Padang — Sajak galodo mahondoh tigo Provinsi (Aceh, Sumut jo Sumbar) PT, banyak jalan jo jambatan nan taban. Sahinggonyo untuak maangkuik minyak oto jo pabrik (BBM) jadi tahalang. Baitu juo penyaluran gas LPG nan diparalukan dek amak-amak untuak dapua, juo majadi bamasalah.
Di babaro daerah ado juo nan sempat putuih abih BBM jo gas ko mambuek masyarakakaik nan tatipo musibah ko kalimpasiangan. Tapi untuanglah sajalan jo dibueknyo jambatan-jambatan darurat dek pemerintah jo tantara, mako Pertamina juo bagerak capek mamulihkan fasilitas penyaluran energi di daerah-daerah nan kanai banjir jo galodo ko.
Kini kato, urang Pertamina, operasional lembaga penyalur baik BBM maupun LPG di sabagian gadang wilayah terdampak lah ampia 100 persen beres.
“Di Aceh, dari total 156 SPBU, sabanyak 151 di antaronyo lah elok liak, sadangkan sisonyo nan tigo persen tu masih tahambek lantaran jalan jo jembatan ka SPBU nyo masih lun salasai,” kecek Corporate Secretary PT Pertamina, Arya Dwi Paramita.
Tapi sungguah pun bak nantun, Pertamina memastikan baraso pasokan tatap aman dengan caro mampakuaik SPBU nan paliang dakek jo daerah nan SPBU nyo alun bisa jalan tu.
Baa untuak daerah Sumatera Barat? Kecek Arya ko, Sumatera Sumatera Barat jo Sumatera Utara lah aman kasadoalahe, ndak ado SPBU nan ndak bafungsi lai, seluruhnya lah beres. “Kami sampaikan juo baraso stok pun dalam posisi aman, jadi masyarakaik ndak usah cameh untuk stok BBM jo stok LPG,” kato Arya.
Di Sumatera Barat PT. Pertamina Patra Niaga lah mambuek strategi untuak mamastikan distribusi energi lancar diakhia tahun 2025 sarato di awal tahun 2026 ko. Kecek Executive General Manager Pertamina Patra Niaga Regional Sumbagut, Sunardi ka wartawan pakan ko, inyo menghadapi mamastikan katasadioan sarato kalancaran distribusi di Sumbar ko.
“Langkah ko ditampuah untuak maantsipasi lonjakan permintaan BBM, LPG sarato avtur (minyak kapatabang) nan biaso tajadi di pergantian tahun,” kecek Sunanrdi.
Salamo maso karajonyo Satgas Nataru ko Pertamina Patra Niaga siap manjago operasional dari ulu ka ilia. Jadi ndak sekedar ado stok sajo, juo tamasuak nan diparatian dek Pertamina tapi juo mamikiakan kelancaran distribusi sampai ka penyalur.
Pertamina juo bajago-jago untuk SPBU jo agen LPG di titiak-titiak nan bapotensi tajadi lonjakan permintaan. , Pertamina sato maatur distribusi supayo pasokan dapek ditarimo rato dek masyarakaik. “Koordinasi jo pamarentah daerah jo polisi dipakuaik untuak mamastikan distribusi bajalan aman lancar,” kati Nardi ko.
Sabalun akhia tahun konsumsi LPG rumah tangga di Sumatra Barat dipakirokan akan naiak sampai 2,7%, BBM gasoline (Pertalite jo Pertamax) naiak sakitar 1,6%. Sadangkan minyak kapatabang (avtur) naiak sampai 7,5% dek karano tingginyo aktivitas penerbangan. Samantaro tu Solar jo Biosolar turun sampai 3% dek bakurangnyo aktivitas logistik jo industri salamo libur panjang ko. (tan parpatiah)
