Pusa-pusa harimau adolah suatu carito rakyek yang manjadi pabincangan kini ko. Ado urang yang manyatoan carito ko hanyolah hayalan balako. Samantang pun baitu, ado pulo yang manyatoan bahaso carito ko indak hanyo hayalan balako, tapi dapek dibuktian kabanaranyo.
Harimau adolah hewan yang ditakuikan dek manusia karano dapek mambahayokan. Bahkan, dapek marangguik nyao manusia. Jarang ado manusia yang salamaik dari rajo hutan ko. Tapi indak samo jo urang yang punyo tigo pusa-pusa di kuduaknyo atau di salo-salo rambuiknyo. Biasonyo, urang yang punyo pusa-pusa harimau, tamasuak urang yang disagani dek kabanyakan urang dalam masyarakek.
Dulu, di sabuah kampuang ketek, di nagari Bayang Bagian Utara, tadapek laki bini. Nan laki-laki banamo Inyiak Datuak Alang Panjang dan bininyo banamo Gadiah. Lah lamo hiduik barumah tanggo nan awak alum juo baranak. Lah bacubo sagalo caro, lah bakicok sagalo macam ubek, tapi malang bak usaho sio-sio.
Sampai suatu katiko Datuak Alang Panjang ko bamimpi bahasonyo ka dapek sorang anak, tapi nan anak manjadi incaran rimau di hutan. Binguang dek mimpi, dibaritokanlah ka bini tantang mimpi nan malando. Salanjuiknyo, batanyolah bini Datuak Alang Panjang, yaitu Gadiah ka ahli mimpi di kampuangnyo tantang pakaro ko.
“Wahai ahli mimpi nan denai sanjuang, denai datang kamari karano sabuah pakaro. Laki denai bamimpi punyo sorang anak padusi, tapi nyatonyo denai alah 15 tahun barumah tanggo, alum juo baranak dan punyo katurunan. Tapi, denai agak binguang karano dalam mimpi laki denai, anak kami indak salamaik dan manjadi makanan dari saikua harimau yang taruih maikuik.”
Mandanga yang nyo sampaikan dek Gadiah, sang ahli mimpi bakato kapado Gadiah, “Dek alah lamo barumah tanggo, basanang hati lah karano sabanta lai ka manimang anak nan maniah di hati, sajuak di mato. Samantang pun baitu, adoh ciek nan sapatuik dikau tau. Nan gadih jalito puti samato kan jadi incaran dari saikua rimau yang dari dulu nak mamangso puti nan jalito buah hati dikau. Anak samato nan jalito ka banyak jadi budan-budanan urang nan jaek nan dak suko jo inyo pado puti dikau, anak nan babudi elok barupo rancak. Jadi, kalian sapatuiknyo hati-hati manjago puti nan samato ko,” kecek ahli mimpi kapado Gadiah.
Kamudian, pulanglah bini Alang Panjang ka rumah maagiah kaba ka laki tantang arati mimpi nan salamo ko. Dalam dado bacampua raso, karano anak nan dari dulu dinanti tanyato manjadi incaran harimau yang kueknyo dak sabandiang jo manusia.
Babarapo hari kamudian, hari nan ditunggu tibo. Gadiah manganduang. Tanyato sado yang dikecekan dek ahli mimpi tajadi. Dalam hati, mananti lai sang puti samato. Katiko dalam kanduangan banyak pakaro nan tajadi kapado Gadiah. Banyak urang nak babuek jaek ka Gadiah, tapi untuang Datuak Alang Panjang dak mambiaan bini dalam galok dan salalu basamo dalam suko maupun duko.
Meski satiok malam mandanga suaro rimau mangauang, satiok malam pulo Datuak Alang Panjang manjago bininyo manjalang sang buah hati mamijakkan kaki di muko bumi. Akhianyo hal yang salamo ko dinanti dan ditunggu pun tibo. Anak nan dinanti lai ka bumi bak ambun di pagi hari. Sang anak sajuak di mato dan babudi elok, disanangi di dalam nagari.
Anak dari Gadiah jo Datuak Alang Panjang nan rancak jalito banamo Puti Ayu nan samakin lamo samakin gadang dan makin lamo tambah rancak. Raso arok-arok cameh di dado dak namuah ilang, takuik Puti manjadi makanan harimau nan taruih mainca. Satiok malam Gadiah mancaliak rimau di balakang rumahnyo, tapi baiak Gadiah atau Datuak Alang Panjang dak pernah maninggaan Puti Ayu sorang. Puti ayu salalu dikawani dek ayah jo bundonyo.
