Padang — Ndak tabedo ibo no ati atlet Bukittinggi nan lah mambayangkan ka tampil di arena olahraga multievent (banya cabang) Pekan Olahraga Provinsi (Porprov Sumbar) 2026, karano Pamarentah Kota Bukittinggi lah mambayangkan lo baraso ndak ado pitih untuak ka pambayia mangirim atlet ka Porprov ntun.
Eh? Baa mangko mantu bana duh?
Wartawan nan manyiasek ka Walikota Bukittinggi, Ramlan Nurmatias, mandapek kaba sahiah lo. Nyiak Wali mangatokan pakan nan lapeh, baraso ndak ado tacantum dalam Rencana Kerja Pemerintah Daerah (RKPD) partisipasi Bukittinggi dalam Porprov 2026. Itu aratino ndak ado disadiokan pitih untuk atlet Bukittinggi sato balago di Porprov 2026.
“Anggaran untuak Porprov ndak tasadio, karano ndak dianggarkan dalam RKPD 2026,” kecek Nyiak Wali ntun, hari Jumaaik (9/1/2026).
Tapi sungguahpun ban nantun, Ramlan mangatokan Pemko Bukittinggi tatap mandukuang penyelenggaraan Porprov ko. Tapi, kalau ndak ado pitih jo aa galanggang rami kaditampuah. Mako pangiriman atlet dari Bukittinggi ka ajang Porprov 2026 tantu ndak ka mungkin sen no duh.
Nampaknyo iko salah samek sen no goh, sabab sarupo nan dikatokan dek Ramlan mustino KONI Sumatera Barat labiah capek menyureki pamarentah daerah supayo tiok-tiok daerah dapek mancadangkan pitih untuak Porprov ntun.
Tapi baa kolah carito no Bukiktinggi ntun mangko ndak ado ntun batulihan dek tukang susun anggaran katiko rapek-rapek TAPD (Tim Anggaran Pemerintah Daerah) pitih ka untuak pai batandiang di Porprov ko. Padohal lah sabalik daerah tahu baraso ado alek Porprov tahun 2026.
Ganji lo tadanga no kalau Bukittinggi ndak sato Porprov. Sadangkan Mentawai sajo nan jauah di tangah lauik, lai bisa mangirim atlet. Bahkan Mentawai pun amuh lo manjadi tuan rumah untuak babarapo cabang olahraga Porprov 2026 ntun, kan santiang Mentawai duh.
Komitmen Mentawai untuak sato sakaki sabagai tuan rumah ntun disampaikan dek KONI Mentawai malalui surek bernomor 26/KSB-KONI/KEP-MTW/XII-2025 tertanggal 27 Desember 2025, ka Ketua Umum KONI Provinsi Sumatera Barat.
Dalam pengajuan ntun, Mentawai manyatokan kesiapan jadi penyelengara limo cabang olahraga, PSTI (Sepak Takraw), Pertina (Tinju), Perpani (Panahan), Kabaddi, jo Catur.
Ketua Umum KONI Sumatera Barat, Hamdanus, sanang bana jo sumangaik KONI Mentawai ko.
“Keterlibatan daerah sabagai tuan rumah akan mampakuaik penyelenggaraan Porprov. Konsep tuan rumah bersama memang dirancang untuak mandorong pemerataan penyelenggaraan jo partisipasi daerah,” kato Hamdanus.
Jadi, sasampik-sampik balai nan anak rajo lalu juo, kato pepatah Minagkabau. Pitih yo sayuik, tapi Kota Sawahlunto juo ndak amuah tempo di alek Porprov ko.
Walikota Riyanda Putra jo Ketua KONI Sawahlunto Jhon Reflitamanyampaikan dukuangan untuk Porprov. Sawahlunto sato sakaki, tapi tetap mampatimbangkan kondisi pitih daerah.
