Pado maso daulu, ado daerah di Kabupaten Dharmasraya, Sumatera Barat banamo Sitiung Ampek. Daerah Sitiung Ampek dulunyo hutan rimbo yang marupokan daerah pamakaran dari Sawahlunto Sijunjuang sahinggo dulunyo digunokan untuak kabun sawit dan kabun karet. Dulu panduduak Sitiung Ampek sangek saketek, bahkan dapek diituang jo jari. Hanyo dihuni dek urang-urang yang bakarajo di kabun sawit jo kabun karet. Akan tatapi, karano kabun sawit dan karet alah bakambang, banyak urang yang datang ka Sitiung Ampek untuak mandirian pamukiman dan alah banyak urang-urang yang tingga di Sitiung Ampek dan alah mulai hiduik manatap di sinan.
Karano dahulunyo Sitiung Ampek iolah hutan rimbo sahinggo banyak kajadian aneh yang dikatahui dek masyarakat satampek, tarutamo ciek jalan linteh di Sitiung Ampek. Ado simpang nan konon kabanyo marupakan simpang nan sangek ditakuti dek masyarakat satampek. Simpang yang sangek kalam bana katiko patang dan dikalilingi dek rawa-rawa sarato samak balukar nan lambok sahinggo satiok urang takuik untuak malintasi simpang tu. Simpang tu iolah Simpang Rajo.
Kaba demi kaba didanga, acok tadanga suaro katiko panduduak lewat di Simpang Rajo sakitar tangah malam. Sarupo nan dialami dek Sumarjo nan kini tingga di Sitiung Ampek, dakek simpang itu. Wakatu Sumarjo pulang karajo dari ladangnyo kiro-kiro jam 11.45, Sumarjo malewati Simpang Rajo nan kabanyo tasabuik sangek angker. Katiko tapek di simpang itu, Sumarjo mandanga suaro tangih laki-laki nan maringih kasakikan.
Badan Sumarjo bagata jo bulu kuduaknya mulai marindiang. Indak lamo kudian Sumarjo turun dari motornyo untuak mamastian kaadaan di sakaliliang simpang tu. Katiko Sumarjo mandakek ka arah rawa di subarang jalan, suaro tangih pun tadanga sangek kancang jo samakin kareh. Pado saat ituloh, Sumarjo mandakek ka rawa-rawa dan tanyato indak ado ciek alah urang juo nan ado, bahkan suaro tangih baranti sacaro lambek-lambek. Sumarjo takajuik dan indak manyangko kajadian itu manimpa inyo. Sumarjo langsuang mambaok motornya supayo capek pulang ka rumah. Katiko sampai di rumah, bini jo anak-anak Sumarjo alah lalok sahinggo indak dapek mancaritoan kajadian nan manimpo dirinyo katiko pulang dari ladangnyo tadi. Sumarjo mamutuihan untuak mancaritoan ka bininyo bisuak pagi.
Pagi alah tibo, pada hari itu tapekloh hari minggu dan Sumarjo libur karajo di ladangnyo. Inyo nio maabihan wakatu hari Minggu basamo anak jo bininyo. Di muko rumah Sumarjo sadang duduak baduo jo bininyo nan banamo Tiyem. Inyo alah manikah kiro-kiro sajak 28 tahun nan lalu dan alah punyo duo urang anak. Katiko itu, Sumarjo mancaritoan sagalo kajadian samalam katiko pulang karajo. Bahkan, bininyo alah tahu manganai simpang tu, tapi Tiyem indak tahu baitu jaleh carito Simpang Rajo sahinggo Tiyem manyaranan suaminyo mancaritoan Simpang Rajo ka urang yang alah lamo tingga di Sitiung Ampek.
“Ambo satuju samo ide yang alah amak agiah, ambo ka manyampaian carito ka urang yang labiah tuo di Sitiung Ampek iko,” kecek Sumarjo jo tageh.
