Sabalun wak bacarito tantang nagari wak surang, wak nio manyampaian bahwosanyo iko bukan carito tokoh, tapi carito yang manyabuikan asal mulo Nagari Kapalo Hilalang, 2×11 Kayutanam, Kabupaten Padang Pariaman, Sumatera Barat. Duo kato ko bilo kito pacah, manjadi Kapalo Hilalang dan Kecamatan 2×11 Kayutanam.
Partamo, wak mulai dari Kapalo Hilalang, urang tuo-tuo mangecek asal kato ko barasal dari kato kapalo jo hilalang. Pado zaman dulunyo, banyak tumbuah hilalang yang menyebabkan, jikok kito lewat di sinan kapalo kito hilang ndak nampak.
Salanjuiknyo 2×11 Kayu Tanam, dunsanak sadonyo lai tau asa kato ko? Sabananyo iko pacahan dari di ateh yaitu, 2×11 enam lingkuang, yang terdiri dari daerah Guguak, Kayutanam, Anduriang, Kapalo Hilalang, Sicincin, Pakandangan, dan Parit Malintang. Asa 2×11 dari suku-suku yang ado di tiok-tiok nagari, di antaronyo 5 suku di Kapalo Hilalang, 6 suku di Anduriang, 5 suku di Guguak, 6 suku di Sicincin. Jadi 2×11 adolah penjumlahan dari angko di ateh.
Angko duo, yaitu angko 6 atau 5-nyo sabanyak 2. Asal 11 adolah penjumlahan angko 6+5+11. Itu lah asa dari kato ko, tapi ado lo versi lain, yaitu angko duonyo malambangkan hilie dan mudiak, tapi angko sabalehnyo samo 5+6=11 lo, sadangkan kayu tanam marupokan pusat nagarinyo. Suku yang ado sabananyo samo di tiok daerahnyo.
Pambateh nagari, yaitu Asam Pulau babateh jo Lubuak Aluang, Pakandangan babateh jo Pauh Kamba, Bari Sicincin babateh jo Tujuah Koto, Kapalo Hilalang babateh ulo jo Tujuah Koto, dan daerah Guguak jo Kandang Ampek babateh jo Kabupaten Tanahdatar.
Sasudah itu, pacahlah daerah ko manjadi tigo kecamatan, yaitu 2X11 Enam Lingkuang, (Sicincin, Lubuak Pandan, Sungai Asam) yang kaduo, 2×11 Kayutanam (Kapalo Hilalang, Kayu Tanam, Guguak, Anduriang), terakhir Kecamatan Enam Lingkuang (Pakandangan, Toboh Ketek, Parit Malintang, Koto Tinggi).
Dahulu daerah Kayutanam disabuik jo balerong adaik, fungsinyo jikok ado masalah antaro nagari, masalah tu wak salasaian di Kayutanam. Contohnyo, Nagari Sicincin dan Nagari Kapalo Hilalang mampunyoi masalah. Untuak manyalasaiannyo, diadokan perundiangan di Kayutanam yang maundang paro-paro pamuko adaik di antaro kaduo balah pihak.
Pambateh Kapalo Hilalang kini, yaitu Rumah Makan Uni Evi. Dahulu di sinan ado pambateh jo tembok warna merah jambu, sadangkan Kayu Tanam babateh jo Titian Panjang Pasa Limau. Dahulunyo babateh lo jo tembok, tapi antah dima kini hilang tembok tu. Tahun berdiri nagari ko ndak pasti. Manuruik wawancara yang alah wak tanyoan, keceknyo Nagari Kapalo Hilalang alah ado pado zaman Belanda, tapi tanggal dan tahunnyo ndak diketahui.
Dulunyo pernah tajadi di Desa Luboak Bunta, Nagari Kapalo Hilalang, Pemerintah Belanda pernah mengontrak tanah di Lubuak Bonta untuak bakabun karet dalam surek tatulis sekitar tahun 1875–1975 (100 tahun).
