Pado zaman dahulunyo di Nagari Tanjuang, Kecamatan Sungayang, Kabupaten Tanah Datar, dicaritokan sabuah kisah tantang Bukik Kayu Sabatang yang biasonyo urang manyabuiknyo jo Gunuang Kasumbo. Carito iko barawal dari kisah “Datuak Ongku” yang biasonyo dipanggia Tuak Ongku. Tuak Ongku barasal dari Nagari Tanjuang, tapeknyo di Aruah Kuniang. Beliau dahulunyo seorang nak mudo yang tangguh, bajiwa sopan, sholeh, jo ta’aik kapado Allah Swt.
Sasudah umuanyo mainjak 60 tahun, inyo bakainginan untuak manunaikan ibadah aji ka Mokah. Suatu malam beliau bamimpi bahwa ado urang yang mangecek ka inyo. Urang itu bakato, “Wahai Tuak Ongku jikok engkau nio manunaikan ibadah haji ka Mokah, maka ado caro yang labiah murah untuak Atuak”. Lalu Datuak manjawek, “Apo caronyo yang nio kau tunjuak an kapado ambo”, Manusia dalam mimpi tasabuik manjawek, “ Pailah Datuak ka gunuang-gunuang yang di sakitar nagari Datuak dan latakkanlah tujuah buah dama (=kemiri) di gunuang-gunuang yang akan Datuak singgahi, jika tujuah buah dama yang Datuak latakkan hilang di salah satu gunuang-gunuang yang lah Datuak singgahi dan di situlah Datuak harus dikubuan iduik-iduik”. Datuak pun manjawek dengan penasaran, “Apokoh iyo nan ang katokan wahai dunsanak?”. Manusia dalam mimpi itu manjawek baliak “Iyoo Datuak, karano iko adalah patunjuak dari Tuhan Allah untuak umatnyo yang shaleh, tarutamo dalam hal ibadah”. Dengan sangaik khawatir Datuak pun bakato baliak “Sasudah ambo dikubuan hiduik-hiduik apo nan harus ambo lakuan?. Kemudian urang tu mangatokan kapado Datuak, bahwa Datuak harus dikubuakan dengan kedalaman 12 anak janjang, lengkap jo sebuah Al-qur’an, ciek kasua, dan ciek lampu pinjik.
Sasudah babincang-bincang Datuak pun tajago dari laloknyo, dan mamikian mukasuik dari mimpinyo itu. Datuak pun bapikia apakah iyo bana inyo harus malakuan patunjuak yang diagiah oleh urang yang barado di dalam mimpinyo itu.
Kasalanjuikan harinyo, Datuak mancubo untuak barangkek ka gunuang-gunuang yaitu Gunuang Soda, Gunuang Sabaleh, dan Gunuang Kasumbo. Lalu Datuak malatakkan tujuah buah dama yang alah disiapkannyo di gunuang-gunuang yang inyo singgahi.
Sasudah babarapo hari, Datuak pun mangunjungi gunuang-gunuang yang alah inyo kunjungi. Datuak pun
mancaliak ulang dama yang alah inyo latakkan. Alangkah takajuiknyo inyo sawaktu barado di Gunuang Kasumbo (bukik kayu sabatang) yang marupakan gunuang tarakhir, inyo indak dapek manamuan buah dama yang inyo latakkan disatiok gunuang itu.
Gunuang Kasumbo iolah bukik, dan bukik tasabuik indak ditumbuhi oleh ciek batang pun, di bukik itu terdapat sabuah sumua yang mano sumuanyo kariang, mako caro mangisinyo dangaik mudah yaitu dengan mambaka kamoyan disertai do’a mamintak turunnyo hujan kapado Allah SWT. Hal iko alah dibuktikan langsuang oleh Allah dimano sumua yang kariang langsuang tarisi panuah. Maka dengan picayonyo, Datuak pun mangikuti apo yang dikatokan manusia yang barado di dalam mimpi baliau, yaitu dikubuakan hiduik-hiduik jo persyaratan yang alah disabuik an sebelumnyo. Setelah bapikia beberapa minggu, Datuak pun mamutuihan untuak mamintak bantuan kapado masyarakaik sakitar Tanjuang Sungayang untuak manggali kuburan sadalam 12 anak janjang Bukik Kayu Sabatang.