Sumarjo langsuang basobok jo Pak Lurah nan marupoan katua adat di Sitiung Ampek. Katiko alah tibo di rumah Pak Lurah, Sumarjo mancaritoan apo nan sabana tajadi malam sapulang inyo karajo.
“Apak urang baru di siko, jadi Apak alun jaleh bana tantang Simpang Rajo di Sitiung Ampek ko,” kecek Pak Lurah jo nada suaro nan aluih.
“Sabananyo apo nan tajadi daulunyo tantang Simpang Ampek ko”, kecek Sumarjo yang sangek ingin tahu carito sabananyo.
Dulu di Sitiung Ampek ko tadapek karajaan nan dihuni oleh rajo jo hati nan bajiwa gadang, bijaksana, dan panuah keuletan. Rajo tasabuik punyo seorang anak yang banamo Rajo. Katiko Rajo baumua sabaleh tahun, ayahnyo nan marupoan Rajo nan sangek bijaksana maningga karano sakik nan manimpo. Rajo sangek sadiah karano ayahnyo maningga. Katiko Rajo alah gadang baumua kiro-kiro 23 tahun, sipaik Rajo sangeklah babeda jauah jo ayahnyo. Rajo batubuah gadang, itam, jo bapanampilan indak samo jo ayahnyo. Sipaik Rajo pun indak samo jo ayahnyo, inyo taruih manghino urang yang ado di bawahnyo, sudah tu balaku sasukonyo sarupo mambunuah urang banyak. Jo sipaiknyo tu, masyarakat di karajaan alah khawatir dan Rajo ka sagaro diusia dari karajaan ayahnyo. Namun, Rajo jo hati gadangnyo maninggakan karajaan warisan dari ayahnyo.
Bara bulan kudian, Rajo alah hiduik surang dan inyo indak pernah bapikia baso inyo kini indak anak dari saurang rajo nan ado di karajaan. Rajo alah pai jauah dari karajaan. Jo kahidupan nan alah lamo surang, akhianyo Rajo manamuan saurang padusi rancak banamo Santi untuak dijadian sabagai bininyo. Mareka manikah dan punyo duo urang anak yang banamo Saras jo Dio.
Masyarakat sangek heran mangapo Rajo punyo bini nan sangek rancak jo anak-anak nan elok, padahal Rajo iolah jantan nan sangaek bodoh jo suko batindak kakarasan. Mungkin Tuhan alah adia manciptakan pasangan nan saliang malangkapi. Alah manikah, tapi Rajo indak samo sakali manafkahi bini jo anak- anaknya sarupo halnyo saurang suami, padahal Rajo pai pagi hari dan pulang patang hari. Santi nan manjadi bini Rajo binguang jo maraso indak pacayo baso suaminyo tega indak manafkahi inyo jo anak-anaknyo. Santi alah mulai tahu sifek Rajo nan sabananya, tapi Santi masih mancintoi jo manyayangi Rajo sarupo suami nan biaso mambuek inyo bahagia.
Katiko itu Santi nio mangecek kapado suaminyo, yaitu Rajo. Inyo nak mamastian apo sabananyo karajo lakinyo katiko alah manikah. Sabalum barangkek karajo, Rajo duduak di meja makan untuak makan basamo bini jo anak-anaknyo. Inyo makan nasi goreng nan dimasak Santi. Makannyo subana lamak. Alah salasai makan, Saras jo Dio bapamitan kapado ayah jo bundonyo untuak barangkek ka sakolah. Saras jo Dio nan masih sakolah dasar sangaik riang untuak pai ka sakolah. Katiko Saras dan Dio alah barangkek ka sakolah, Santi mulai mananyoan nan selamo ko inyo takuik untuak mananyoan kapado Rajo.
“Da, kalo Santi buliah tahu, sabananyo apo karajo Uda salamo kito basamo. Uda barangkek pagi hinggo patang. Santi indak samo sakali tahu apo nan Uda karajoan?” kecek Santi nio tahu tantang suaminyo.
“Indak paralu tau kau apo nan Uda karajoan di lua rumah,” kecek Rajo, sudah tu langsuang pai maninggaan Santi.