Yang kaduo, bisa kito liek dari bangunan jalan kareta api di daerah Kapalo Hilalang. Untuak mambangun jalan kareta api, itu sababnyo tanah PJKA ndak ado di Nagari Kapalo Hilalang, karano ndak adonyo tanah (erpak) tanah peninggalan Belanda. Jadi, tahun badiri Kapalo Hilalang ko ndak pasti badirinyo doh. Sadangkan yang disabuik di internet sabagai acuan untuak awak tatulih di sinan tahun badiri nagari ko tahun 1901, bisa dikecean iko ndak batue karano lewat wawancara di ateh dari sumber wak, seharusnyo di ateh tahun 1875. Sia pandiri nagari ko, yo ndak tau sampai kini doh.
Jadih, Nagari Kapalo Hilalang bisa wak sabuik itu ndak ado panjajah doh karano para penjajah mintak izin kapado Nagari Kapalo Hilalang untuak jalan kareta api dan mintak tanah lo untuk kabun karetnyo. Kapalo Hilalang ko banyak lo tokoh nan bagak, tapi bagak dipagunoannyo untuak elok.
Urang yang partamo manjago Kapalo Hilalang yang ditakuikan dan sagaik disagani dek Balando banamo Kapalo Sikakan. Samaso iduiknyo, kalualah izin kabun gatah jo jalan kareta api untuak dididikan.
Sejarah lainyo, yaitu manyangkuik daerah Kapalo Hilalang. Bateh wilayah antaro Kapalo Hilalang Kayu Tanam dan Kapalo Hilalang Sicincin. Bateh ko pernah manjadi masalah karano dipasampik dek kaduo nagari ko. Dek masalah ko yang mamabuek Kapalo Sikakan diimbau pulang ka kampuang dek waktu itu inyo sadang marantau.
Sampainyo di Nagari Kapalo Sikakan, langsuang mambuek bateh wilayah Kapalo Hilalang. Inyo maimbau sado alah anggotanyo untuak mambuek pilar-pilar untuak manguekan dalam sidang beko.
Manuruik caritonyo, di antaro Sicincin dan Kapalo Hilalang, dibuek kuburan palsu, tapeknyo di tapi Batang Ulakan, diagiah namo kuburan puti (tapian puti). Antaro Kayutanam, dibuek villa (batu atau tembok). Sasuai jo bateh asli nagari ko, sampai waktu sidang, dibukaklah bukti dari bateh tu, tarnyato emang batue bateh tahu jo apo yang disampaian dek Nagari Kapalo Hilalang. Nagari lain ndak bisa maambiak salamaknyo tanah dari Nagari Kapalo Hilalang.
Sapaninggalan Kapalo Sikakan, kalualah panaruih salanjutnyo, di antaronyo Gaek Hantam, Amaik Pontong, jo Karia Bagak. Tokoh ko bisa sabuik pahlawannyo Nagari Kapalo Hilalang, karano jasonyo sangaik gadang bana. Tampek balinduang anak kamanakan, dari Balando yang kejam.
Tokoh ikolah mamabuek sajarah untuak masyarakaik luweh karano dek tokoh ko Balando takuik ka nagari kami. Salah satu yang ditinggakan tokoh Kapalo Hilalang yang masih dipakai sampai kini ko, adolah sekolah dasar Kapalo Hilalang. Sekolah dasar 1, 2, 3, yang bararati sakolah dasar 1, sakolah dasar 2, sakolah dasar 3 Kapalo Hilalang, tapi walaupun namonyo kayak itu, sakolah ko tetap badiri satu atok senyo. Sasudah itu, baganti namo manjadi Sakolah Dasar 14 Pasa Panjang, dan kini ko manjadi sekolah SDN 05 2×11 Kayutanam.
Dulunyo marupokan sakolah dasar partamo dan paliang gadang di Kapalo Hilalang. Banyak anak dari daerah lain yang sakola di siko. Jikok para pambaco indak picayo silahkan caliak di Nagari Kapalo Hilalang. Nan manjadi TK kini ko marupokan bangunan sekolah dasar dahulunyo. Karano indak dipakai, jadih kini manjadi TK. Banyak mitos yang baredar di sekolah ko karano alah lamo dibangun tantu ado panghuninyo. Yang maagiah tanah ko adolah gaek hantamnyo maagiah tahu ko diwakafkannyo untuak masyarakaik.
Sekolah dasar ko dahulunyo dipakai lo untuak maadokan acara pagelaran seni setiap hari rayo. Biasonyo di siko diadokan salamo saminggu, di antaroannyo ado acara manari, randai, dan lainnyo untuak hiburan karano ko bisa lo untuak silaturahmi sekitar tahun 70-80-an.
