Mugarik tu, salasai sumbayang, Nuriyah bagageh ka dapua untuak maambiekan makan untuak anaknyo nan masih ketek. Anaknyo, duo laki-laki nan kato urang kampuang kamba di lua. Aratinyo jarak umua anaknyo indak talalu jauah. Duo anak Nuriyah lengah manonton tivi. Indak barapo lamo, Nuriyah alah mambaok duo piriang nasi jo lauak pauaknyo untuak diadokkan ka anaknyo.
Indak barapo lamo, suaminyo Nurdin pulang dari musajik. Nurdin mambantangkan lapiek sumbayang, lalu mangaji. Kutiko Nurdin sadang mangaji tu, Nuriyah mancaliek ado binatang mode sirangkak gadang masuak ka dalam rumahnyo. Nuriyah takajuik, baitu pulo Nurdin nan langsuang manyudahi kajinyo. Diambieknyo tarompah, dibunuahnyo sirangkak tu.
Habis tu Nurdin pai ka dapua untuak makan malam. Inyo ambiek makan sorang, indak manunggu dihidangkan dek istrinyo. Karano Nurdin tahu, anaknyo masih ketek-ketek. Salasai makan, Nurdin duduak di ruang tangah sambie manonton tivi. Indak barapo lamo inyo langsuang masuak biliek. Tadanga Nurdin maimbau Nuriyah. “Nur, kamari sabanta”, imbau Nurdin.
Nuriyah bagageh ka dalam biliek. Inyo caliek Nurdin suaminyo alah bagalumun jo salimuik paneh. “Manga Uda basalimuik ko? Sakik Uda?” tanyo Nuriyah sambie duduak di tapi tampek tidua.
“Antahlah, Nur, indak lamak taraso badan Uda. Tibo-tibo dingin sampai ka tulang,” jawek Nurdin.
Nuriyah marosok kanieng suaminyo. Lai indak angek do. “Antakanlah Uda ka dotor,” pinto Nurdin ka bakeh Nuriyah. Nuriyah baranjak ka biliek balakang, maambiek jeket untuak suaminyo. Dek anak masih ketek, batompangkan ka tetangga sabalah rumah. Barangkeklah Nurdin jo Nuriyah ka rumah dotor nan jaraknyo kiro-kiro 2 km dari rumahnyo. Nurdin mambonceng Nuriyah.
Sampai di rumah praktek dotor, masuaklah Nurdin nyo bimbieng dek Nuriyah. Tampek praktek tu indak talalu gadang. Dindiangnyo bacat putieh, ado babarapo kurisi di ruang tunggunyo. Kebetulan wakatu itu, indak ado pasien nan lain. Katiko dipareso, indak ado sakik Nurdin do kato dotor tu. Dotor hanyo maresepkan vitamin. Pulanglah inyo baliek ka rumah.
Nurdin jo Nuriyah tingga di daerah Pasisie. Kaduonyo samo-samo marantau ka nagari ko. Istrinyo dari daerah darek, samantaro Nurdin barasa dari daerah provinsi ujuang salatan Sumatera. Namun ibaraik pepatah, garam di lauik, asam di gunuang, batamu dalam balango. Nuriyah dari dulu alah maimbau suaminyo jo panggilan Uda. Nurdin dikenal sabagai pribadi nan elok. Inyo taat baibadah. Limo wakatu salalu dikarajoan di musajik.
“Tolong anta surek sakik Uda ko ka kantua”, kato Nurdin pagi tu. Katokan baso Uda sakik.
“Iyo Da,” kato Nuriyah nan langsuang pai ka kantua suaminyo naiak honda.
Di sapanjang jalan, Nuriyah tidak habis pikie, apo garan sakik suaminyo. Samanjak sirangkak naiek ka ateh rumah, nyo caliek Udanyo langsuang mandingin. Lai indak gara-gara itu?” mambatin Nuriyah. Tapi sacapek itu pulo, nyo buang sakwa sangkonyo tu.
Samanjak kajadian malam tu, kondisi kesehatan Nurdin agak manurun. Baitu pun jo Nuriyah kanai pulo imbasnyo. Malam tu Nuriyah barasian dikaja ula itam gadang. Dalam rasian tu ado pulo nampak anjieng bawarna itam. Tangah malam, Nuriyah tasintak, nyo caliek dek Nuriyah, suaminyo sadang manahan sakik.
“Manga, Da?” tanyo Nuriyah.
“Paruik Uda manyasak ka ateh,” kato Nurdin sambie manahan sakik. Nurdin bausaho duduak, taruihnyo ka kamar balakang. Nurdin kironyo pai maambiek uduak untuak sumbayang tahajuik. Nuriyah manyambuang laloknyo baliek. Indak tahu barapo lamo suaminyo sumbayang.
Taraso dek Nuriyah, baso sakik suaminyo indak sakik medis. Karano Nuriyah pun acok barasian buruak ampie tiok malam baturuik-turuik.
“Duaarrrr,” tadanga atok rumah sarupo diimpok batu. Takajuik saisi rumah. Disusul jo bunyi kasiek baserak di ateh atok. Nurdin tahu, itu adolah tando-tando ado yang mangirim sihir. Nuriyah mamaluak anaknyo supayo jan takuik. Nurdin lai nampak tanang, tapi antahlah dalam hatinyo.
Nurdin pai ka balakang untuak maambiek uduak, ka sumbayang. Satiok ado kajadian, inyo selalu bamohon ka Allah, untuak maminta parlindungan. Alhamdulillah, keluarga Nurdin dan Nuriyah, lai indak binaso dek kajadian-kajadian nan sarupo itu.
Pagi tu, katiko Nuriyah sadang manjamua kain, tibo-tibo inyo tapakiek. Taraso dari arah balakang, ado nan malambuik dari kapalo sampai ka pinggangnyo. Kanai gayuang. Itu nan kato-kato urang. Samanjak Sirangkak itu naiek ka ateh rumah, banyak kajadian nan ganjie nan dialami Nurdin jo istrinyo. Antahlah, wallahu alam.
