Bukittinggi – Gagasan jo pamikiran anggota DPRD Sumbar Daswipetra Dt Manjinjiang Alam untuak manetapkan bateh bateh nan jaleh tanah ulayat di Minangkabau ko mandapek respon dan dukuangan dari Pemprov Sumbar.
“Pemprov Sumbar manyambuik baiak pamikiran Pak Daswippetra Dt. Manjinjiang Alam nan prihatin jo berbagai masalah tanah ulayat adat. Iko adolah masalah nan harus kito cari solusinyo dan ambiak tindakan minimal dari segi budaya adaik nan marupokan norma-norma hukum adat,” kecek Kapalo Dinas Kebudayaan Sumbar Syaiful Bahri di acara Bimtek Penigkatan Kapasitas Lembaga Adat nan diadokan di Bukittinggi hari Kamih patang ko.
Manuruik Syaiful seluruh rumusan dari Bimbingan Teknis Peningkatan Kapasitas bagi Limbago Adat harus ditulih dan dibukukan sabagai acuan untuak manyalasaikan masalah tanah adat di Sumbar.
Hadir pado kesempatan iko, Anggota DPRD Sumbar H. Daswippetra Dt. Manjinjiang Alam, Kapalo Dinas Pariwisata dan Kebudayaan Kabupaten Solok, Marcos Sophan, Kapalo Dinas Pendidikan dan Kebudayaan Kota Solok, diwakili Kapalo Dinas Kebudayaan, Kapalo Jarahnitra, Zardi Syahrir, para Ketua LKAAM sebagai peserta bimbingan teknis untuk meningkatkan kapasitas limbago adat.
Tema nan diusuang untuak alek ko adolah “Alua samo dituruik, Limbago samo dituang”.
Kapalo Dinas Kebudayaan Sumbar juo manambahkan bahaso masalah tanah ulayat ko harus disalasaikan sacaro tapek untuak kapastian hukum dan kapastian norma-norma adaik nan marupokan panyalasaian jo panyalasaian masalah jiko tajadi di masyarakat kito.
“Adaik salingka nagari adolah pamahaman dalam mamajukan pambangunan nagari, baitu pulo masalah tanah ulayat paralu manjadi diskusi penting untuak mandapekan kato saiyo manjago adaik jo kautuhannyo sahinggo tatap bakalanjutan dari generasi ka generasi,” kecek Syaiful Bahri.
Syaiful Bahri juo mangatokan, kalau sajo masalah tanah adat ko bisa disalasaikan dek ninik mamak di seluruh Sumbar, tantu akan manjadi hal nan elok. Ndak paralu sampai baabih hari ka pengadilan bagai.
Dan kini juo, kito bisa pulo manyalasaikan masalah panyakik sosial, LGBT dan sabagainyo, malalui norma-norma tradisional, “Adaik dipakai baru, pusako dipakai lamo, warih bajawek ka nan mudo”.
“Iko sasuai jo UU No.17 tahun 2022 manyangkuik provinsi Sumatera Barat jo falsafah iduik Adaik basandi syarak, syarak basandi kitabulllah. Dan manakankan baso adaik jo agamo adolah kepribadian masyarakaik Sumatera Barat dan merupakan adat jo budayo sabagai tuntunan iduik bamasyarakaik di nagari awak. (Tan parpatiah)