Santi nan baitu kuek maadoki suaminyo indak dapek bakato-kato lai. Biakan Tuhan nan manunjuakan jalan nan bana untuk suaminyo, kecek Santi jo muko nan sangek sadiah maliek tingkah suaminyo salama iko. Sasudah Santi mambarasiahan meja makan, Santi bagageh pai ka pasa mambali bahan-bahan dapua untuak dimasaknyo beko sore. Di tangah jalan, Santi mancaliak urang nan mirip jo Rajo, suaminyo bajalan basamo padusi rancak. Akan tatapi, Santi indak yakin apo itu bana-bana suaminyo atau indak. Santi tetap bapikia nan elok baso suaminyo sadang karajo. Indak ka mungkin suaminyo jalan jo padusi rancak nan bukan bininyo. Santi pun malanjuikan parjalanannyo sampai ka pasa. Katiko Santi nio mamiliah sayua nan ka dibalinyo, Santi maliek Rajo, suaminyo duduak di pos ronda dakek jalan pasa dan bamain judi sarato mabuak basamo kawan-kawannyo. Santi sangek indak yakin, “Bukannyo suami ambo sadang karajo di lua kampuang?” kecek Santi dalam hatinyo.
Santi sangek sadiah maliek suaminyo main judi jo mabuak. Santi indak parnah mangira baso suaminyo ka mangarajoan nan sarupo itu.
Katiko sampai di rumah, Santi malatakan balanjonyo di dapua. Inyo tabayang apo nan alah dikarajoan suaminyo. Katiko anak-anaknyo pulang sakolah, Santi indak manjawek salam dari anak-anaknyo.
“Alah pulang, Nak, kalian istiraheklah dulu, beko ama buekan makanan nan kalian sukoi,” kecek Santi. Saras jo Dio balari ka kamarnyo untuak mangganti baju. Katiko itu juo inyo masih taruih mamikiaan suaminyo.
Barapo wakatu kamudian, Rajo datang sambia mabuak-mabuaan sahinggo Santi sangek takajuik mancaliak suaminyo. Katiko Santi mancubo mambantu suaminyo untuak pai ka kamar, maubekan suaminya, Rajo mangampehkan tangannyo ka kapalo Santi sahinggo kapalo Santi tabantua meja nan sangek kareh dan kapalo Santi badarah. Rajo samo sakali indak maraso basalah, bahkan inyo langsuang pai ka kamar maninggakan Santi jo kapalo nan panuah darah. Walaupun Rajo takah itu, Santi indak mambanci Rajo. Inyo tatap maharagoi Rajo sarupo suami nan dicintoinyo.
Malam hari alah tibo. Santi malihek suaminyo ka kamar, tapi tibo-tibo Rajo indak ado samo sakali. Santi sangek takajuik inyo batanyo-tanyo manga suaminyo tibo-tibo hilang, padahal sore tadi suaminyo masih ado di rumah. Santi pun mamarikso kamar suaminyo, mareka alah lamo pisah kamar samanjak ado kakarehan dalam rumah tangga nan dikarajoan Rajo ka Santi.
Katiko Santi masuak ka dalam kamar suaminyo, Santi mancaliak sangek banyak barang-barang nan aneh. Inyo manganggap barang-barang yang ado di dalam kamar itu iolah mistis. Kamar suaminyo pun baitu kalam jo tacium aroma nan sangek aneh. Santi tatap maraso panasaran ado apa sabananyo dalam kamar suaminyo karano salamo mareka manikah, Santi indak parnah masuak ka dalam kamar itu.
Mato Santi pun mangarah ka laci meja kamar suaminyo, “Sapartinyo ado barang-barang nan aneh dalam laci itu,” kecek Santi dalam hatinyo.
