Jakarta – Kato Mantari Parancanaan Pambangunan Nasional/Kapalo Bappenas Rachmat Pambudy Sumatera Barat ko ndak ado nan kurang lai, tanah subur, urangnyo santiang-santiang, kanduangan mineralnyo banyak. Jadi kok dibandiang jo daerah lain mako Sumatera Barat ko mampunyo keuanggulan sendiri lo.
“Pambangunan daerah industri di daerah-daerah harus mangandalkan pemanfaatan sumber daya alam (SDA) nan optimal, nan didukuang dek kapasitas sumber daya manusia (SDM), jo panguasaan teknologi. Kalabiahan komparatif nan dimiliki Sumatera, mulai dari kasuburan lahan, kanduangan mineral, hinggo kualitas SDM. Kombinasi iko manyadiokan modal nan kuaik untuak mandorong patumbuahan ekonomi badasarkan nilai tambah,” katonyo.
Itu sebagaian dari nan disampaikan dek Mantari Bappenas ko kutiko Gubernur Sumatera Barat datang manamui Mantari ko di kantua nyo di Jakarta untuk selanjutnyo rapek koordinasi pakan nan lapeh.
“Lahan nan paliang subur, tambang nan paliang banyak dan elok ado disinan. Urang-urang nan paliang santiang ado pulo disinan. Jadi kalau potensi nan sangaik gadang sarupo itu indak bisa dimanfaatkan untuak mambantu pambangunan nagari, mako paralu kito evaluasi basamo-samo dima latak masalahnyo,” kecek Menteri Rachmat Pambud.
Mantari Rachmat Pambudy juo manyoroti paralu sangaik mampacapek adopsi teknologi dalam pangolahan sumber daya alam. “Teknologi adolah kunci untuak manciptakan nilai tambah jo maningkekan daya saing industri nasional. Tanpa panguasaan teknologi, potensi gadang sumber daya alam baresiko indak mambarikan manfaat ekonomi maksimal,” jaleh Mantari Rachmat Pambudy.
Gubernur Mahyeldi mangatoan baso pamarintah daerah alah manyiapkan langkah-langkah strategis untuak mangambangkan kawasan industri babasis sumber daya alam sacaro terpadu. Momentum iko akan mamulai langkah untuak mangambangkan daerah iko manjadi kota baru nan babasis industri nan didukuang dek investasi jo bahan baku nan siap.
“Kawasan industri nan direncanakan akan dihubuangkan jo infrastruktur palabuahan, sarato pambangunan sektor energi, tamasuak potensi kolaborasi jo Bukik Asam,” kato Mahyeldi. Samantaro tu, kesiapan infrastruktur dasar lah mulai manunjuakan pakambangan nan positif. Palabuahan nan tasadio marupoan salah satu kalabiahan utamo dalam mandukuang kagiatan logistik jo industri. Pamarintah daerah juo alah manjalin komunikasi jo investor untuak pambangunan fasilitas kilang jo petrokimia. Pemerintah Provinsi Sumatera Barat menargetkan daerah iko untuak bakambang manjadi pusek patumbuahan ekonomi nan baru .(tan parpatiah)