Jo raso panasaran, masyarakaik pun babondong-bondong untuak pai ka tampek Datuak yaitu di Gunuang Kasumbo (Bukik Kayu Sabatang). Sesampainyo disitu, Datuak mulai mangatokan kapado masyarakaik kalau inyo alah bamimpi didatangi manusia yang misterius yang diutus Allah untuaknyo, lalu inyo mancaritokan mimpi yang dialaminyo atau uang inyo bicarokan samo manusia tasabuik dalam mimpinyo itu. Datuak pun bakato ka masyarakaik nagarinyo, “Wahai sado dunsanak ambo yang ado disiko kini , ambo ingin manyampaikan mukasuik ambo maimbau dunsanak sadonyo kamari, yaitu ambo maminta tolong ka dunsanak sadonyo sadonyo untuak mambuek an ambo lubang kuburan sadalam 12 anak janjang dan sadio an langsuang di dalam kubuan tasabuik, kasua, Al- Qur’an, dan lampu pinjik, salah surang warga bakato, “Oii
Datuak nan kami hormati, iyo Datuak nan kami tuokan dalam nagari, ndak mungkinlah kami mambuek an Datuak lubang kubuan sadangkan Datuak jo kini masih sehat alun maningga lai do. Itu tagiah Datuak gilo pado kayo. Kaji ndak ka mungkin ajo tu Datuak masak iyo Datuak murah jo picayo ka hal-hal yang mode itu dek gara-gara mimpi, namuah lo Datuak suruah kami mambuek an Datuak lubang kubuan, mancari mati Datuak namonyo tu.” Datuak pun bakato, “Oii dunsanak, bukannyo ambo mancari mati ataupun tagiah pulo gilo daripado kayo tapi iko utusan Allah, selain utusan Allah ambo lah mambuktiannyo lo sorang dan batin ambo pun mangecek an kalau memang iyo sabananyo.” Salah seorang masyarakat pun bakato, “kalau memang iyo baitu kecek Datuak, apolah dayo kami lai, kami hanyo bisa manuruik an kahandak Datuak jo nyo. Karano datuak urang yang kami tuokan di nagari ko.” Setelah salasai musyawarah, Datuak pun baliak mangatokan jikok inyo indak dapek jago dalam waktu tujuah hari sasudah masuak lubang kubuan, mangko galilah kubuan tu, dan ambiaklah batu-batu di kaki gunuang iko untuak di
jadian paga kuburan Datuak, lalu bantailah saikua jawi.
Bisuak harinyo, mulailah masyarakaik bakarajo manggali lubang kuburan sadalam 12 janjang yang disuruah Datuak waktu itu di ateh puncak Gunuang Kasumbo (bukik kayu sabatang). Sasudah masyarakaik bakarajo babarapo hari, akhirnyo lubang kuburan tasabuik salasai digali dan lengkap jo ciek kasua, ciek Al-Qur’an, dan ciek lampu pinjik. Lalu masyarakaik pun maagiah tau ka Datuak kalau lubang kuburan alah salasai di gali sasuai kahandak yang Datuak katokan wakatu itu.
Bara hari siap tu, hari yang ditunggu-tunggu Datuak pun alah tibo, Datuak langsuang manuju ka Gunuang Kasumbo (Bukik Kayu Sabatang) tersebut, jo hati yang badabua-dabua atau maraso sangaik cameh. Sampainyo disinan, Datuak pun
pamit ka sado masyarakat yang barado disinan pada saat itu dan mangucapkan tarimo kasih karano alah nio manolong untuak mambuek an lubang kuburan tasabuik. Sasudah mangatoan kasadonyo, Datuak pun mamintak maaf yang sagadang-gadangnyo ka sado masyarakat, masyarakat pun maraso sangaik ibo dan mereka pun manangih sajadi-jadinyo. Sasudah sado kato demi kato disampaikan oleh Datuak ka masyarakaik, lalu Datuak pun mulai turun ka lubang kuburan yang alah dibuekkan oleh masyarakat. Jo barek hati yang dicampuri raso picayo bahwa Datuak dalam lindungan Allah, mulailah masyarakat manimbuni lubang kuburan tampek Datuak tadi. Sasudah sadonyo salasai, masyarakat pun mulai maninggaan puncak bukik tasabuik.
