Padang — Dalam mambangun daerah Sumatera Barat ka maso nan datang ndak bisa indak untuak mamparatian daya dukuang jo daya tampuang lingkungan hiduik.
Pambangunan indak buliah malampaui kamampuan alam, sabab kondisi lingkungan nan indak tajago dapek maningkekkan risiko bencana.
Mantun kato Gubernur Mahyeldi Ansharullah kutiko Rapek Koordinasi Teknis Tata Lingkungan Tahun 2026 di Universitas Andalas, Padang, ahri Kamih (20/8/2026).
Rapek nan mangangkek tema “Tata Lingkungan Barbasis Daya Dukuang jo Daya Tampuang Lingkungan Hidup Pascabencana Hidrometeorologis” tu dihadiri pulo dek Wakil Menteri Lingkungan Hidup sekaligus Wakil Kepala Badan Pengendalian Lingkungan Hidup Diaz Faisal Malik Hendropriyono, Deputi Bidang Tata Lingkungan dan Sumber Daya Alam Berkelanjutan Sigit Reliantoro, Rektor Unand Efa Yonnedi, sarato jajaran pemerintah daerah, akademisi jo mahasiswa.
Mahyeldi manyabuik, baragam bencana nan tajadi di Sumatera Barat nusti manjadi bahan evaluasi dalam manantukan arah pambangunan daerah.
Manuruiknyo, pemerintah indak cukuik hanyo mahetong bara gadang karugian akibat bencana, tapi juo musti manikiakan apo palajaran nan bisa diambiak dari bencana nan lalu.
“Bencana alah maagiah palajaran nan sangaik maha ka awak. Karano tu, awak indak buliah hanyo batanyo bara gadang karusakan akibat bencana, tapi juo musti batanyo apo pakajaran nan waknpadapek dari bencana tu,” kecek Mahyeldi.
Inyo manyabuik, gampo bumi, banjir, longsor, galodo jo baragam bencana hidrometeorologis nan lain alah maagiah dampak nan gadang ka masyarakat Sumatera Barat.
Data nan disampaian dalam kegiatan itu mancatat, bencana hidrometeorologis alah badampak ka labiah dari 296 ribu jiwa, 264 urang maningga dunia, dan labiah dari 10 ribu warga tapaso mangungsi. Sementara itu, nilai karusakan jo karugian ditaksir mancapai Rp33,3 triliun, sadangkan kebutuhan rehabilitasi jo rekonstruksi nan diusulkan mancapai Rp21,4 triliun.
Mahyeldi manyabuik, ancaman alam memang indak sadonyo dapek dikendalikan. Namun, risiko bencana masih dapek dikurangi malalui panataan ruang nan tapek, manjago ekosistem, manjago daerah aliran sungai (DAS), sarato mambuek kabijakan pambangunan nan mamparetonhkan kamampuan lingkungan.
“Karano itu, proses pamulihan pascabencana, musti mamakai prinsip Build Back Better. Aratinyo, mambangun baliak indak sakadar mangumbalikan kondisi sabalun bencana, tapi juo mambuek kondisi nan labiah aman jo labiah tahan manghadapi bencana sasudah bencana.
Mahyeldi manyabuik, Pemerintah Provinsi Sumatera Barat juo alah malakukan evaluasi terhadap babarapo kabijakan lingkungan jo tata ruang, di antaronyo Peraturan Daerah Nomor 2 Tahun 2020 tentang Rencana Perlindungan dan Pengelolaan Lingkungan Hidup (RPPLH), Kajian Lingkungan Hidup Strategis (KLHS) RTRW Provinsi, sarato jo RTRW Provinsi Sumatera Barat.
Evaluasi tu dilakukan untuak mampakuaik kabijakan lingkungan, sekaligus mamastikan pambangunan jo pamakaian ruang makin salaras jo daya dukuang dan daya tampuang lingkungan hiduik.
Mahyeldi manegaskan, Daya Dukuang dan Daya Tampuang Lingkungan Hidup (D3TLH) indak buliah hanyo manjadi dokumen administratif.
Pemerintah Provinsi Sumatera Barat alah manetapkan Keputusan Gubernur Sumatera Barat Nomor 660-314-2025 tentang Penetapan D3TLH Provinsi Sumatera Barat. Dokumen tu diharapkan manjadi salah satu dasar dalam manyusun dokumen parancanaan pambangunan jo tata ruang.
“Alurnyo harus jaleh, daya dukuang jo daya tampuang lingkungan hiduik, parancanaan, tata ruang, pamakaian ruang, sampai ka kaputusan pambangunan. ikolah nan kami mukasuik jo mambangun dalam bateh ekologis,” kato Mahyeldi.
Urusan sarok
Di sampiang masalah tata ruang jo bencana, Mahyeldi juo manyoroti masalah sarok. Manuruiknyo, pangurusan sarok musti dimulai dari sumbernyo.
Pemprov Sumbar, kato inyo, alah manarapkan kabijakan supayo organisasi perangkat daerah (OPD) jo sikola nan barado di bawah kewenangan pemerintah provinsi indak lai mambuang sarok ka lua lingkungan masing-masing.
Kantua-kantua pemerintah provinsi juo didorong mambangun kabiasaan peduli lingkungan, di antaronyo malalui kegiatan barasiah-barasiah lingkungan sabalun mamulai aktivitas.
Samantaro tu, Wakil Menteri Lingkungan Hidup Diaz Faisal Malik Hendropriyono mangatokan, masalah sarok musti diuruih sacaro manyaluruh, dari hulu sampai ka hilia.
Pemerintah, kato Diaz, sadang mendorong baragam solusi pangurusan sarok, tanasuak malalui teknologi waste-to-energy dan Refuse Derived Fuel (RDF).
Untuak daerah nan mahasiskab sarok di bawah 1.000 ton sabulana, RDF dinilai dapek manjadi salah satu pilihan, jo mamanfaatkan sarok sabagai bahan bakar industri semen.
Namun, Diaz maingekan paralu mamilah sarok sajak dari sumber. Teknologi pangolahan sarok di hilia indak akan barjalan optimal kalau sampah nan masuak masih tacampua.
Inyo juo maingekan pentingnyo mambantuak praktik open dumping, mamparkuaik tangguang jawab produsen malalui Extended Producer Responsibility (EPR), sarato maningkekkan perhatian ka pangurusan sarok dalam penilaian PROPER jo Adipura.
Kesatuan Ekologis
Mahyeldi manambahkan, pangurusan lingkuangan di Sumatera Barat musti dilakukan sacaro tapadu, sabab wilayah Sumbar merupakan satu kesatuan ekologis.
Manuruiknyo, masalah lingkungan indak mambatasi diri dek bateh administrasi. Karano itu, pangurusan kawasan hulu, tangah, sampai hilia musti dilakukan basamo jo sacaro tapadu.
“Hutan, DAS, mangrove, gambut jo kawasan lindung indaklah panghalang pambangunan, tapi marupakan infrastruktur alam nan manopang kalanjutan pambangunan,” keceknyo.
Mahyeldi maajak pemerintah pusat jo daerah, perguruan tinggi, dunia usaho, masyarakat, sampai generasi mudo untuak samo-samo ambiak bagian dalam manjago lingkungan.
“Kito indak ingin mamiliah antaro pambangunan jo lingkungan. Kito ingin pambangunan nan tumbuah karano lingkungan dijago, dan lingkungan nan tatagak karano pambangunan dilakukan jo bana,” katonyo. (Tan Parpatiah)
