Jakarta – Ado nan manyasakkan hati di Kota Bukittinggi. Kota nan salamo ko digadang-gadang sabagai Parijs van Sumatra jo tampek lahia Bapak Perfilman Indonesia, Usmar Ismail, kini malah indak punyo agak ciek juo bioskop atau caro lamo no, pangguang. Kaadaan ko manjadi sorotan Menteri Kabudayaan, Fadli Zon, nan manyabuik hal itu sabagai ironi di tangah kamajuan dunia perfilman nasional.
Waktu manghadiri sabuah acara di kawasan Gelora, Jakarta Pusat, Kamih (26/6/2026), Fadli Zon majalehkan baso Indonesia ko punyo pasa nan gadang untuak mangambangkan industri perfilman. Namun, jumlah layar bioskop nan tasadio di saluruah Indonesia masih jauh sangenek bana.
“Manuruik data, kalau indak salah, kabutuhan kito mungkin sampai 10.000 layar. Tapi kini baru ado sakitar 2.500 layar sajo. Artinyo, peluang investasi di bidang bioskop jo sinema masih tabukak, nan bakepeng basugirolah,” kato Fadli Zon.
Bioskop Gloria ko acok jadi tampek perpisahan anak sikola kalau lah tamaik
Nan agak maibo ati kecek mantari nan rang awak goh, Bukittinggi nan jadi tampek lahia Usmar Ismail malah indak punyo bioskop ciek alah juo lih.
“Ambo baru pulang dari Bukittinggi dalam rangka 100 tahun Jam Gadang. Bukittinggi tu tampek lahia Usmar Ismail, Bapak Perfilman Indonesia. Tapi di Bukittinggi kini indak ado bioskop,” katonyo.
Kaadaan ko, manuruik Fadli Zon, malah mambuek masyarakaik barusaha mancari jalan kaluar. Ado komunitas di Bukittinggi bainisiatif mambuek bioskop tabukak atau caro inggirihno open air cinema, supayo masyarakaik masih dapek manonton pilem basamo.
“Salamo anam hari baturuik-turuik, nan manonton labiah dari saribu urang. Tu manandokan urang masih haus jo hiburan bioskop,” kato Mantari Kebudayaan nantun.
Fadli Zon manilai, kabiasoan masyarakaik Indonesia manonton film di bioskop adalah modal gadang nan patuik dijago. Manuruiknyo, kondisi ko babeda jo babarapo nagari lain nan kini tradisi manonton di bioskop alah mulai hilang dek diganti layanan digital.
Bioskop Sovia nan paliang tacelak
“Di nagari lain, tradisi pai ka bioskop hampia punah. Di Indonesia urang masih suka manonton di bioskop. Manuruik ambo, ko pantiang dek karano bioskop juo maniduikkan ekonomi kabudayaan nan punyo dampak barantai nan panjang,” katono.
Dari catatan tungganai Gonjong.id ado babaro pangguang nan pernah ao di sinan. Urang Bukittinggi tantu masih ingek maso jayano bioskop di kota ko. Sahinggo akhir taun 1980-an, Bukittinggi punyo tigo bioskop nan salalu jadi tampek hiburan masyarakat.
Bioskop Gloria tampekno di Pasar Ateh, basabalahan jo Taman Margasatwa Kinantan dan babadapan jo Balaikota Bukittinggi. Ciek lai adolah Bioskop Sovia nan barado di sampiang Istana Bung Hatta. Samantaro Bioskop Eri tagak di muko pinjado (Lembaga Pemasyarakatan) Bukittinggi, nan taralah pilem Ameika jo pilem Hongkong acok diputa di sinan.
Katigo bioskop ko dulunyo indak sajo jadi tampek manonton film, tapi juo manjadi ruang batamu jo basosialisasi urang Bukittinggi, Agam, jo daerah sakitarno. Kini, ka sarono lah tingga curito sen lih. (Tan Parpatiah)
