Padang — Pemerintah Provinsi Sumatera Barat mamintak pemerintah kabupaten jo kota supayo aktif maninjau dan mangevaluasi kaadaan mutu udaro di daerah masing-masing. Hal ko dilakukan dek makin buruaknyo kabuik asok nan manyolimuti sabagian wilayah Sumatera Barat, tamasuak Kota Padang.
Manangguang kabuik asok nan makin taba, wacana manerapkan Work From Home (WFH) bagi Aparatur Sipil Negara (ASN) sampai kini alun diputuihkan sacaro khusus di luar jadwal nan alah ditatapkan.
“Nanti akan kito caliak. Mudah-mudahan indak tajadi,” kecek Gubernur Sumatera Barat Mahyeldi Ansharullah.
Mahyeldi manyobuikkan, Pemprov Sumbar alah mulai maambiak langkah capek untuak mangantisipasi kabuik asok nan makin taba. Evaluasi dilakukan manyusul ado babarapo daerah nan alah maambiak kabijakan maliburkan murid dek mutu udaro nan manurun.
Gubernur alah manugaskan Badan Penanggulangan Bencana Daerah (BPBD) Sumbar untuak manjalankan pamantauan jo evaluasi kaadaan udaro, tamasuak maukua sabarapo taba kabuik asok di babarapo wilayah.
“Ambo lah manugaskan Badan Penanggulangan Bencana Daerah untuak melakukan evaluasi, dan sudah tu mancaliak tingkek ketebalan asoknyo di Sumatera Barat,” kato Mahyeldi.
Daerah Dimintak Aktif Maninjau Kaadaan
Mahyeldi managaskan, langkah nan akan diambiak untuak mananggulangi dampak kabuik asok disarahkan pado pemerintah daerah sasuai jo kaadaan di wilayahnyo masing-masing.
Bupati jo wali kota dimintak jan pasif dalam mananggapi kaadaan. Pamantauan mutu udaro sarato dampaknyo tarhadap aktivitas masyarakat paralu dilakukan taruih-manaruih.
Mahyeldi manyoroti langkah babarapo daerah, di antaronyo Kabupaten Dharmasraya jo Sijunjung, nan alah maambiak kabijakan marumahkan murid sabagai upayo mangurangi risiko gangguan kaséhatan akibat tarpapar kabuik asok.
Salanjuiknyo, Pemprov Sumbar akan mangkaji langkah-langkah nan labiah stratagis barado pado hasil pamantauan BPBD, nan dilaksanakan malalui koordinasi jo pemerintah kabupaten jo kota.
Kiriman dari Daerah Tetangga
Dari pamantauan awal, kabuik asok nan manyelimuti sabagian wilayah Sumatera Barat diduga kuaiki barasa dari asok kiriman akibat kabakaran hutan jo lahan (karhutla) di provinsi tatangga.
Dek karano itu, manuruik Mahyeldi, upayo mamadamkan sumber titik api di daerah asal manjadi langkah nan penting untuak mancegah kabuik asok manyeba labiah laweh ka wilayah Sumatera Barat.
“Kni kan tajadi di provinsi tetangga wak. Tantu paralu ado ketegasan dan upaya-upaya labiah maksimal, sahinggo indak badampak ka daerah lain dan indak manggaduah aktivitas masyarakat,” keceknyo.
Samantaro tu, untuak mangantisipasi kamungkinan timbuanyo titiak api di wilayah Sumatera Barat, Dinas Kehutanan Sumbar taruih malakukan pamantauan.
Satiok potensi kabakaran hutan jo lahan di wilayah Sumbar diusahokan dapek ditanggulangi sabalun manjadi gadang, supayo indak bakambang manjadi kabakaran nan labiah laweh dan makin mamparuruak mutu udaro.
Pemprov Sumbar juo mamintak pemerintah kabupaten jo kota supayo taruih maningkekkan kawaspadaan, utamonyo dalam maninjau mutu udaro sarato kaadaan kaséhatan masyarakat.
Pamantauan jo koordinasi antardaerah akan taruih dilakukan sambia manunggu parkembangan kaadaan kabuik asok dalam babarapo ari ka muko.(Tan Parpatiah)
