Bukittinggi – Kutiko pai mancaliak dari dakek kawasan Jam Gadang, Mantari Pariwisata Widiyanti Putri Wardhana langsuang mangecekan ka Gubernur Mahyeldi jo Waikota Ramlan Nurmatias sarato jo Senator Sumatera Barat Irman Gusman baso, Bukittinggi akan disiapkan manjadi destinasi kelas dunia.
Untuak maso kini kato buk Mantari ko, pamarintah mandorong daerah-daerah untuak manyiapkan paket pariwisata terpadu untuak dipromosikan dalam pameran-pameran internasional. Tamasuak Bukittinggi.
“Kami paralu paket wisata untuak dijua di expo internasional. Alhamdulillah kami punyo anggaran untuak daerah untuak ikuik expo internasional. Iko supyo destinasi Bukittinggi ko manjadi destinasi nan selalu ado dalam pangana para pelancong dunia “ kato Mantari ko pakan nan lapeh.
Pernyataan iko manunjuakan paratian pamarintah pusek taradok pambangunan destinasi wisata di Sumatera Barat, khususnyo Bukittinggi, nan alah tanamo sabagai kota wisata jo kakuatan sijarah sarato lanskap alam.
Jam Gadang tu lah marupoan salah satu titiak kunjungan utamo bagi wisatawan katiko datang ka Bukittinggi. Kawasan iko barado di pusek kota dan dikuliliangi dek babagai kagiatan ekonomi masyarakaik, pusek kuliner, sarato akses ka objek wisata lainnyo sarupo Ngarai Sianok jo kawasan wisata basejarah Fort de Kock.
Salain mampunyoi nilai pariwisata, Bukittinggi juo dianggap mampunyoi kakuatan sajarah nasional nan dapek manjadi daya tarik tambahan bagi wisatawan domestik jo lua nagari. Pamarintah Provinsi Sumatera Barat maanggap nilai sajarah sabagai aset pantiang dalam mangambangkan pariwisata babasis warisan atau warisan budayo.
Mandanga kato Mantari bak nantun, Gubernur Sumatera Barat, Mahyeldi Ansharullah, langsuang manambahka baso Bukiktinggi punyo posisi pantiang dalam sajarah Indonesia. Manuruiknyo, sijarah panjang kota ko marupoan salah satu kakuatan nan dapek dikambangkan dalam sektor pariwisata.
“Bukiktinggi adolah darah iduik Indonesia, Bukiktinggi adolah ibukota PDRI, tanpa Bukiktinggi indak ado Indonesia. Bukiktinggi juo ibukota pado jaman Bulando, Japang, jo Sumatera Tengah, ado bukti sejarahnyo, dan iko adolah warisan,” keceknyo.
Salah satu usaho nan disiapkan dek pamarentah daerah adolah mandorong Jam Gadang ko dimasuakkan dalam daftar tentatif UNESCO. Langkah iko kabanyo marupoan bagian dari proses panjang pangakuan internasional taradok nilai-nilai sajarah jo budaya Bukittinggi .
Manuruik Mahyeldi Ansharullah, momentum ulang tahun Jam Gadang nan ka-100 marupokan titiak awal dalam manyiapkan dokumen jo mampakuek babagai syarat administrasi untuak lamaran tasabuik.
“Jo 100 tahun, itu akan manjadi awal untuak manyiapkan dokumen-dokumen dan manjadi langkah kami salanjuiknyo. Kami mangusulkan Geopark Silokek, kamudian nanti Bukiktinggi dan kamudian Geopark Sianok-Maninjau. Sacaro lamo-lamo kami bajalan manuju nasional dan kamudian internasional,” katonyo. (Tan parpatiah)
