Padang — Dewan Energi Nasional (DEN) mancaliak Sumatera Barat punyo potensi nan gadang dalam pengembangan energi, tarutamo energi baru dan tarbarukan (EBT). Dek itu, DEN mambari pandampingan kapado Pemerintah Provinsi Sumatera Barat dalam implementasi jo revisi Rencana Umum Energi Daerah (RUED), supayo dokumen parencanaan energi daerah itu dapek manjadi instrumen nan efektif dalam manantukan arah pembangunan sarato kabutuhan energi di daerah.
Anggota DEN Satya Widya Yudha, kutiko basobok jo Gubernur Sumatera Barat Mahyeldi Ansharullah, Jumaik patang (28/8/2026), mangatokan kunjungan tim DEN ka Sumbar untuak mambicarokan baragam agenda strategis di bidang energi.
Satya mangatokan, DEN mandorong pangokohan koordinasi jo pemerintah daerah dalam manjalankan amanat Undang-Undang Nomor 30 Tahun 2007 tentang Energi, PP Nomor 40 Tahun 2025 tentang Kebijakan Energi Nasional, sarato Perpres Nomor 73 Tahun 2023.
Salah satu nan manjadi perhatian DEN adolah implementasi jo revisi RUED Sumatera Barat. “Panugasan kito mangarajokan itu. Karano iko alah ditunggu dek Presiden,” kecek Satya.
Salain parencanaan energi daerah, Satya juo manyabuik DEN kini sadang mangkaji baragam agenda nasional, tamasuak panataan kabijakan subsidi energi.
Manuruiknyo, subsidi BBM, LPG, jo listrik paralu taruih diarahkan supayo makin tapek sasaran, sambia tatap mamparhatikan kamampuan masyarakat.
“Subsidi tu ado pado babarapo komoditas, ado subsidi BBM, LPG, jo listrik. Kuncinyo ado di sinan,” keceknyo.
Satya manambahkan, satiok kabijakan panyasuaian harago energi tatap paralu mamparhatikan kondisi masyarakat. Dek itu, dukungan atau bantalan fiskal diparalukan supayo parubahan harago energi indak manimbuakan baban nan barek bagi masyarakat, terutama kalau tajadi parubahan harago di pasa.
Sumbar Siap Kembangkan EBT
Gayung basambuik, kato bajawek, Gubernur Sumatera Barat Mahyeldi Ansharullah langsung manyatokan kasiapan Sumbar untuak mangoptimalkan potensi energi baru jo tarbarukan sebagai bagian dari upayo mamparkuaik katahanan energi nasional.
Indak hanyo itu, pengembangan EBT di Sumbar diharapkan juo dapek mandorong partumbuhan ekonomi dan maningkatkan kasajahteraan masyarakat.
Mahyeldi mangatokan, Sumatera Barat punyo potensi energi tarbarukan nan gadang dan taseba di baragam daerah. Potensi itu antaro lain paneh bumi, tanago aia, tanago matohari, paneh permukaan lauik, sampai energi gelombang lauik.
“Sumatera Barat punyo potensi energi nan sangat gadang. Iko musti kito optimalkan untuak mandukung katahanan energi nasional, sakaligus maningkatkan partumbuhan ekonomi daerah,” kato Mahyeldi.
Manuruiknyo, paneh bumi manjadi salah satu potensi unggulan Sumbar, jo kapasitas nan diparkirokan mancapai sakitar 2.000 megawatt.
Untuak mangoptimalkan potensi tersebut, dibutuhkan dukungan infrastruktur energi, kapastian kabijakan, sarato karajo samo antaro pemerintah pusat, pemerintah daerah, dan dunia usaha.
Mahyeldi juo manyabuik kawasan strategis sarupo Teluk Tapang dapek dikambangkan untuak mandukung pembangunan infrastruktur dan konektivitas energi.
Dek itu, Pemerintah Provinsi Sumatera Barat taruih mambukak ruang sinergi jo pemerintah pusat supayo potensi energi nan dimiliki daerah dapek dikambangkan sacaro optimal dan mambari nilai tambah bagi masyarakat.
