Jikok di kampuang sampik jalan bakeh lalu, di rantau Rajab basuo Uwai Inun. Umua Uwai ko lah mandakek sanjo, tapi baliau tatap sihat. Walau sadarhana, rawik mungkonyo nampak bahagia. Garih-garih curia nampak di pipih Uwai nan lah karuik.
Sajak mudo Uwai Inun basuami urang siak. Junjungan liau tu jadi imam musajik. Uwai baranak duo urang. Nan tuo si Malati. Nan ketek Rais. Kaduo anak baliau ko sikola ugamo mangaji kitab kuniang.
Takalo Malati baumua duo puluah labiah. Banyak nan tibo ka Uwai Inun mintak jadi minantu. Ado nan toke talen, urang panggaleh. Ado pagawai juru tulih. Ado bapangkek gagah basaragam. Ado lo anak kayo kaum padagang. Ado pulo kamanakan toke rampah. Mareka ko tapuji dek urang banyak. Karano diliek pado lahia, barasil caro iduik.
Sungguah pun baitu, kasadonyo ditulak jo caro haluih dek Uwai. Kato Uwai ka urang nan tibo. “Malati inyo sikola baru. Alun tapikia dek inyo kini lai. Ancak rang mudo cari nan lain sajolah. Mananti bana, kami ndak bajanji.”
Saganok nan datang tadi baliak kanan. Tak dapek batulak ansua. Rapek paga bakeh lalu. Jo tampang ndak bisa masuak. Jo pitih ndak bisa diago. Apo lo kok katurunan dibanggakan, ndak laku di Uwai. Sandang sajolah tuah diri kalian surang-surang. Nan pintu lah tatuik mati. Kiro-kiro baitu mukasuiknyo.
Taradok diri si Malati, kok dicaliak rupo, yo agak beda dari nan banyak. Raso bidodari sasek ka bumi. Muko barasiah takah rambulan. Iduang dasun tungga. Dagu labah tagantuang. Mato lindok kumbang bataduah. Bibia asam sauleh. Pipih pauah dilayang. Pokoknyo buek di nagari tampek tingga, nampak bana tacilaknyo.
Pado suatu hari, datang anak mudo maagiah caramah bulan puaso. Ustad ko urang biaso sajo. Rupo wajah hanyo pas-pasan. Tingga manatap di kampuang sabalah, jadi garin sambia maaja anak-anak mangaji. Badan kuruih, takah malayang. Tapi pangajiannyo suai dek Uwai Inun.
Sudah sumbayang tarawiah, Uwai batanyo, dima baliau tingga. Dibari jawek ala kadarnyo, Uwai maucap tarimo kasih.
Duo hari sasudah rayo, tibolah utusan Uwai mintak ustad tu datang ka rumah. Ruponyo, Malati lah satuju pulo jo ungku mudo ko. Akianyo disapakati hari panikahan jo baralek.
Itulah nan dialami Rajab, nan pado tahun sabalunnyo, tak dibao singgah dek urang kampuang nan punyo anak gadih. Urang gaek di kampuang Rajab mancari kayo ka minantu. Makonyo nan pulang marantau sajo baliau jamu.
Barakek saba, tawakal pado Allah. Inyo puaso Sanayan Kamih, tahajud sarato duha. Akianyo Rajab dapek barlian di nagari urang.
Curito ko tajadi sabalun Japang masuak. Kutiko diulang Mak Uniang ka Malanca, sudah sumbayang subuah di Musajik Tawakal pagi tadi, Malanca tangango.
”Dalam ranuang saba tibo. Dalam saba labo datang. Baa? Lai masuak dalam pangana?” panciang Mak Uniang.
Sakatiko Malanca tapana. Kadicubo pulo marantau takah Rajab, hati layuah paruik badampuang.
Dapek Barlian
