tu.
“Kami batanyo ka urang-urang di pasa. Akhirnyo kami batamu jo pemilik toko nan salamo iko marawat Gemoy. Ternyato urang-urang di situ panyayang kuciang. Marano bana hati urang dek maliek rekaman CCTV. Malah ado pulo kaba bahaso di lorong balakang ado induak kuciang lain nan juo dianiayo, tapi indak ado bukti CCTV,” keceknyo.
Sasudah laporan disampaikan, AKKI kini mananti tindak lanjut dari pihak kapolisian. Nita barahok kasus iko diproses sampai ado kapastian hukum.
“Kalau dibiakan, urang bisa manganggap maniayo kuciang, apolagi dek anak-anak, adalah kalakuan biaso. Padahal, kasih sayang ka sasamo makhluk Allah harus ditanamkan sajak ketek,” katanya.
Data dari Social Media Animal Cruelty Coalition (SMACC) juo manunjuakkan bahaso masalah panganiayaan binatang di Indonesia masih mangkhawatirkan. Dari 5.480 konten panyiksaan binatang nan dihimpun dari media sosial salamo Juli 2020 sampai Agustus 2021, sabanyak 1.626 konten atawa 29,67 persen berasal dari Indonesia. Angko iko manjadikan Indonesia sabagai nagari jo konten panyiksaan binatang tabanyak pado maso tu. (Tan Parpatiah)