“Kito ingin pembangunan energi di Sumatera Barat indak hanyo mamanuhi kabutuhan energi, tetapi juo mambari dampak pado partumbuhan ekonomi dan kasajahteraan masyarakat,” keceknyo.
Saarah jo itu, Pemprov Sumbar juo alah marancang konsep “Green Province” sebagai arah pembangunan daerah nan mautamokan pamakaian energi nan ramah lingkungan, pembangunan bar-kalanjutan, sarato pangalolaan sumber daya alam nan tatap mamparhatikan kualitas lingkungan dan kesehatan masyarakat.
Kato Mahyeldi, konsep tu alah dipresentasikan ka Bappenas jo DEN sebagai bagian dari upayo manyalaraskan arah pembangunan Sumbar jo kabijakan pembangunan nasional.
Pengembangan energi tarbarukan, kato inyo, diharapkan indak bajalan surang, tetapi tarintegrasi jo sektor strategis lainnyo, tarutamo katahanan pangan jo pangokohan ekonomi daerah.
Nasib PLTS Terapung Danau Singkarak
Di balik semangat mangambangkan energi tarbarukan itu, rencana pembangunan Pembangkit Listrik Tenaga Surya (PLTS) terapung di Danau Singkarak masih manimbulkan pro dan kontra di tangah masyarakat.
Rencana mamhampakan panel surya di permukaan Danau Singkarak untuak mandukung kabutuhan EBT di Sumatera Barat mandapek sorotan dari masyarakat sekitar.
Sabagian masyarakat manulak rencana tu dek khawatir pembangunan PLTS terapung akan manggangu biota danau sarato mangancam mato pancaharian nelayan.
Kahawatiran itu juo indak dapek dipisahkan dari pengalaman masa lalu masyarakat katiko pembangunan PLTA Singkarak.
Dikutip dari Mongabay.co.id, Prof. Ardinis Arbain, pakar lingkungan hidup Universitas Andalas nan juo manjadi Ketua Audit PLTA Singkarak tahun 2015, mangakui pembangunan terowongan PLTA alah mambari kontribusi terhadap masalah lingkungan di sakitar kawasan tersebut.
“Banyak sumber aia nan hilang dek terowongan nan dibuek dari Singkarak ka Lubuk Alung tu,” kato Ardinis.
Inyo manarangkan, dari hasil pemetaan nan dilakukannyo, ado aia nan kaluar dari jalur dan masuak ka dalam terowongan. Akibatnyo, sabagian lahan pertanian kakurangan aia dan masyarakat manuntuik ganti rugi ka pihak pangalola PLTA.
“Dindiang terowongan juo indak rapek bana, sahinggo aia manyusup turun. Tandonyo ado anak sungai di ateh, namonyo Sungai Bong. Banyak sawah nan indak bisa dipakai lai dek indak ado aia,” jelasnyo.
PLTS Singkarak, Antaro Kahawatiran jo Hasil Panalitian
Pengalaman masa lalu itulah nan manjadi salah satu alasan masyarakat barhati-hati, bahkan resisten, terhadap rencana pembangunan PLTS terapung di Danau Singkarak.
“Dek dahulu juo baitu. Dibilang indak ado dampaknyo, tapi nan tajadi malah indak baitu,” keceknyo.
Ardinis manilai, dari sisi biologi, pembangunan PLTS terapung dalam skala gadang di Danau Singkarak paralu dikaji sacaro mandalam. Panel surya nan dipasang dalam jumlah gadang dikhawatirkan dapek manggangu kehidupan biota danau, tamasuak ikan-ikan nan manjadi sumber panghidupan masyarakat.
“Jan sampai kito tatarik jo istilah energi tarbarukan. PLTS jo PLTA memang energi tarbarukan, tapi baa skalanyo? Baa kalanjutan usaho masyarakat? Itu juo nan musti dipikirkan, jan asal capek,” kato akademisi biologi itu.
Sabalumnyo, pemerintah melalui PLN memang alah marancanakan pembangunan PLTS terapung di Danau Singkarak. PLN bahkan alah mancapi kasapakatan jo investor asal Arab Saudi jo nilai investasi nan kabanyo mancapai Rp50 triliun.
