Gadih ketek malenggang manjujuang dandang barisi samba lauak jo gulai tunjang nan ka dijua dalam balai. Rai, baitulah urang manyaponyo. Kulik kuniang lansek, badan ketek renceh, awak panggalak sanang urang mancaliaknyo.
Sajak ketek Rai lah tabiaso manjujuang dandang, manjinjiang rantang, bajalan dari rumah sampai ka balai satiok hari Salasa guno manolong uninyo manggaleh. Dek lah biaso jo urang di balai, banyak nan maminta Rai ka jadi bininyo. Mulai dari nan manggaleh kain sampai ka toke kambiang, tapi Rai manulak, nyo alun ka balaki lai.
Walaupun umua lah tujuah baleh, tapi Rai alun bapangana nak balaki, sabab Rai bacito-cito manjadi guru. Namun apo dayo, sakola ndak tamaik SD, mambaco jo manulih alun pandai lah tapaso baranti sakola. Baitulah gadih jaman dulu, nan pantiang pandai ka dapua, sudah tu balaki lai. Rai batekaik anak-anaknyo nanti harus basikola, baapun caronyo.
Kahandak ndak balaku, Rai akhirnyo manikah. Balaki jo bujang gagah, polisi karajonyo. Tahun baganti lah sapuluah urang anaknyo. Kama pun anaknyo handak sakola, diusahokannyo. Gaji polisi ndak sabara, tapaso Rai bapandai-pandai mancari tambahan. Manjaik starimin, manjaik peci, sampai sakik mato jo kuduak, hanyo supayo anak-anaknyo tamaik sakola dan manjadi “urang”.
Sadolah perjuangan Rai pado akhirnyo babuah. Anak-anaknyo tamaik basikola , bahkan sabagian sarjana, bakarajo jo mambaleh guno ka urangtuo. Di maso tuo Rai manuai perjuangannyo salamo ko, maninggakan keturunan nan labiah elok hiduiknyo. Tanang jiwanyo sabalum pai.