Kini lapangan yang ado dimuko sakolah dasar ko salain tampek main bola digunoan lo untuak solat Idulfitri dan Idulaadha dan acara lainnyo karano lapangan nagari sangaik strategis dan lueh. Kalo lah tibo Hari Rayo, lapangan ko rami bisa basobok lo jo urang rantau karano di ciek tampek. Mmasyarakat nagari sadolahnyo bakumpue. Kalo hari tarang se bisa di lapangan solatnyo soalnyo ndak ado tenda.
Nan tagak cuman pakai lapiak sumbayang senyo. Banyak lo dari daerah lain yang ikuik solat di siko karano bisa manampuang banyak bana. Ndak kayak di masajik doh, tapi hiburan yang bisa dicaliak dulu kini ko hanyo tingga kanangan samato. Karano dek bakambangnyo teknologi dan dapek mambantu mancari tampek-tampek yang unik dan menarik dan panaruih untuak malanjuikan acaro ko indak ado lo doh, sangaik wak sayangkan.
Wak babaliak ka tokoh liak. Gaek hantam dimakamkan di balakang tanah wakaf di sampiang kantue KCD, tapi di lakang sekolah ko, ado duo makam. Yang ciek Gaek Hantam, yang kaduo ndak diketahui sia yang di sampiang. Nyo marupokan tokoh sasudah kapalo Si Kakan maningga dunia.
Carito iko bukan sakedar carito, tapi bisa diliek dari lokasi makam lokasi tadi. Sasudah tu dibangun MTSN Kapalo Hilalang di Pincuran Tujuah, dan sasudah tu pindah ka tangah lapang tampek yang dulu tu barubah manjadi. Ndak lamo lo nyo pindah ka tangah lapang dan kini bakumpuelah sadoalahnyo di tanah lapang.
Kapalo Hilalang banyak sekolah yang lah lamo dibangun. Salain SDN 05 2×11 Kayutanam, salain tu dibangun lo MTsN Kapalo Hilalang yang marupokan MTsN tatuo yang ado di Kabupaten Padang Pariaman sebelumnya. Padang Pariaman pacah manjadi Kota Pariaman, sedangkan tagaknyo MAS Kapalo Hilalang masih baru dan MA Kapalo Hilalang adolah swasta, ndak negri doh.
Kini di Pincuran Tujuah alah manjadi tampek mangaji. MDA/MIS yang mampunyoi ampek lokal, tingkeknyo A baraja iqra dasar, lokal B belajar mangaji dan ayat pendek lancar ,lokal C baraja mangaji lancar dan Al-Qura’n irama, dan lokal D baraja irama dan hafalan untuak ka tamaik. Wak marupokan lulusan dari sinan salanjuiknyo tokoh Karia Bagak, Amaik Pontong, dan Gaek Hantam dalam sajarahnyo mampatahankan kabun karet yang ado di Tarok Lubuak Bunta. Kabun gatah yang alah ditanam oleh Balando, yang tanahnyo disewa salamo 100 tahun karano negara Indonesia Merdeka 1945. Jadih, lamo kalamoan nagari 6 Lingkuang manuntuik pambagian kabun karet tu tantunyo. Nagari Kapalo Hilalang ndak amuah maagiah tanah karano tanah ko adolah milik hak paten Nagari Kapalo Hilalang.
Mako katigo tokoh ikolah yang manjadi poros terdepan untuak menghadapi urang yang mamintak tanah tasabuik (6 lingkuang). Karano masalah ko akhirnyo tanah tasabuik diambiak alih tanah dek Pemda dan Kodim Padang Pariaman sasudah tahun 1965 (sasudah G30 SPKI). Sasudah tu, dibuek PT Purna Karya. Samanjak tu pemerintah Nagari Kapolo Hilalang ndak bisa berkutik karano kekuasaan ko zamannyo Suharto. Sasudah tahun baganti, runtuahlah kekuasaan Suharto dan tajadilah revolusi diambiak baliak tanah tu oleh Nagari Kapalo Hilalang. Sadolah gatah yang ado di tampek ko ditabang dan diganti jo tanaman lain oleh masyarakaik Kapalo Hilalang sampai kini ko.