Panalitian UNAND Mambari Pandangan Beda
Namun, pandangan lain datang dari tim peneliti Universitas Andalas (UNAND) nan basamo University of Melbourne, Australia, mancari potensi Danau Singkarak sebagai lokasi pengembangan PLTS terapung.
Dikutip dari situs resmi UNAND, hasil penelitian tersebut dipaparkan dalam International Conference on Energy and Environment (ICOEE) nan disalanggara pado 30–31 Juli 2026.
Panalitian itu manjadi salah satu kontribusi ilmiah dalam mandukung pengembangan energi tarbarukan, sakaligus manjadi bagian dari upayo transisi energi nasional.
Panalitian malibatkan Ridwan, ST, MT, dosen Teknik Lingkungan UNAND, basamo baragiah peneliti dari University of Melbourne.
Tim mankaji kasasuaian kualitas aia Danau Singkarak sebagai lokasi pembangunan PLTS terapung, sambia tatap mamparhatikan aspek lingkungan.
Hasil penelitian manunjukkan kualitas aia Danau Singkarak punyo karakteristik nan dinilai mendukung pengembangan PLTS terapung dalam ukuran gadang.
Badasarkan sintesis data sekunder periode 2022–2025 nan diparoleh dari Dinas Lingkungan Hidup kabupaten terkait sarato Kementerian Lingkungan Hidup Republik Indonesia, kondisi fisik dan kimia perairan dinilai dapat mendukung efisiensi operasional sistem PLTS dalam jangka panjang.
Salah satu temuan utama adolah suhu permukaan aia nan relatif stabil, barado pado kisaran 25,9 sampai 29 derajat Celsius.
Kondisi ko maagiah efek pendinginan alami bagi modul surya, sahinggo suhu operasional panel tatap rendah. Sacaro teknis, efek pendinginan alami itu barpotensi maningkatkan produksi listrik labiah dari 10 persen dibandingkan PLTS nan dipasang di daratan.
Salain itu, parameter kimia aia juo manunjukkan kondisi nan dinilai baik. Nilai pH barado pado kisaran 7,92 sampai 8,45, sementara kadar Dissolved Oxygen (DO) mamanuhi Baku Mutu Air Kelas II sesuai jo PP Nomor 22 Tahun 2021.
Kondisi KO dinilai dapek mandukung katahanan struktur terapung terhadap korosi, sakaligus manjago kasaimbangan ekosistem perairan.
Manuruik Ridwan, ST, MT, hasil analisis tu maagiah gambaran awal nan positif terhadap prospek pengembangan PLTS terapung di Sumatera Barat.
Namun, tim peneliti masih akan malakukan pangukuran langsung ka lapangan sebagai bagian dari validasi ilmiah. Langkah itu diparalukan untuak memastikan kondisi terkini dan mandapek data nan labiah lengkap.
Di sisi lain, penelitian juo manemukan beberapa aspek lingkungan nan paralu mandapek perhatian. Salah satunyo adolah tingginyo konsentrasi Total Fosfat di kawasan inlet Batang Lembang nan mancapai 0,095 mg/L, malampaui baku mutu 0,03 mg/L.
Kondisi ko barpotensi mamicu biofouling, yaitu panempelan organisme pado struktur terapung nan dapek manggangu kinerja mekanis maupun efisiensi operasional sistem.
Temuan itu manjadi bahan penting dalam manyusun strategi mitigasi, supayo pembangunan PLTS terapung di Danau Singkarak, apabila dilanjutkan, tatap sajalan jo upayo manjago dan malestarikan lingkungan danau.
Dengan demikian, rencana pengembangan energi tarbarukan di Sumatera Barat, khususnyo PLTS terapung Danau Singkarak, masih mamarlukan kajian nan komprehensif. Di satu sisi, ado dorongan untuak mamanuhi kabutuhan energi bersih dan mamparkuat katahanan energi. Di sisi lain, kepentingan masyarakat, mato pancaharian nelayan, dan kalestarian ekosistem Danau Singkarak juo indak buliah diabaikan. (Tan Parpatiah/dari barbagai sumber)
