nan mangana: BUYA H. MASOED ABIDIN
BARNGSIAPA TIDAK BERANI MELAWAN KETIDAKADILAN, DIA AKAN BERADA DALAM PERBUDAKAN” … (Tan Malaka)
Kritik ka nan suko mangapik kepalo harimau. Kini sambuah bana anjiang panjilek bakaliaran hati hatilah (Tan Malaka Naar de republiek)
Ibrahim Datuk Tan Malaka adolah– BAPAK BANGSA nan dibuang dari buku. Beliau ko anak Nagari Suliki, Minangkabau. Gadang jo adat, tapi utak no malinteh dunia. Baliau lah nan partamo manggagas “Republik Indonesia” jauah sabalun 1945. Ide “Merdeka 100%” tu dari Tan Malaka.
Lalu baa lo kok sampai ano digolongkan “kuminih”?
Itu politik,. Kutiko ntun sia nan barani malawan Ulando, lalu barani malawan Soekarno juo, pasti diaagiah cap. Cap “kuminih”… Itu lah racun nan paliang manjur untuak mambunuah namo urang tanpa darah.
Padahal pikiran Tan Malaka jauh labiah dalam dari “kiri” jo “kanan”. Baliau mangatokan : “Materialisme, Idealisme, jo Tuhan tu harus basuo”… Beliau ndak pernah ‘manjua’ Tuhan, baliau barjuang jo Tuhan. Tetapi musuh takuik, kalau rakyat tau, ado urang Minang nan utak no setajam tu.
Suaro no, Tan Malaka ntun jauh labiah kisok sasudah di bawah tanah. Nah itu hikmah Allah.
Urang nan dijago di istana, suarono padam sasudah mati. Tapi urang nan dibuang ka bawah tanah, dipancang, dibaka bukuno… suarono malah basipongang sampai kini.
Takah biji padi – kalau ndak ditanam, indak diimpik tanah, indak dipijak… Indak akan tumbuah. Tan Malaka ditanam, diimpik, dipijak… makonosampai kini kito masih mandanga pasan baliaau ; “Barani lah malawan katidakadilan”.
Beliau para pejuang pendahulu, sajak Tuanku Imam Bonjol, dibuang karano beliau “barani berkato bana” kapado penguasa di zaman itu.
Kito kini, alun cukuik “barani bakato bana” kepado napasu surang di rumah surang. Padahal, itu alah menjadi jihad membangun generasi ameh.
Kalau sejarah resmi satangah hati mangakui baliu sebagai “Bapak Bangsa” mako kito nan jadi anak bangsa ko sajo lah nan maangkek jo maakui baliau. Itu, imungkin ziarah nan paliang barokah untuak arwah beliau.
Balik liak ka pikiran Tan Malaka ntun. Urang tuo awak saisuak utak “diasah” bukan “disuoki” … Dulu: Ketek-ketek lah mangaji, baraja di surau. Utak dilatiah maurai ayat, maurai adat, maurai falsafah. Baco Qur’an ntun bukan cuma lafaz, tapi “mengapa” jo “bagaimana”.
Makonyo lahialah Tan Malaka, Agoes Salim, Hamka, Hatta, Natsir, Inyiek Syekh Abdul Mu’in Lambah Sianok, Syekh Ibrahim Moesa Parabek, Syekh Abdullah Abbas Ladang Laweh, Syekh Sulaiman ArRasuly Canduang, Syekh Daud Rasyidi Balingka dan lainnyo.
Utakno tajam takah karih, tapi hati nyo lemah dan lembut takah kain biludu.
Kini lain lo, masih kaciak-kaciak lah jempolno nan sibuk. TikTok, Reels, Shorts.
15 detik = 1 ilmu. Utak jadi “scan” sajo, ndak “proses” lai nan bakarajo.
Anak anak maunyo hasia akhia, maunyo viral, maunyo sensasi. Maunyo instan, bagageh. Padahal Allah suruah kito “afala tatafakkarun” – handaknyo kito bapikia?
Dulu urang baraja “proses” dulu: mangaji surah Al-Fatihah satahun, baru paham “Bismillah” tu bara bana dalamno.
Kini anak maunyo HASIL AKHIR sajo tanpa tau capek, gigiah, guluikno urang tu macam mano.
Akibatnyo utak “malamah”. Dakek saketek jo masalah, langsung “bangih marabo” karano ndak biaso basaba, ndak biaso berproses.
Pepatah urang awak: “Alam takambang jadi guru”. Alam tu ndak ado nan instan. Padi masak 3 bulan, anak jadi manusia 20 tahun. Tapi TikTok mambuek kito lupo hukum alam tu.
Jadi salah anak-anak kah kini ?
Indak. Salah kito nan tuo-tuo juo. Lupo mandidik nan mudo-mudo.
Solusinyo bukan maramoeh HP mereka, tapi balikkan ka surau. Saketek-saketek. 10 minik sehari baco Qur’an jo anak, jo cucu. Tanyokan lah: “Nak, ayat ko kalau dipakai ka kehidupan kito macam mano?” Itu lah “maasah utak” versi baru.
Jadi takah Tan Malaka ntun: lalui proses. Wallahualam.
