Padang - Indak bisa didutoi baraso banyak sangaik rumah gadang di nagari-nagari kini lah bih parah kondisinyo, bahkan banyak nan lah ampia runtuah karano ndak talok dek anggota kaum merawat atau merehabilitasinyo.
Kondisi sajumlah Rumah Gadang mambuek khawatir Pemerintah Provinsi Sumatera Barat (Pemprov Sumatera Barat). Cuma sayangnyo barubsabateh khawatir sajo baru.
Kecek Wakia Gubernur Sumbar, Vasko Ruseimy, Rumah Gadang kini banyak dalam kondisi buruak, bahkan hampia runtuah. Kaadaan iko dianggap maancam palestarian sijarah jo jati diri Minangkabau nan sangaik malakek pado bangunan-bangunan adaik iko.
“Sabana banyak Rumah Gadang nan alah runtuah dan ampia hancua,” kecek Vasko.
Nyo manyabuik baso Rumah Gadang bukan hanyo bangunan fisik, tapi simbol sajarah jo kehebatan adaik Minangkabau nan mampunyoi nilai sajarah nan sangaik kuek.
Kini, kecek Wagub, Pemprov Sumbar sadang mampatimbangkan langkah konkrit maalokasikan anggaran restorasi sarato payuang hukum nan diparalukan.
“Jadi, baa caro awak maalokasikannyo, siapkan anggaran untuak awak mamiliah bara Rumah Gadang nan ka dipulihkan,” katonyo.
Vasko mamintak supayo sajumlah Rumah Gadang dipiliah jo dipiliah sabagai prioritas untuak pamelokan jo pamaliharoan.
Salanjuiknyo, Vasko manakankan pantiangnyo dukuangan dari Tim Anggaran Pamarintah Daerah (TAPD) dalam manyisiahkan dana khusus untuak pelestarian bangunan-bangunan basejarah ko.
“Mintak tolong beko, awak masuakkan, awak sisihkan bara anggaran nan ka awak mintak ka TAPD, sejarah tu penting,” katonyo.
Vasko manyoroti kabaradoan Rumah Gadang dimiliki masyarakaik di tingkek nagari nan mamacik kisah sajarah nan panjang. Keceknyo, satiok bangunan punyo carito masiang-masiang, mulai dari proses pambangunan sampai ka dinamika nan tajadi di maso lalu.
Namun, inyo manakankan baso usaho renovasi indak buliah baranti pado pabaikan fisik sajo. “Indak awak marenovasi sajo, tapi awak jadikan sejarah, ado carito di sinan,” katonyo.
Baliau ingin satiok Rumah Gadang nan dipulihkan juo dilengkapi jo narasi sejarah nan mampakuek nilai pandidikan bagi generasi mudo.
Sabana patuik didukuang pandapek jo gagasan Wagub ko dek rang banyak. (Tan parpatiah)
