Padang — Harimau Sumatera (Panthera tigris sumatrae) di Sumatera Barat kini makin marasai iduiknyo, konflik antaro inyiak balang ntun jo manusia kini samakin acok.
Sarupo nan dikaba an dek mongabay.co.id lun lamo ko, sajak awal Januari 2026 sajo lah tajadi babarapo kali konflik jo manusia. Kajadian nan paliang baru adolah kutiko ado inyiak balang ntun luko dek kanai parangkok kandiak di Pasaman.
Kajadian ko manambah daftar kasus-kasus sarupo sabalunnyo. Mangacu pado data dari Badan Konservasi Sumber Daya Alam Sumatera Barat (BKSDA), pado taun 2022, ado 33 kasus konflik manusia-harimau. Kudian, pado 2023 ado 34 kasus dan 21 kasus pado 2024.
Rizaldi, ahli primatologi, perilaku hewan jo biokonservasi di Universitas Andalas, mangatoan baso interaksi negatif antaro harimau jo manusia tajadi karano harimau masuak ka habitat manusia.
“Situasi alah manjadi babahayo karano manusia alah maatur jebakan. Samantaro itu, jangkauan jelajah harimau kadang-kadang maleba, kadang-kadang dipasampik,” katonyo.
Keceknyo, ado keyakinan di kalangan masyarakaik baso musim kawin harimau balangsuang sabalun Idul Adha. Iko harus manjadi indikasi awal baso salamo musim ko harimau jantan akan manjalajah daerah sakitarnyo untuak mancari harimau batino, nan bararti potensi untuak interaksi jo manusia maningkek.
“Ambo raso paningkekan interaksi ko takaik jo paningkekan populasi harimau. Namun, iko labiah banyak karano dipicu dek musim kawin, bukan karano jumlah individu alah maningkek,” katonyo. (Tan Parpatiah/mongabay)