Sakitar tahun 78, P&K (Dinas Pendidikan dan Kebudayaan) maminta tanah kapado Kapalo Hilalang untuak mambuek SMA, tapi ndak diagiah dek nagari sabalun adonyo MAS karano MAS alun lamo dibangun lai doh. Kini alah dibuek lo laga-laga di sampiang kantue wali nagari untuak malatiah silek anak- anak dan remaja yang ingin latihan silek jo manari di balakang kantue wali nagari, Desa Simpang Balai Kamih Nagari Kapalo Hilalang.
Karano Nagari Kapalo Hilalang mampunyoi tanah yang luweh dan subur sarato panduduak yang banyak, Kapalo Hilalang banyak mamiliki berbagai sektor yang padek manunjang parekonomian yang ado di Nagari Kapalo Hilalang, yaitu diutamoan sektor pertanian yang sangaik baparan, sektor industri, jo sektor pariwisata.
Dari dulunyo daerah Nagari Kapalo Hilalang dan Kayutanam juga tasabuik jo buah durian yang banyak pado musimnyo. Yang lamak sangaik, buahnyo dapek dikirim ka Pulau Jawa, ka Pakanbaru, dan Palembang. Salain tu jugo tasabuik jo daerah wisata yang tasabuik di antaronyo Desa Pincuran Tujuah yang tasabuik jo lauk gadang dari Sungai Amazon dan dahulunyo ado lo binatang langka, kayak kambiang gadang, tapi alah dibaok ka kabun binatang. Sangaik disayangkan kini daerah ko ndak terawat lai dan alah banyak ditinggaan dek para pancintonyo.
Karano ndak tauruih dan ndak lo diparatian jo pamarinta sakitar di nagari surang, sangaik disayangkan bana. Daerah kaduo di Kapalo Hilalang, yaitu Desa Lubuak Bunta yang tasabuik jo pamandian yang memiliki aie yang janiah dan sajuak. Tampek ko kini manjadi wisata yang banyak bana pangunjuangnyo dan kini ditambah lo tampek mandi baru yang samo janiah aie nyo. Kini lah tigo tampek mandi di sinan. Sumber aie ko digunoan lo untuak mambuek tabek lauk dan mengaliri sawah yang ado di Nagari Kapalo Hilalang.
Karano terkenal dengan kajaniahan aienyo, yang barasa dari Cauang dan Lubuak Bunta, Kapalo Hilalang cocok mamabuek kolam tabek perikanan nila karano cocok jo jenis aienyo. Kapalo hilalang dulu punyo pasa surang . Namonyo Pasa Balai Kamih yang hari pasanyo pado hari Kamih. Dahulunyo pasa ko sangaik terkenal dan rami karano trasportasi dahulunyo sulik.
Dahulu jikok daerah lain ingin pai ka pasa, makonyo harus pai jo bendi, pedati, kereta api, dan banyak urang yang makai sapeda untuak pai ka pasa. Tapi lamo-kalamoan karano transportasi lah lancar, pasa ko mulai ditinggan. Urang banyak ka Pasa Kayutanam jo Pasa Sicincin. Kini ko Pasa Balai Kamih hanyo tingga namo se lainyo (Simpang Balai Kamih) tampeknyo di daerah kantue wali nagari.
Korong Kapalo Hilalang tabagi dalam beberapam korong yaitu Korong Pasa Simpang, Korong Pasa Panjang, Korong Pasa Limau, Korong Pincuran Tujuah. Pado maso kini korong Pasa Panjang jo Pasa Simpang disatuan manjadi korong Balai Kamih.
Jadi, korong Kapalo Hilalang kini ko tadiri dari Korong Simpang Balai Kamih, Korong Tarok, Korong Pincuran Tujuah, Korong Pasa Limau, desanyo diantaronyo Desa Pincuran Tujuah, Tarok, Caung, Lubuak Bunta, dan daerah lainnyo.
Kapalo Hilalang masih banyak tumbuah pohon-pohon jo hutan tapi sangai disayangkan dek banyaknyo pambanguanan yang samakin hari samin banyak,apolai pambangunan pabrik, yang mampunyoi keuntungan dan karugian yaitu mangabisan hutang.
