Padang — Video pidato aktivis media sosial Permadi Arya alis Abu Janda nan manyingguang Sumatera Barat jo manggunoan istilah “bar bar” viral di media sosial jo mambangkikkan galombang kritik dari masyarakaik Minang.
Pernyataan iko dibuek dek Abu Janda kutiko bapidato masalah intoleransi taradok urang Kristen di Indonesia. Dalam pidatonyo, inyo manyabuik sajumlah daerah di Indonesia bagian barat sabagai daerah jo tingkek intoleransi nan tinggi.
“Dalam tigo taun ko, fobia Kristen atau sentimen anti-Kristen cukuik parah di nagari awak. Indak di sado daerah. Wilayah tangah jo timur cukuik kondusif,” kecek Abu Janda dalam video nan banyak beredar.
Abu Janda sudah tu manyabuik sajumlah provinsi sarupo Jawa Barat, Banten, Lampung, Sumatera Barat, Riau jo Sumatera Utara.
Namun, bagian dari pidato nan paliang banyak mandapek paratian adolah kutiko Abu Janda mangaitkan kato “bar bar” ka Sumatera Barat jo Jawa Barat.
“Nah, itu nan ciek di Jawa Barat, nan ciek lai di Sumbar. Antah nan ma nan barbar. Ambo juo aneh, baa kok banyak bana barbar tu,” keceknyo.
Samantaro itu, Gubernur Sumbar, Mahyeldi Ansharullah, manyoroti pernyataan Permadi Arya nan viral, manyingguang masyarakaik Sumbar tu.
Manuruik gubernur, kato-kato ko indak mancaminkan etika dan bapotensi untuak mamicu perpecahan dalam masyarakaik Indonesia nan baragam.
“Nyo sampaikan itu di palanta. Iko paralu di selidiki,” kecek Gubernur Mahyeldi, sasudah sumbayang rayo di halaman kantua gubernur, Rabu (27/5/2026).
Mahyeldi Datuak Marajo maanggap baso pernyataan Abu Janda tu indak tapek untuak disampaian, tarutamo di palanta umum nan dapek mampangaruahi persepsi masyarakaik tantang wilayah jo etnis tatantu.
Dalam pado itu, Ikatan Keluarga Minang (IKM) DPP malaporkan Abu Janda ka Polisi manganai dugaan ucapan kebencian taradok masyarakaik Sumatera Barat (Sumbar) jo etnis Minangkabau.
Laporan alah diajukan pado hari Salasa (26/5) dan didaftarkan jo nomor laporan LP/B/230/V/2026/SPKT/Bareskrim.
Sekjen DPP IKM, Braditi Moulevey Rajo Mudo, mangatoan baso IKM malaporkan Abu Janda karano inyo lah mambuek parnyataan nan dianggap manyarang masyarakaik Sumatera Barat jo manggunoan istilah “bar bar”.
“Hari ko kami alah mambuek laporan satantangan tuduhan, dugaan ucapan kebencian nan dilakukan dek Permadi Arya alias Abu Janda,” kecek Braditi ka wartawan Bareskrim Manes Polri, Selasa (26/5).
Braditi mangatoan baso kato-kato nan diduga dibuek dek Abu Janda dianggap manggaduah karano bapotensi manuduah masyarakat Sumatera Barat sebagai masrakaik nan indak toleran. Padohal urang awak sangaik toleran sajak saisuak.
Manuruiknyo, IKM mamiliah untuak maambiak tindakan hukum supayo polemik tu indak manyebar dan diproses sasuai jo paraturan nan balaku.
“Dan kami alah maadoan diskusi jo polisi dan iko cukuik mangganggu karano ucapan kebencian ko bisa manyababkan perpecahan, dan tantu sajo akan maagiah palajaran ka Abu Janda tu supayo ndak asa malantong sajo untuak itu kami sadang malaporkannyo ka Mabes Polri sahinggo akan diproses sacaro hukum,” katonyo. (Tan Parpatiah/berbagai sumber)
