Padang – Bisuak ko, Polisi Polda Sumatera Barat sapaduo diantaronyo akan bakarajo di rumah pado hai Rabaa. Di hari salabiahnyo, polisi-polisi tu tetap masuak kantua sarupo biaso.
Iko adalah kebijakan nan acok disabuik Work From Home (bakarajo dari rumah) sebagai bagian dari penyesuaian sistem karajo berdasarkan Surat Telegram Kapolri Nomor ST/782/IV/KEP./2026.
Kebijakan iko lah dibahas dalam rapek nan dipimpin Wakil Kapolda, Brigadir Jenderal Polisi Solihin, jo pejabat utamo di Polda Sumbar, hari Sinayan patang ko (20/4/2026).
Dalam skema baru ko, sistem Karajo Dari Kantua (Work From Office) dilaksanakan pado hari Sinayan, Salasa, Kamih jo Jumaik. Samantaro itu, hari Rabaa saduo dari jumlah polisi ko bakarajo dari rumah.
Kapalo Biro SDM Polda Sumbar, Komisaris Besar Polisi Anissullah M. Ridha, mangatoan baso kabijakan ko mamprioritaskan ASN Polri, sadangkan personel polisi masih diatur malalui sistem kuota untuak mamastian palayanan publik indak taganggu.
“Personel nan WFH masih diwajibkan untuak maambiak kahadiran malalui sistem online jo malaporkan kagiatan kapado pamimpinnyo masiang-masiang. Samantaro itu, fungsi palayanan publik taruih bajalan sacaro normal malalui sistem WFO,” katonyo.
Kecek Anissullah personil nan ditugaskan malayani langsuang, manjago markas, kaamanan tahanan jo fungsi operasional lainnyo taruih bakarajo tatap muko untuak manjago stabilitas kaamanan jo palayanan kapado masyarakaik.
Salain maatur pola karajo, rapek ko juo manakankan panggunoan energi nan efisien di lingkuangan kantua. Kapolisian Daerah Sumatera Barat mandorong hemat listrik, aia jo BBM, sarato maajak personilnyo untuak maadopsi gaya iduik nan ramah lingkungan.
“Personil nan tingga dakek kantua disarankan untuak mamakai sapeda atau bajalan kaki. Kandaraan dinas roda ampek diutamokan untuak kabutuhan operasional,” kato Anissullah.
Polda Sumbar mamastian baso palaksanaan skema karajo baru ko indak akan mangurangi kualitas palayanan publik. Satiok unit karajo diagiah wewenang untuak maatur pambagian tugas sahinggo palayanan taruih bajalan sacaro optimal.
Kabijakan iko diharokan dapek mandorong transformasi Polri manjadi limbago nan labiah adaptif, efisien jo modern, sasuai jo prinsip-prinsip SDM nan unggul sarato konsep Presisi Polri. (tan parpatiah)