Akibaik dari perminttaan tanh yang luweh untuak mambuek pabrik,yang ada dinagari kapalo hilalang saaik ko adoalh perusahaan aie minum dan pertenakan ayam (PT. Java) (air minum SMS). Yang mampunyoi 2 pabrik yaitu pabrik ayam batalue dan manatehan talue, perusahaan ko banyak di korong tarok. Akibaiknyo dapek maratoan hutan jo marusak hutan. Nan fatal bana akibatnyo ka hewan ndak ibo wak mancaliak hutan abih hewan jadih ndak punyo tampek tingga lai dek ulah manusia.
Hewan jadih payah mancari makan di ma kadicari lai alah aguih sadolahnyo banyak mati ,manjai punah hewan ko, atau bnayak lo yang mamburu nyo dek lah nampak kini ,hutan ndak salabek dulu lai doh.Awak ko salah lo gara-gara awak hewan thu bisa mancari makan ka pemukiman tapi awak malah mambunuah ,manangkok dan manjadihan nyo sabagai hama bagi wak.sabananyo ko salah awak ndk do rumahnyo thu ka rumah wak nyo pindah lah.
Akibatnyo ndak sadar wak apo yang tajadih ko marupokan kesalahan wak surang ,awak yang ndak bisa membatehan bakurangnyo hutan dinagari wak surang.Yang mananguang doso adolah makluk allah yang ndak basalah .awak ndak ba pikie dengan panjang apo yang wak pabuek dan apo akibatnyo jikok wak buek mode ko.Kadang ibo hati wak mancaliak tapi ka dipangaan tanh ko bukan milk awak ndak bisa wak malarang urang doh.mungkin sadolah ko tajadi kareano hayo ma mikian keuntungan samato terlena lah wak dengan sadolah keuntungan yang gadang.
Bukan ndak mungkin jikok kito ndak mambatehan panebangan hutan ko dan perataan tanah di nagari mako .kito bisa manjadihan hewan –hewan ko samakin langka,dan kito telah mamatian sumber aie yang balimpah salamo ko dan awak nikmati salamo ko,akan abih,dan nadk mungkin ado jo ka mungkinan untuak longsor dek ndak ado yang manahan lai
Karo lah tabukti jikok datang hujan korong tarok dapek banjir taruih Simpang Ampek Tarok. Wak harus capek mangarik reboisasi dan manumbuhan kasadaran,sia nan tau tah bisuak tanh longsor gai tibo kalo kayak ho taruih.wak harus manumbahan kasadaran dalam diri surang lu,baru bisa manyadaran urang lain.
Dek diperpaah jo baguanan yang tiok hari samakin banyak,rumah di bangun hutan ditabang tapi ndak di tanam baliak,marusak yo mudah bana sanak, manyalamaikan ko yang payah,yakin lah jo kato-kato wak kho.Manusia banyak yang mamikian keuntungan ruginyo beko lo pikian kan ndak kini dirasoan doh,urang kini itu yang banyak sana.
Pernah dulu basobok harimau di Pondawa (Arok). harimau ko kemungkinan besar tasasek dek hutan nyo alah habis ndak do tampek tingga lai ndk do ka dimakan lai sasudah thu di tangkok lah.masyarakaik manankok basamo-samo dan sasudah tu dibaoklah ka kabun binatang.
Beberapa kisah di atas sabananyo sanak indak banyak diketahui urang kecuali yang baru-baru kini walaupun nyo. urang nagari tapi ndak tau jo sajarah nagari surang karano mungkin ndak tau batanyo ka sia,dan ndak penting lo lai carito lamo ko, tapi awak sangai baharok pambaco jo urang nagari di daerah wak tau ndak malupokan sajarah yang alah tajadih di kampuang tacinto.
Dalam carito ko mungkin basobok versi yang lain, atau agak babeda, tapi sabananyo intinyo samo, yaitu Nagari Kapalo Hilalang basangkuik jo nagari yang ado di 2×11 Enam Lingkung yang dulunyo alun tapacah lai, dan bakaitan antaro satu samo lain. Sampai nagari ko masih ado. Yang kaduo, walaupun versinyo lain, tapi suku-suku yang ado di nagari ko hampie samo dan di Minangkabau sadolahnyo basudaro, apolai sasuku tambah dadek hubungan kekerabatannyo.