Jo raso ingin tahu, Santi mambukak laci itu. Katiko laci alah tabuka, Santi takajuik tanyato ado kariah yang sangek bacahayo dalam laci. Santi binguang manga suaminyo manyimpan benda-benda mistis sarupo kariah tersebut. Karano aroma dalam kamar suaminyo itu samakin manyangek, Santi langsuang maninggakan kamar suaminyo capek-capek.
Pagi harinyo, Santi mananyoan kapado Rajo tantang kariah nan ado dalam laci kamarnyo. Tapi, Rajo manghiraukan pertanyaan dari bininyo sahinggo Santi manjadi taruih-manaruih mananyoan hal itu.
Jo panuah amarah Rajo manampa bininyo hinggo tajatuah ka lantai. Dek indak maraso basalah, Rajo maninggakan Santi pai ka lua rumah. Santi badoa untuak suaminyo.
Rajo nan acok bajudi jo kawan-kawannyo maraso bosan karano uang nan ado alah habih dan indak tasiso samo sakali sahinggo Rajo baraliah untuak manggoda satiok padusi-padusi di desa. Satiok padusi nan basobok pasti marasa takuik karona Rajo tarkanal jo jantan nan suko mamperkosa padusi di desa.
Suatu malam Rajo pai ka suatu rumah. Rumah itu iolah rumah salah satu padusi nan sedang ditingga suaminyo karajo. Rajo alah marancanaan hal itu katiko kasado padusi di desa tasabuik surang di rumah karano suami mereka karajo. Pado malam itu, suaro katukan pintu pun tadanga dan urang rumah indak tahu manga ado tamu tangah malam.
Katiko urang nan punyo rumah mambuka pintu, inyo sangaik takajuik tanyato Rajolah nan datang tangah malam.
“Ado apo kau datang ka rumah ambo tangah malam ko, Rajo?” kecek nan punyo takuik maadoki Rajo.
Rajo manjawek baso inyo nak batamu ka rumah padusi ko untuak manjalin silaturahmi. Tapi padusi itu indak pacayo jo apo nan alah dikecekan Rajo sahinggo padusi itu manutuik pintu jo maninggakan Rajo. Walaupun alah indak ditarimo dek urang nan punyo rumah, Rajo masih mangatuak-ngatuak pintu dan indak ka pai sabalum nan punyo rumah mambuka pintu baliak. Babarapo wakatu kamudian, Rajo alah panek manunggu dan inyo mamutuihkan untuak pai maninggakan rumah tu dan mancari rumah-rumah padusi lainnyo.
“Kalian indak akan bisa lolos dari tangan den padusi-padusi bodoh,” kecek Rajo dalam hatinyo.
Alah duo minggu Rajo indak pulang ka rumah, Santi jo kaduo anaknyo alah cameh. Rajo indak ado maagiah kaba saketek pun. Saras jo Dio, anaknyo nan masih basakolah, manjadi sadiah karano alah lamo ayahnyo indak basobok jo mereka.
Suatu katiko Dio batanyo ka amaknyo. “Mak, manga ayah indak pulang ka rumah? Dio taragak nak basobok jo ayah.”
Amaknyo manjawek, “ Mungkin sajo ayah sadang banyak karajo, Nak.”
Kaduo anaknyo sangek sadiah dan manitiakkan aia mato. Santi indak tega malihek kaduo anaknyo basadiah. Inyo nio lakinyo pulang ka rumah dan bakumpua basamo. Tatapi hari demi hari alah dilewati, Rajo alun juo datang ka rumah. Santi hanyo bisa mandoakan supayo lakinyo dilindungi dek Sang Pancipta.
Santi alun mangatahui karajo suaminyo kini iolah manggoda satiok padusi-padusi nan ado di desa. Santi hanyo basaba dan mungkin ado kaajaiban nan biso mambaok Rajo, suaminyo pulang ka rumah.
Babarapo lama kamudian, Rajo datang jo muko nan sangaik suram. Saras dan Dio kalua dari kamarnyo karano mandanga suaro ayahnyo nan alah pulang ka rumah. Mareka sangek sanang karano ayahnyo alah pulang. Santi gadang hati pulo karano doanyo salamo iko dikabulkan dek Nan Kuaso. Tapi, di tangah kebahagiaan Santi jo kaduo anaknyo, Rajo samo sakali indak manganggap mereka sabagai keluarganyo lai, bahkan Rajo pulang ka rumah hanya sabanta. Inyo hanyo pai ka kamarnyo.
