Padang — Tanah liek di babagai daerah di Sumatera Barat dinilai cukuik gadang potensinyo untuak dikambangkan, indak hanyo sabagai bahan baku batu bata dan gerabah, tapi juo manjadi material seni kriya sarato produk industri kreatif nan punyo nilai ekonomi tinggi.
Kecek narasumber lokakarya seni kriya nan diadokan Taman Budaya Sumatera Barat, Wisnu Prastawa, kutiko manyampaikan materi kapado peserta di Gedung Kebudayaan Sumatera Barat, Padang, hari Sinayan patang ko (5/10), potemsi ko jan sampai sio=sio sajo.
Kecek Wisnu, potensi tanah liek di Sumatera Barat taseba di babagai wilayah, mulai dari kawasan panghasia tanah untuak batu bata sampai sentra gerabah nan punyo sajarah panjang. Di antaronyo Gerabah Galogandang di Luhak Nan Tuo, Tanah Datar, sarato Gerabah Nagari Andaleh di kawasan Luhak Limo Puluah Koto.
“Melimpahnyo potensi tanah liek di Sumatera Barat harus manginspirasi kito untuak bapikia kreatif dan imajinatif,” kecek Wisnu.
Inyo mangatokan, tanah liek salamo ko labiah banyak dipandang sabagai bahan baku komoditas primer, sarupo batu bata dan balango tradisional. Padahal, material tu dapek dikambangkan manjadi media seni sakaligus bahan baku produk kreatif, termasuk kriya keramik dan unsur arsitektur modern.
Dalam lokakarya tu, Wisnu mamaparkan hasia babarapo riset dan eksplorasi nan dilakukannyo salamo 2023 sampai 2026. Babarapo di antaronyo barupo penelitian tantang potensi tanah liek Agam sabagai bahan baku seni kerajinan keramik, eksplorasi karakteristik tanah di kawasan Luhak Limo Puluah Koto, sarato formulasi tanah Balango di Galogandang.
Manuruiknyo, masiang-masing sentra gerabah di Sumatera Barat punyo karakter dan kaunggulan surang-surang. Gerabah Nagari Andaleh, misalnyo, dinilai alah mangambangkan teknik finishing dan ornamentasi nan labiah baragam. Samantaro tu, Galogandang punyo karakter tanah dan teknik pambentukan nan khas.
“Baik Andaleh maupun Galogandang punyo kaunikan teknik pambentukan masing-masing nan kamudian malahirkan karakter produk nan kuaik,” keceknyo.
Salain manaliak dan manangani material tanah liek, peserta lokakarya juo diajak mangambangkan babagai ragam hias ikonik Minangkabau, sarupo Motif Siriah Gadang dan Pucuak Rabuang, jo mamakai teknik cetak kriya.
Peserta juo diperkenalkan jo babagai teknik pambentukan keramik, mulai dari teknik putar, teknik slab atau lempengan nan dikambangkan di Studio Institut Seni Indonesia (ISI) Padangpanjang, teknik pilin, sampai teknik pijit atau pinching.
Untuak mambari gambaran tantang pamakaian tanah liek sabagai media seni, Wisnu manampilkan duo karya kriya seni stoneware punyo inyo, yakni “Rangkiang” nan mamakai material stoneware dan engobe Fe, sarato “Pucuak Rabuang” jo material stoneware dan engobe Zr.
Inyo juo manampilkan dokumentasi art performance dan instalasi seni nan mamakai material tanah liek Galogandang.
Kapalo Taman Budaya Sumatera Barat, M. Devid, barharap lokakarya tu indak barhenti pado peningkatan keterampilan teknis peserta dalam mambantuak tanah liek.
“Kami barharap kegiatan ko juo manumbuhkan apresiasi nan labiah mandalam taradok potensi material lokal, sahinggo masyarakat dapek mangolah tanah mentah manjadi produk kriya nan fungsional, estetis, sakaligus punyo nilai ekonomi,” keceknyo. (Tan Parpatiah)
