Dek Acok Manggaduah, 50 Pareman Padang Dicokok Polisi

Padang — Untuak mambuek suasana bulan Ramadhan ko menjadi nyaman, ndak ado lai urang-urang bagak atau pareman nan manggaduak ketanangan masyarakat, mako Polisi Kota Padang maadokan razia pareman di kota ko.
Hasianyo, tu mah labiah kurang 50 urang paramen tatangkok dan diangkuik dek polisi ke Markas Polresta Padang. Operasi marazia pareman ko dipimpin langsuang dek Kapalo Satuan Reserse Kriminal Komisaris Polisi M Yasin basarato tim nan paliang dikauti dek panjahek di Padang yaitu Tim Kelewang.
Tim razia ko mengonsentrasikan operasinyo di daerah-daerah pasa. “Supayo urang di pasa nyaman, nan manggaleh sanang dan babaklanjo nyaman pulo,” kato Kompol M Yasin, hari Akaik patang ko sasudah operasi ntun.
Tim ko menyigi tiok suduik pasa, asa nampak ado nan mancurigakan sebagai pareman, langssung dicokok dan dibao ka Mapolresta. Asianyo, kecek Yasin, labiah dari 50 pelaku nan dicurigai kareh sebagai pelaku premanisme ditangkok dan dibaok ka Mapolresta.
Apo sajo nan dikarajoan dek pareman-pareman tu? Macam-macam, mulai dari parkir lia, pangemen lia, sampai nan tukang pangua sopir angkot jo tukang cacak bagai.
“Untuak samantaro kami sadang mangumpuakan data, tapi kalau hasil pamariksaan nanti mambarikan bukti nan cukuik untuak suatu tindakan pidana, kami akan mamprosesnyo sasuai jo hukum,” tegasnyo.
Inyo manjalehan baso polisi malakukan kagiatan ko sangajo untuak manjago kaamanan jo katartiban umum, tarutamo manjalang Ramadhan 2026.
Pasar Padang Raya marupokan salah satu paa nan rami di Ibukota Provinsi Sumbar nan harus bebas dari sagalo premanisme, sahinggo padagang jo pambali maraso aman.
“Polisi Padang indak akan maagiah tolerasi bagai kapado tindakan premanisme atau retribusi haram nan manggaduah masyarakaik, kami pasti akan maambiak tindakan ka pelakunyo,” katonyo.
Keceknyo, tindakan nan dilakukan tadi sanjo juo marupokan peringatan kareh dari polisi kapado pelaku premanisme atau retribusi haram.
“Iko balaku indak hanyo untuak daerah Pasar Raya Padang, tapi juo spot-spot sibuk lainnyo sarupo tukang takjil, musajik, ruang sumbayang, dan lain-lain,” katonyo. (tan parpatiah/ant)