Santi sangek curiga jo tingkah suaminyo katiko pulang ka rumah. Diam-diam Santi mancaliak apo nan dikarajoan suaminyo katiko barado dalam kamar. Tanyato suaminyo maambiak kariah kasayangannyo, dan yang anehnyo, Rajo mangecek surang ka kariah kesayangannyo itu sahinggo mambuek Santi samakin nio mancari tahu, apo nan suaminyo kecekan ka kariah itu.
“Jo paninggalan kariah dari gaek den iko, sado urang indak dapek mangalahan aden dan ndak ado ciek alahnyo nan biso mambunuah den. Hanyolah kariah sakti nan aden punyo,” kecek Rajo.
Mandanga Rajo mangecek sarupo itu, Santi mulai binguang sabananyo. Ado apo jo kariah punyo suaminyo itu. Katiko itu Rajo kalua dari kamar dan pai maninggakan Santi sarato kaduo anaknnyo. Babarapo minik kamudian, Santi mancubo mancari tahu ado apo jo kariah itu.
Katiko malam tibo, Rajo nan hobinyo bamain judi, mambunuah urang, jo manggoda padusi rancak. Rajo datang ka rumah padusi sacaro diam-diam. Akan tatapi, wanita tu indak nio dan maraso takuik jo Rajo. Padusi itu mamakiak supayo ado nan bisa mambantunyo manghalangi Rajo. Mandanga pakiak tangah malam, sabagian warga pai ka suaro nan muncua. Rajo maraso takuik, inyo indak nio tatangkok sahinggo Rajo balari maninggakan urang nan alah malieknyo. Urang kampuang sagiro manangkok Rajo untuak dibunuah.
Jo raso cameh, Rajo balari ka dalam hutan dan entah inyo ka pai kama. Tapaso Rajo balari supayo tahinda dari urang nan nio mambunuhnyo. Akhianya Rajo baranti pasimpangan jalan nan panuah samak baluka. Rajo dikapuang dek urang kampuang dan inyo alah indak bisa pai kama-kama, bahkan Rajo diikek di pohon dakek pasimpangan jalan. Katiko itulah urang kampuang alah mamukua Rajo manggunoan kayu jo rotan. Sangek aneh, sado kayu jo rotan nan digunoan untuak mamukua Rajo patah manyantuah badan Rajo. Rajo indak maraso sakik. Warga sadar baso Rajo iolah katurunan kakeknyo nan marupoan dukun ilimu hitam. Warga akan taruih barusaho untuak mambunuh Rajo. Kamudian Santi, bini Rajo datang mambaok kariah kasayangan Rajo.
“Oi urang banyak, Rajo hanya biso dibunuah jo kariah iko,” kecek Santi sambia manangih.
“Apo? Santi dari ma kau dapekan kariah itu?’’ kecek Rajo berang di mukonyo. Santi mangarajoan iko karano alah indak kuek maliek tingkah laku suaminyo. Indak lamo kamudian, ditancapkanlah kariah tu ka paruik Rajo hinggo mati dan darah Rajo mulai mangganang di simpang jalan.
Santi indak dapek baranti manangiah karano inyo alah mambunuah suaminyo surang. Nan tajadi kudian manjadi aneh. Kariah nan ditancapkan ka paruik Rajo tibo-tibo hilang. Siso-siso tubuhnyo pun dikubuakan dakek pasimpangan tu. Maka dari ituloh, simpang itu diagiah namo “Simpang Rajo’’nan tasabuik jo simpang nan angker jo rawan kecelakaan. Siapo sajo nan malintasi simpang itu, handaknyo mambunyian klakson sabanyak tigo kali sabagai tando kito manumpang lewat.
