Kairo – Kutiko surang gadih Minang dari Agam bapidato di podium wisuda sarjana Universitas Al Azhar Kairo, Mesir, nan mandanga tacangang-cangang. Yelly Putriyani, nak gadih rang awak nan diwisuda diminta bapidato mewakili mahasiswa asiang Pidato jo panuah perasaan dalam bahaso Arab nan sangaik pasiah mambuek nan hadir basarato jo Imam Besar (Rektor) Universitas Al Azhar Prof. Dr. Ahmed Al-Tayyib tagak maagiah applaus.
Yelly Putriyani, lulusan jurusan Balaghah (Bahaso jo Sastra Arab), indak hanyo mandapek simpati, tapi juo mandapek panghargaan nan langka, yaitu kasampatan untuak malanjuikan kuliah Sarjana (S2) langsuang dari Imam Agung Al-Azhar, Prof. Dr. Ahmed Al-Tayyib tu.
Situs resmi Universitas paliang tuo di dunia tu manyabuikan baraso Yelly adolah mahasiswa Indonesia nan hebat. Pidatonyo langsuang viral di Mesir.
Aia mato lulusan Indonesia di podium Universitas Al-Azhar tu manitiak kutiko mandapek sambutan apolagi langsuang Rektor bana nan maagiah penghormatan ka inyo.
Upacara wisuda Universitas Al-Azhar pado 25 Januari 2026 awalnyo bajalan sabagai upacara akademik biaso. Namun, suasana barubah katiko Yelly, nan diangkek sabagai wakil untuak lulusan lua nagari, manyampaikan pidato dalam bahaso Arab formal nan fasiah.
Suaronyo manggigia, aia mato jatuah, kato-kato syukur mangalir tanpa rekayasa. Momen iko direkam, diunggah jo disebarkan di babagai platform media sosial Mesir, tamasuak akun resmi Al-Azhar.
Viralnyo pidato Yelly indak baranti sabagai sensasi media. Dalam parnyataan tatulih, Al-Azhar mangungkapkan baso Imam Besra Syekh Al-Azhar manarimo Yelly, nan manyatoan kainginannyo untuak basobok, jo guru gadang ntun.
“Baliau (Syekh Al-Azhar) maagiah instruksi supayo Yelly diagiah kasampatan untuak malanjuikan studi S2 di Al-Azhar, sabagai bantuak dukuangan untuak pajalanan akademiknyo,” baitu ditulih dek akun resminyo di media sosial X, Kamis (29/1/2026).
Labiah dari sekedar dukuangan akademik, Syekh Al-Azhar malatakkan Yelly sabagai simbol pantiang dari paran padusi Muslim dalam paradaban.
“Syekh Al-Azhar manakankan baso Yelly adolah panutan nan dibanggakan bagi Muslimah, nan bisa maagiah kontribusi untuk kamajuan masyarakaik malalui sains jo pangatahuan,” tulis parnyataan resmi Al-Azhar.
Al-Azhar baharok baso lulusan sarupo Yelly dapek manjadi alumni model nan manyebarkan pasan moderasi di universitas Islam tatuo di dunia, nan didirikan pado abaik ka-10, ka nagari asanyo jo saluruah dunia.
Dek Yelly, basobok jo Syekh Al-Azhar adolah puncak dari doa panjangnyo salamo ko. Kato Yelly, inyo sanang bana dapek basobok jo guru gadang Al-Azhar tu sacaro pribadi, suatu kainginan nan nyo simpan sajak awal pandidikannyo di Kairo.
Kato Yelly salamo ampek tahun ko nyo alun babaliak ka Indonesia karano akan kuliah S2. Kaputusan tu bukan tanpa taragak, tapi dipiliah jo kasadaran panuah.
Inyo manakankan baso cintonyo kapado Al-Quran alah melekat pado dirinyo sajak ketek, manjadi motivasi utamo untuak mamiliah jurusan Balaghah jo fokus pado Ilmu Al-Quran.
Lahia pado 17 Maret 2003, di Balai Gurah Kabupaten Agam, Yelly sabalunnyo taun 2022, inyo manang dalam lomba tahfiz Al-Quran di Mesir, managakkan dirinyo sabagai mahasiswa nan manggabuangkan hafalan, pamahaman jo tata krama dalam satu angok pajuangan.
