Padang – Lai takana dek sanak, El Nino? Iko bukan namo urang, tapi namo iklim nan acok disabuik belakangan ko dek pengamat cuaca. El Nino ko datang ba wakatu-wakatu. Nan kini ko adolah iklim ekstrem nan kuek nan acok diagiah gala “El Nino Godzilla” diprediksi akan malando sajumlah wilayah di Indonesia pado taun ko.
Tapi manuruik pengamat cuaco, tu mah Alhamdulillah, Sumatera Barat lai ndak ka kanai dampak langsuang dari fenomena alam ko doh.
Kato Akademisi Universitas Negeri Padang (UNP), Nofi Yendri Sudiar, ciri-ciri iklim wilayah Sumatera Barat ko unik dibandiangkan jo wilayah lain di Indonesia.
“Indak sadonyo daerah kanai potensi kuek El Nino, salah satunyo adolah Sumbar,” kecek Nofi di hari Satu (18/4/2026), sarupo nan dikutip dari Antara.
Manuruik Nofi, salah satu alasan utamo Sumatera Barat cenderung aman dari dampak El Nino Godzilla adolah intensitas curah hujan nan tinggi di nagari wak ko sapanjang taun. Sacaro statistik, curah hujan di Ranah Minang dapek mancapai 200 mili per bulan. Kondisi ko ditambah lo jo posisi geografis Sumatera Barat nan tamasuak dalam pola musiman khatulistiwa (ekuatorial).
Babeda jo daerah lain, daerah khatulistiwa mangalami duo puncak musim hujan satahun, yaitu pado periode Maret-April jo Oktober-November. Di sisi lain, El Nino Godzilla diprediksi mampunyoi dampak nan signifikan pado daerah-daerah nan mampunyoi pola muson. Daerah tu misalnyo, Lampuang, Sumatera Selatan, Pulau Jawa, Kalimantan, Bali jo Papua.
“Jadi, daerah-daerah nan bapola muson sarupo Jawa, Bali, Nusa Tenggara Timur (NTT) jo Nusa Tenggara Barat (NTB), Kalimantan, sabagian Sulawesi jo Papua akan tapangaruah dek mangalami kakariangan,” kato Nofi.
Nofi manambahkan, jikok El Nino nan kuaik batua-batua tajadi di Indonesia pado taun 2026 manuruik prediksi dari ahli meteorologi dunia, potensi kakariangan di Sumatera Barat indak diharokkan sasignifikan daerah lain.
Walaupun dampaknyo di Sumatera Barat diprediksi minim, pamarintah jo masyarakat tatap nyo sarankan untuak waspada ka resiko nan mairiangi musim kamarau, sarupo ancaman gagalnyo tanaman, masalah kasehatan, jo kabakaran hutan jo lahan (karhutla).
Nofi manyarankan babarapo anjuran strategis untuak mananggapi potensi El Nino nan kuek pado taun ko. Nan partamo, maatur maso tanam, patani di daerah nan bapotensi kanai dampak disarankan untuak maatur ulang jadwal maso tanam jo mamiliah jinih tanaman nan labiah tahan taradok cuaco kariang.
Nan kaduo, pamarentah paralu malakukan pemantauan rutin ka wilayah hutan jo daratan untuak mencegah kebakaran hutan jo daratan. Mancegah usaho untuak manjalehkan lahan pertanian baru jo caro mambakanyo, baiak dek masyarakaik maupun perusahaan. Nan katigo, mahimbau masyarakaik untuak indak mambaka sarok sacaro ceroboh, tarutamo pado wakatu cuaca angek jo angin kancang di musim kamarau.
Langkah-langkah pancegahan iko dianggap sangaik pantiang sahinggo risiko gangguan katahanan pangan jo karusakan ekosistem dapek diminimalisir sajak usia mudo. (tan parpatiah/samuik/kcm)
