Jakarta — Tradisi marantau urang Minangkabau dinilai indak harus baujuang pado putuihnyo hubungan jo kampuang halaman. Malah sabaliknyo, urang rantau nan taseba di ba bagai kota dan mancanegara dapek manjadi kakuatan untuak mambangun daerah melalui pertukaran ilmu, pengalaman, jaringan, investasi, jo gagasan.
Pandangannyo disampaikan Senator RI asa Sumatera Barat, Irman Gusman, kutiko manjadi pembicara kunci dalam Seminar Nasional Rangkayo Minang Indonesia (RMI) nan batema “Tokoh Minangkabau nan Maubah Indonesia” di Balai Kota DKI Jakarta, hari Kamih (27/8/2026).
Irman mamparkenalkan konsep brain circulation sabagai caro baru dalam mamaknai tradisi marantau. Manuruiknyo, urang Minang tetap dapek mambarikan kontribusi untuak daerah walaupun indak lai tinggal di kampuang halaman.
“Dalam tradisi Minangkabau, brain circulation ko taraso paliang dakek. Urang buliah bajalan kamano sajo, tapi hubungan, ilmu, jo kontribusinyo tetap baputa baliak untuak nagari,” ujar mantan Ketua DPD RI tu.
Manuruik Irman, konsep brain circulation sabananyo sajalan jo falsafah Minangkabau nan ado dalam pepatah: Karatau madang di hulu, babuah babungo balun; marantau bujang dahulu, di rumah baguno balun.
Pepatah ko manggambarkan bahwaso marantau merupakan suatu proses untuak manambah ilmu, pengalaman, kabaranian, jo kamandirian, sabalun kamudian mambarikan manfaat untuak keluarga jo kampuang halaman.
“Pai untuak tumbuah, tatap basambuang untuak babagi, jo baliak mambarikan manfaat,” kato Irman.
Manuruik Ketua Dewan Pakar Bidang Ekonomi UMKM PP Muhammadiyah tu, kontribusi urang rantau indak harus salalu barupo bantuan pitih.
Urang Minang nan manjadi dokter di Melbourne, misalnyo, dapek mambimbing tenaga kesehatan di kampuang. Engineer nan barado di Singapura dapek mambukak akses teknologi untuak mahasiswa Sumbar.
Baitu juo pangusaha Minang di Jakarta dapek mambantu UMKM di kampuang mamparluas pasa, samantaro akademisi nan barado di luar negeri dapek mambangun kerja samo riset jo perguruan tinggi di Sumatera Barat.
“Jadi, baliak ka ranah indak salalu bararti pulang lalu manatap. Nan pantiang, baa supayo apo nan kito dapek di rantau dapek mambari manfaat untuak kampuang halaman,” tegasnyo.
Pandangannyo manunjukkan bahwaso hubungan antaro urang rantau jo kampuang indak harus dibatasi dek jarak. Ilmu, pengalaman, jaringan, jo kemampuan nan didapek di rantau justru dapek diputarkan baliak untuak kamajuan nagari.
RMI Diharapkan Jadi Jembatan
Irman nan juo Ketua Dewan Pengawas DPP IKM manilai Rangkayo Minang Indonesia (RMI) dapek manjadi jembatan antaro pemerintah daerah, perguruan tinggi, dunia usaha, organisasi perantau, jo nagari.
Manuruiknyo, jaringan nan laweh tu paralu diarahkan supayo potensi diaspora Minangkabau indak bajalan surang-surang. Kalau jaringan urang Minang di babagai daerah dan negara dapek disatukan, potensi tu akan manjadi modal sosial dan ekonomi nan gadang untuak mambangun Sumatera Barat.
Ia juo maingekkan, nilai-nilai nan ado dalam tradisi marantau paralu taruih diwariskan kapado generasi mudo sabagai bekal dalam manghadapi perubahan zaman.
Kamandirian, kemampuan manyasuaikan diri, kabaranian bapikia, jo kemampuan mambangun jaringan, manuruiknyo, marupokan modal nan mambuek banyak tokoh Minangkabau mampu mambarikan kontribusi dalam perjalanan bangsa Indonesia.
“Tradisi marantau indak hanya soal pai maninggakan kampuang, tapi baa caro rang awak ko tumbuah, mambangun kemampuan, lalu mambari arti bagi lingkungan asanyo,” kecek Ketua DPD RI 2009-2016 ko.
Dengan demikian, marantau dalam pandangan Minangkabau indaklah putuih hubungan jo Ranah Minang, tetapi sabagai proses mambangun diri di dunia nan labiah laweh. Ilimu, pangalaman, jariangan, jo keberhasilan nan didapek di rantau diharokkan tetap baputa baliak ka kampuang, untuak kamajuan nagari jo kesejahteraan masyarakat.
Rantau tu Kekuatan Minang
Samantaro tu Gubernur Sumatera Barat Mahyeldi Ansharullah Datuak Marajo nan juo maagiah pandangan dalam seminar nantun ma ajak masyarakat Minangkabau nan barado di rantau untuak taruih manjago persatuan, mamparkuaik silaturahmi, sarato maningkekan kontribusi untuak pembangunan daerah jo kampuang halaman.
Mahyeldi manyabuikkan, urang Minang nan barado di ba bagai daerah marupokan bagian nan penting dari kakuatan Sumatera Barat. Dek karano tu, hubungan antaro masyarakat di rantau jo di kampuang halaman paralu taruih dipaliharo jo dipakuaik.
Manuruiknyo, semangat persatuan harus manjadi landasan dalam satiok kegiatan masyarakat. Beda pilihan, profesi, maupun tampek tingga, indak buliah manjadi panghalang untuak tatap manjago silaturahmi jo kebersamaan.
“Kontribusi masyarakat Minang di rantau sangat bararti. Mari kito jago persatuan, pakuek silaturahmi, dan taruih mambari manfaat untuak kampuang halaman sarato bangsa,” kato Mahyeldi.
Dek karano tu, Mahyeldi mangapresiasi pelaksanaan seminar nan diadoan dek Rangkayo Minang Indonesia (RMI) tu. Manuruiknyo, kegiatan sarupo ko penting untuak mamparkuaik tali silaturahmi, sakaligus mambangun kasadaran basamo tantang paran jo kontribusi masyarakat Minangkabau, baik di ranah maupun di rantau.
Mahyeldi juo mangakui, gadangnyo paran urang rantau Minang dalam mambantu sasamo juo alah dirasokannyo langsung kutiko manyarahkan bantuan randang kapado masyarakat nan tatimpo bencana alam di Nusa Tenggara Timur (NTT).
“Hal tu ambo rasokan bana kutiko manyarahkan bantuan randang di NTT. Peran parantau kito gadang bana, ikuik mambantu dunsanak nan tatimpo musibah bencana alam,” kecek Mahyeldi. (Tan Parpatiah)