Puti Ayu samakin lamo samakin gadang. Rambuik samakin taba. Nampaklah bedo Puti Ayu dari kawannyo. Di kuduak Puti Ayu ado pusaran yang babedo samo kawan-kawanyo yang hanyo punyo ciek pusaran. Puti Ayu punyo tigo pusaran di kuduaknyo. Katiko Puti Ayu ganok baumua 7 tahun, Puti Ayu nak marasoan sarupo kawannyo.
Baliau nak sikolah. Nak bamain jo kawan samo gadang, tapi nan ayah jo bundo dak pernah mambulihan karano takuik anaknyo ka jadi makanan harimau yang taruih manaruih mananti anak ko. Di hati Puti Ayu batanyo-tanyo tantang pakaro yang tajadi di dirinyo, manga kok inyo dak pernah dibuliahan main ka lua rumah, sikolah, atau main jo kawan-kawannyo. Manga kok kama inyo pai taruih dikawani dek ayah atau bundonyo. Dicubo batanyo ka ayah atau bundo, malang nan ka tibo, berang nan dapek.
Dek alah gadang, awak padusi dak buliah barek tangan, kok piriang kumuah cubo dicuci, kok halaman lah talampok dek sarok nan tabang dibaok angin dicobo disapu. Katiko manyapu, Puti Ayu dak dikawani dek ayah atau bundo. Ayah jo bundo lamak lalok dek litak dak nampak anak lapeh dari pangkuan.
Katiko Puti Ayu sadang lamak manyapu, taranga suaro harimau marauang dari baliak samak-samak. Karanonyo, Puti Ayu takajuik dan takuik, mambuek ayah jo bundo nan sadang lamak lalok tajago dan capek-capek mamaluak anak samato wayang yang alah katakuikan.
“Nak, capek masuak anak ka dalam rumah jo bundo!” Datuak Alang Panjang manyuruah Puti Ayu masuak ka rumah sahinggo Puti masuak.
Puti ayu masuak dikawani dek bundo, samantaro ayahnyo sadang bajuang manghadapi harimau ganas yang inginkan Puti Ayu. Dalam hati, Datuak Alang Panjang sabana cameh takuik anak samato nan disayang kanapo-napo. Dek mamikian anak nan taniayo, dicobo saketek-saketek malawan, padohal dalam hati sabana cameh takuik nyao tarancam.
Samantang pun baitu, alum sempat nak malawan harimau yang ado di muko, rimau langsuang pai maninggakan Datuak Alang Panjang. Datuak Alang Panjang binguang samo yang tajadi dan langsuang masuak ka dalam rumah mancaliak anak jo bini tacinto.
“Nak, lai elok-elok kan? Kan dak ado yang kanai do kan? Ayah takuik ado apo-apo ka dikau, Piak,” tanyo Datuak Alang Panjang ka Puti Ayu.
“Lai dak baa do, Yah, untuang ayah datang,” jawek Puti ka sang ayah.
“Ayah cameh samo yang tajadi. Ayah bajanji kan taruih manjago Puti walaupun nyao gantinyo”.
Datuak Alang Panjang mancaritoan apo yang tajadi ka Gadiah, bininyo. Gadiah sangaik binguang jo yang tajadi baa kok harimau tadi dak mamakan Ayah Puti, samantaro tadi Datuak Alang Panjang dak mambaok sanjato tajam dan Datuak Alang Panjang bukan pandeka silek.
Datuak Alang Panjang dak bisa manyuruakan apo yang tajadi kapado anaknyo, Puti Ayu. Karano Puti Ayu kini mulai gadang, dicaritoanlah apo sabananyo yang tajadi. Awalnyo Puti Ayu binguang, tapi mancubo memahami dirinyo yang memang istimewa dan babedo dari anak-anak lain. Bisuaknyo Datuak Alang Panjang bamimpi batamu baliak jo harimau yang mainca sang anak. Mimpi tu manjalehan bahaso harimau tu akan salalu manunggu sang anak dan ka salalu mainca sang anak. Datuak Alang Panjang sangaik cameh, takuik ado apo-apo pado sang anak.
Suatu katiko, Puti sadang duduak di muko rumah, tapi kini sorang nyo, dak ado yang mangawani. Kiroe dari tadi inyo lah diparatian dek harimau dari samak-samak di muko rumahnyo. Ayah jo Bundo Puti sandang mancibuakan dari balik jendela mancaliak kondisi sang anak. Dikaluakanlah dek Datuak Alang Panjang sanapan untuak diarahkan ka harimau. Dan bisuaknyo, harimau tadi masih ado di muko rumah karano nyo bamalam sahinggo mambuek Ayah jo Bundo Puti Ayu takuik. Meski takuik, Ayah Puti ayu, yaitu Datuak Alang Panjang, mancubo mambaraniakan diri malawan harimau yang dari dulu mainca sang anak samato wayang. Datuak Alang Panjang bagageh mancari sanapan untuak mambunuh harimau tadi.
