Solok – Aparat Direktorat Reserse Kriminal Khusus (Ditreskrimsus) Polda Sumatera Barat mambongka tampek panggolahan ameh ilegal di Kota Solok.
Ampek urang ditangkok polisi karano disangko manampuang, maolah, jo manjua ameh sarato perak tanpa mamiliki izin nan sah.
Pangungkapan ko manjadi tamparan karano mambuktikan bahasonyo kegiatan panggolahan ameh ilegal indak sajo tajadi di kawasan tambang, tapi alah marambah ka dalam wilayah perkotaan. Kegiatan nan dijalankan di sabuah rumah ko didugo indak mamiliki Izin Usaha Pertambangan (IUP), Izin Usaha Pertambangan Khusus (IUPK), Izin Pertambangan Rakyat (IPR), maupun izin lain nan diwajibkan undang-undang.
Panggerebekan dilakukan dek tim Subdit IV Ditreskrimsus Polda Sumbar pado Rabu (15/7/2026) sakitar pukua 15.30 WIB di sabuah rumah nan barado di Jalan Dr. Hamka, Kalurahan Kampai Tabu Karambia, Kacamatan Lubuk Sikarah, Koto Solok.
Direktur Reserse Kriminal Khusus Polda Sumbar Kombes Pol Andry Kurniawan manyabuikkan, ampek urang nan diamankan masing-masing barinisial ZP (52), RJP (36), JH (50), jo S (66).
“Urang-urang ko didugo kuat manampuang, mangolah, sampai manjua mineral barupo ameh jo perak tanpa mamiliki izin nan sah sasuai jo aturan nan balaku,” kato Andry pado Jumaik (17/7/2026).
Pengungkapan ko marupokan bagian dari komitmen Polda Sumbar untuak mamarangi sagalo pertambangan jo panggolahan mineral ilegal nan marugikan negara, di sampiang barpotensi mambao dampak buruak ka lingkungan lantaran mamakai bahan kimia dalam proses panggolahan logam mulia.
Dari lokasi panggerebekan, polisi manyita barang bukti nan cukuik banyak. Di antaronyo ameh sabarek 436,78 gram, ameh urai sabarek 11,72 gram, perak murni sabanyak 2 kilogram, sarato baragam alat panggolahan, mulai dari tabuang gas, tambikar, bahan kimia, sampai timbangan digital. Kasadoalahe barang bukti ko kini alah diamankan untuak kaparaluan penyidikan.
Kini, penyidik masih mandalami kasus ko untuak mancarii kamungkinan adonyo jaringan lain nan sato talibaik, baik dari sumber ameh nan diolah maupun jalur pamasaran hasil panggolahan ilegal tu.
Samantaro tu, Kabid Humas Polda Sumbar Kombes Pol Susmelawati Rosya mangimbau masyarakat supayo indak turut talibat ataupun mambantu kegiatan pertambangan jo panggolahan mineral tanpa izin.
“Kalau ado masyarakat nan mangatahui kegiatan tambang ataupun panggolahan ameh nan indak barizin, laporkanlah ka pihak kapolisian supayo bisa kami tindak lanjuti,” kato e.
Ampek urang nan ditangkok ko dijariek jo Pasal 161 Undang-Undang Nomor 3 Tahun 2020 tantang Parubahan atas Undang-Undang Nomor 4 Tahun 2009 tantang Pertambangan Mineral jo Batubara (Minerba). Ancaman hukumannyo indak main-main, bisa pinjaro paliang lamo limo tahun jo dando paliang banyak Rp100 miliar.
Urang tuo-tuo lah lamo bapitaruah, bahwa sumber daya alam nan dikaruniakan Allah ka ranah ko sabana untuak kamaslahatan basamo, bukan untuak dicari kauntuangan jo jalan nan malangga aturan. Dek sabab itu, pangungkapan praktik panggolahan ameh ilegal di Kota Solok ko diharapkan jadi pangajaran bagi siapo sajo, bahasonyo hukum akan tatap mangaja sagalo kegiatan nan marugikan nagari jo masyarakat. (Tan Parpatiah)
