Padang — Heboh nagari ko dek ulah ado nan menyeba an kaba baraso Mantari Pariwisata Widiyanti Putri Wardhana masuak musajik Raya Sumbar pakai sipatu dan manuduah buk Mantari ko ndak bataratik.
Padohal itu kaba nan ndak batua, dan buk Mantari ko adolah muslimah nan pasti mangarati bana soal adab masuak musajik.
“Lagi pulo baliau datang jo Pak Gubernur sarato pejabat lain nan pasti malalui protokoler, tantu ndak ka dipabia kan dek protokol buk Mantari ko ka musajik pakai sipatu,” kato Kapalo Biro Adpim Setdaprov Sumbar Nolly Eka Mardianto katiko manjalehkan masalah tu ka masyarakat malalui pers, hari Satu patang ko.
Nolly memastikan baraso kaba nan mangatoan Menteri Pariwisata pakai sipatu di musajik tu hoax. Indak batua. Pemerintah Provinsi Sumbar mambantah informasi nan beredar di media sosial atau di media massa pun satantangan kunjungan karajo Mantari Pariwisata Indonesia, Widiyanti Putri Wardhana, ka musajik Raya Sumbar nan banmo Syekh Ahmad Khatib Al-Minangkabawi tu tanggal 29 April tu.
Nolly Eka Mardianto manakankan baso informasi nan beredar tu adolah info nan keliru, nan manyerakkan kaba partamo pasti indak mamareso talabiah dulu apokah batua buk Mantari ko pakai sipatu mamijak lantai musajik.
“Ibuk Mantari tu bukan pakai sipatu tapi semacam kaos pelindung,” kato Nolly.
Nolly mangatoan baso baliau langsuang mangawani rangkaian kagiatan kunjungan karajo Mantari Pariwisata salamo baliau barado di Sumatera Barat, tamasuak wakatu kagiatan di Musajik Syekh Ahmad Khatib Al-Minangkabawi.
“Ambo tamasuak dalam rombongan nan hadir dan manyaksikan kegiatan ko sacaro langsuang. Indak batua Menteri tu mamakai sipatu di musajik, nan dipakainyo adolah kaus kaki,” kecek Nolly./
Manuruik Nolly, klip video nan beredar luas di babagai platform media sosial alah mambuek persepsi nan salah di kalangan masyarakaik. Dalam video tu, Mantari Pariwisata tu nampak bajalan di ateh karpet musajik mamakai kaus kaki bukan sipatu, nan bantuaknyo mungkin sarupo jo sipatu sekilas.
Baliau manambahkan, saluruah rangkaian kunjungan Mantari Pariwisata di Sumatera Barat, tarutamo katiko baliau barado di Musajik Gadang Syekh Ahmad Khatib Al-Minangkabawi, balangsuang jo panghormatan panuah taradok nilai-nilai, etika jo tata krama nan dijunjung tinggi dek masyarakaik Minangkabau.
“Mantari jo sado staf alah maikuik-i tata krama nan tapek. Kito paralu manjalehan baso indak ado panggunoan sipatu di musajik sarupo nan dinyatoan dalam sajumlah narasi nan indak akurat nan beredar luas di media sosial,” tegasnyo.
Salanjuiknyo, Nolly manyasa jo penyebaran informasi nan alun diverifikasi nan laweh di ruang umum. Inyo picayo baso panyabaran hoax jo fitnah indak hanyo manyimpang, tapi juo bapotensi untuak mamicu salah paham di masyarakaik.
“Perbedaan persepsi mungkin tajadi, tapi manyebarkan informasi nan indak batua dan mamimpin pandapek ka arah nan negatif tantu bukan hal nan bijak, apolai kalau bapotensi manyababkan perpecahan,” jalehnyo.
Untuak alasan iko, Pemprov Sumbar maajak masyarakaik untuak labiah bijaksana dalam manarimo jo manyebarluaskan informasi, jo caro salalu mautamokan verifikasi jo mautamokan fakta daripado asumsi.
Kaba hoax dalam bantuak video ko lah beredar kama kama dan ditambah lo jo kato kato bacaruik bagai mamfitnah buk Mantari ko.
“Ambo harap media media anggota SMSI ndak sato-sato lo memblow up berita nan ndak sandereh ko. Apolai tanpa konfirmasi dan tabayyun dulu,” kato Ketua Serikat Media Siber indonesia (SMSI) Sumbar H Zulnadi maingekkan angggota anggota di Sumatera Barat.
“Kasihan wak jo buk Mantari nan kanai fitnah ndak manga se,” kecek Zulnadi. (Tan parpatiah)