Katiko ka mambunuah harimau tadi, harimau tu lari dan untuak ka sakian kali nyo dak jadi mambunuh rimau.
Puti Ayu acok baibo hati karano hiduik yang nyo alami. Puti Ayu acok maraso kalau inyo babedo jo urang-urang. Hari balalu, Puti Ayu samakin gadang, tambah rancak tambah maniah. Puti Ayu lah sapatuiknyo untuak manikah dan barumah tanggo. Samantang pun baitu, dari dulu hiduik jo urang tuo dak pernah tau jo laki-laki, dak manggarati arti rumah tanggo sahinggo Puti Ayu dijodohkan jo laki-laki pilihan Datuak Alang Panjang.
Rajo Mudo adolah laki-laki pilihan Datuak Alang Panjang jo Gadiah yang diharokkan dapek manggantian posisi Ayah jo Bundo Puti Ayu yang salalu manjago Puti Ayu. Rajo Mudo lah lamo tau jo Datuak Alang Panjang dan alah lamo dakek untuak manjalin hubungan badunsanak.
Hari balalu, Puti Ayu dan Rajo Mudo jadi laki jo bini yang mambuek rumah tanggo baru. Kini posisi ayah yang biasoe manjago Puti Ayu digantian jo Rajo Mudo itu karano Datuak Alang Panjang jo Gadiah alah mulai gaek.
Datuak Alang panjang lah mancaritoan yang tajadi jo anaknyo Puti Ayu kapado Rajo Mudo. Sasudah lamo manikah, Rajo Mudo bamimpi batamu hariamau. Mimpinyo samo jo mimpi yang malando mintuonyo, Datuak Alang Panjang. Rajo Mudo takuik anaknyo jadi bulan-bulanan bantuak bininyo, Puti Ayu. Sadoe yang dialami Puti Ayu dulu dialami pulo oleh anaknyo. Sasudah anak Puti Ayu, lai anak tu taruih ditakuti dek harimau yang maincanyo.
Anak Puti Ayu jo Rajo Mudo diagiah namo Inur. Samo jo bundonyo, Inur anak yang rancak budi jo ruponyo. Samakin lamo Inur samakin gadang. Samo jo bundonyo, Inur pun babedo jo urang biasonyo yang punyo tigo pusa di kuduaknyo. Karano Inur makin lamo makin gadang, Puti Ayu maagiah tau apo yang tajadi kapado Inur buliah Inur mangarati.
Suatu katiko Inur jo Puti Ayu sadang mambarasiahan halaman rumah dari sarok yang diambuih angin. Tapi dak ado yang mangawani, baiak amak gaek atau ayah gaek Inur, dak ado yang mangawani. Inur manyapu samo bundonyo, Puti Ayu. Katiko sadang lamak manyapu, Puti Ayu takajuik mandanga anak nan disayang sadang malawan harimau yang dari dulu mainca baduo baranak.
“Bundo, tolong denai, denai takuik, Bundo!” kato Inur yang mamakiak katakuikan.
Puti Ayu sangaik cameh dan capek mancaliak apo yang tajadi pado anak samato nan paliang disayang. Sambia mintak tolong, Puti Ayu taruih mancubo maaliahan paratian harimau dari anak nan disayang. Dak ado urang yang tibo manolong sahinggo Puti Ayu mati dicabiak-cabiak dek harimau ganas.
Inur Nampak bana kajadian itu. Inur cameh. Sudah itu, inyo kanai pulo. Inur ibo maliek bundonyo yang alah badarah-darah, tapi tibo-tibo datang Datuak Alang Panjang jo Rajo Mudo manyalamaikan. Nyo tembak harimau tu jo sanapan sahinggo malancin darah harimau tadi. Untuang harimau tadi alum sempat mamakan inur. Sajak itu harimau yang alah mati tadi dak pernah muncul.
Suatu katiko Datuak Alang Panjang sakik parah dan akhianyo maningga. Sabalum maningga, inyo bajanjanji akan taruih malindungi anak cucunyo yang punyo pusa-pusa labiah dari ciek di kuduaknyo, tapi Datuak Alang Panjang juo barupo sarupo harimau. Tapi tidak untuak mamakan atau manyakiti anak cucunyo, malainkan untuak malindungi dan manjago anak cucunyo dari urang jaek.
