Bukittinggi – Baa kabano kasus korupsi Pasa Ateh Bukittinggi tahun 2020 sasudah tersangka YY ditangkok dek intel kejaksaan bulan Juli nan lapeh di Tangerang, Banten, nan “mailangkan diri” no sajak tahun 2023.
Katarangan nan didapek pers dari Kejaksaan Negeri Bukittinggi manyabuikkan, YY kini alah ditahan di Rutan Padang. Samantaro pakarono masih dalam tahap penyerahan ka penuntut umum.
“Yo, masih dalam proses persiapan penyerahan tersangka jo barang bukti untuak dilimpahkan ka Pengadilan Tipikor nan basidang di PN Padang,” kato Kajari Bukittinggi malalui Kasi Intel Dody Susistro kapado pers di Bukittinggi, ri Rabaa (30/9/26).
YY, manuruik penyidik kejaksaan, talibaik dalam panyalahgunoan biaya pangalolaan Pasa Ateh Bukittinggi Tahun Anggaran 2020. Indak itu sajo, ano juo dituduah manyalahgunokan dana Fasilitasi Pengelolaan Sarana Distribusi Perdagangan tahun 2021.
YY kutiko ditangkok dek Intel Kejaksaan di Tangerang Banten
“Tim Jaksa Penuntut Umum lah sampai di tahap II, sasudah berkas pakaro YY dinyatokan langkok atau P-21, sabalun pakaro dilimpahkan ka Pengadilan Tipikor,” katono.
Ka wartawan disabuikanno, soal status panahanan tersangka, baraso, sasudah proses Tahap II salasai, Kejari Bukittinggi manahan YY salamo 20 hari ka muko. YY dititipkan di Rutan Klas IIB Padang, dek sidang parkarono nantik dilaksanakan di Padang.
Salamo maso panahanan nan sampai 20 hari tu, para jaksa nan manjadi panuntuik umum akan manyamparonokan surek dakwaan jo manyusun barang bukti.
“Sudahntun dilimpahkan sacaro resmi ka Pengadilan Tipikor,” jano Dody.
Samantaro itu, didapek katarangan baraso manuruik audit BPKP Perwakilan Sumbar, akibat tindakan YY, nagara alah dirugikan sabanyak Rp413 juta. Karugian tu manjadi akibat dari parbuatan tersangka sacaro basamo-samo.
Jaksa, salain mamakai KUHP, juo mamakai UU Pambarantasan Korupsi untuak manjarek YY ko. YY dianggap lah malakukan tindak pidana sasuai dakwaan Pasal 603 jo Pasal 20 Huruf c Undang-Undang Nomor 1 Tahun 2023 tantang Kitab Undang-Undang Hukum Pidana (KUHP), jo Pasal 18 Undang-Undang Nomor 31 Tahun 1999 tantang Pambarantasan Tindak Pidana Korupsi, sabagaimano alah diubah jo ditambah jo UU Nomor 20 Tahun 2001. Sarato subsidair Pasal 3 jo Pasal 18 Undang-Undang Nomor 31 Tahun 1999 tantang Pambarantasan Tindak Pidana Korupsi, sabagaimano alah diubah jo UU Nomor 20 Tahun 2001, jo Pasal 20 Huruf c Undang-Undang Nomor 1 Tahun 2023 tantang KUHP.
Co a bana main no YY ko?
Pado bulan Juli 2026, Tim Intelijen Kejaksaan Agung Republik Indonesia malalui Satuan Tugas Intelijen Reformasi jo Inovasi (Satgas SIRI), basamo jo Kejaksaan Tinggi Sumatera Barat, barhasil manangkok YY nan alah manjadi buronan sajak tahun 2023 tu.
Dikutip dari Kompas.com edisi 6 Juli 2026, Kepala Seksi Penerangan Hukum Kejaksaan Tinggi Sumatera Barat, Budi Sastera, manyabuikkan bahwa tersangka ditangkok di Jalan Rawa Buntu Selatan, Kecamatan Serpong, Kota Tangerang Selatan, Provinsi Banten, pado Jumat (03/07/2026) sakitar pukua 13.50 WIB.
Manuruik Budi, kutiko ditangkok ntun, ano lai basikap kooperatif, sahinggono proses panangkokan tu mah lai aman sajo.
Jano Budi, manjalaskan, pakaro ntun asa mulono dari laporan masyarakaik nan kamudian ditindaklanjuti dek Kejaksaan Negeri Bukittinggi malalui proses panyalidikan jo panyidikan.
Dalam proses panyidikan, panyidik mamareso 44 urang saksi, mamintak katarangan ahli dari BPKP Perwakilan Sumatera Barat, sarato manyita jo maniliti 483 dokumen sabagai barang bukti. Badasarkan hasia panyidikan ntun lah, YY ngko ditatapkan sabagai tersangka pado 1 Agustus 2023. Tapi, sajak ntu bulo, ano cigin, mailang sen dari Bukiktinggi.
Panyidik manamukan ado dugaan panyimpangan dalam palaksanaan kontrak jasa kebersihan Pasa Ateh Bukittinggi.Di antarono barupo panyantuman tanago karajo fiktif dalam dokumen tagihan, katidaksasuain pambayaran iuran BPJS, pabedoan pambayaran upah tanago kabarsihan jo nilai nan ditagihkan kapado pamarentah daerah, sarato pamakaian dokumen pandukuang nan indak sasuai jo kondisi sabananyo. (Tan Parpatiah)