Pidato Yelly di podium wisuda tu bukan hanyo ucapan tarimo kasih sajo. Inyo manjadi kesaksian batin surang ulama. Jo aia mato nan indak tatahankan, Yelluy manyampaikan tarimo kasih kapado syekh-syekh jo dosen-dosen, kapado urang tuonyo di Indonesia, kapado kawan-kawan samo kuliah, jo kapado rakyaik Mesir nan manyambuik mahasiswa asing tu jo raso sayang.
Pidato tu bahkan diunggah lo di akun resmi Al-Azhar dan mandapek tanggapan nan luas karano kadalaman maknanyo, tantang kasabaran, qanaah, jo kayakinan baso jo susah payah pasti ado kamudahan. Intinyo, Yelly mengatokan jarak dari tanah air nan jauah tu sabananyo mandakekkan urang ka Allah kalau nyo ingin baraja ilmu Al Quran.
Co iko kiro-kiro, cuplikan pidato nak rang Balai Gurah ko:
“Namo ambo Yelly Putriyani, dan ambo maraso sanang dan bangga bisa tagak di hadapan dunsanak kasadonyo hari ko. Ambo bangga mawakili lulusan, tarutamo mahasiswa padusi dari lua nagari.”
Kami mangucapkan tarimo kasih kapado dunsanak kasadonyo ateh dukungan dan perhatiannyo kapado kami.
Partamo sakali, kami mangucapkan tarimo kasih nan sangaik dalam kapado syekh-syekh dan dosen-dosen nan terhormat nan alah maajakan ilmu jo adab, dan mananamkan raso cinto ka bahaso Arab, bahaso Al-Karim.
Mudah-mudahan Allah mambaleh sagalo kabaikan angku-angku ka kami jo pahalo nan paliang baiak dan maangkek status angku-angku di dunia jo akhiraik.
Ambo juo mamanfaatkan kesempatan nan baharago ko untuak mangucapkan tarimo kasih dan penghargaan nan sangaik tulus kapado urang tuo ambo nan tacinto di Indonesia.
Sasudah Allah, merekalah alasan ambo bisa sampai ka tingkek iko malalui doa, dorongan dan pengorbanan mereka.
Ambo masih takana hari partamo kami mangijakkan kaki di tanah Mesir nan barakaik ko, jo hati nan bacampua jo takuik dan harapan.
Kami datang mangaji di tanah Al-Azhar, mambao cito-cito gadang jo cito-cito mulia.
Dari hari nan sulik sampai saat-saat nan indah, awak baraja untuak basaba, qanaah, dan picayo bahaso jo susah pasti ado kemudahan. Samakin jauah kito dari tanah air, samakin taraso sanangnyo dakek jo Allah.
Kami indak akan lupo jo kawan-kawan mahasiswa, kawan-kawan dalam pajalanan ko, nan babagi maso-maso sulik, usaho, dan bahagia jo kami.
Sanak adolah dukungan dan penghiburan kami salamo kuliah di tanah nan jauah dari keluarga dan kampuang halaman.
Kami mangucapkan tarimo kasih tarutamo kapado dunsanak padusi Mesir nan mulia, nan alah sangaik mambantu kami dalam mamahami palajaran, mancerna materi, dan manguasoi seluk beluk bahaso.
Sanak adolah adiak-adiak padusi kami dalam mangaja ilimu, sumber katanangan katiko kami bakaliaran, dan camin nan mancaminkan kaindahan dan kemurahan hati urang Mesir.
Mudah-mudahan Allah mambaleh kabaikan angku-angku dan manjadikan cinto angku-angku ka kami ikhlas kapado-Nyo.
Kami barasa dari babagai nagari jo cito-cito nan samo: mandapekkan ilimu dari sumber di Universitas Al-Azhar.
Kito harokkan untuak babaliak ka tanah air masiang-masiang jo misi ilmu, cahayo dan bimbingan.
Nan tarakhia, kami mamintak kapado Allah supayo wisuda ko manjadi awal dari jalan baru untuak malayani agamo-Nyo, manyebarkan bahaso-Nyo, jo mamanuahi janji kami untuak manjadi pandukuang kabanaran, bapacik pado ilimu jo akhlak nan mulia.” (tan parpatiah dari situ Al Azhar)