Tujuah hari sasudah peristiwa panguburan Datuak dilaksanakan, maka masyarakat pun baliak ka puncak Bukik Kayu Sabatang tampek Datuak dikubuan hiduik-hiduik. Masyarakat pun mancaliak indak ado tando-tando kalau Datuak tasabuik tajago. Jo raso picayo dirinyang kuek, sado masyarakat pun mulai manggali lubang kuburan tampek Datuak dikubuan. Sasudah galiannyo alah sampai dasar tanah, urang-urang indak mancaliak Datuak di dalam lubang kuburan. Jadi, masyarakat pun mangingek pasan Datuak bahwa kalau masyarakat indak mandapek an Datuak di dalam lubang kuburannyo, masyarakat harus mambantai saikua jawi dan mamaga kuburannyo samo batu yang diambiak dari kaki Gunuang Kasumbo (Bukik Kayu Sabatang) untuak raso syukuran kalau Datuak dipicayo alah baradi di Makkah.
Katiko jawi nio dibantai, jawi pun mangamuak. Beberapa saat kamudiannyo, urang-urang yang alah baradi disinan takajuik karano mancaliak jawi tadi talatak di tanah jo keris yang balumuran darah. Sabagian urang picayo kalau yang mambantai jawi tadi iolah sang Datuak. Salanjuiknyo, jawi tasabuik dibarasiahan untuak dimasak. Sasudah jawi di masak,
masyarakat nagari Tanjuang Sungayang maadoan acara do’a basamo di ateh puncak Bukik Kayu Sabatang di daket kuburan Datuak. Hal iko dilakuan dalam rangka syukuran kalau Datuak alah sampai di Makah sasusai jo yang disampaikannyo.
Sasudah sado acara bado’anyo salasai, masyarakat pun baransua-ansua maninggaan tampek tasabuik. Beberapa wakatu kamudian, tajadi baliak suatu keanehan. Katiko masyarakat yang pai ka Makah untuak manunaikan ibadah haji, mereka mancaliak sosok Datuak sadang baibadah di sinan. Setelah inyo pulang dari tanah suci tasabuik, inyo pun mancaritoan ka sado masyarakat yang ado di nagari Tanjuang Sungayang yang ikuik dalam palaksanaan panguburan Datuak pada beberapa wakatu silam tu. Masyarakat pun picayo kalau itu yobana adanyo. Sasudah masyarakat mandanga carito dari salah surang masyarakat yang pai ka tanah suci, banyak masyarakat yang banazar jikok kainginannyo takabua, maka inyo akan mangunjungi Bukik Kayu Sabatang itu.
Kareno alah dianggap karamaik, suatu hari ado masyarakat yang pai ka kuburan Datuak tasabuik untuak mambaco ayat- ayat suci Al-Qur’an. Waktu baru tibo di kuburan Datuak, inyo mancaliak di tangah-tangah kuburan itu (di paruiknyo) tumbuah sabatang kubang. Sampai kini, hanyo batang itu yang tumbuah satu-satunyo dibukik tasabuik. Jadi, mulai saat itu maka tampek itu dikenal dengan namo “Bukik Kayu Sabatang”. Di ateh batang itu, urang acok mancaliak ula putiah yang tagak disinan. Masyarakat pun picayo kalau ula putiah itu iolah Datuak. Salain masyarakat nagari Tanjuang Sungayang acok mandangaan danguangan saikua kumbang, dan dikiro itu iolah Datuak.
Beberapa tahun kamudian dari generasi ka generasi, banyak yang penasaran jo carito dari Bukik Kayu Sabatang. Banyak urang yang mangunjunginyo untuak mancaliak dan bado’a.
Bukik Kayu Sabatan memang bbanyak manyimpan carito. Diantaranyo pernah tajadi suatu carito yang mangajuik an masyarakat nagari Tanjuang Sungayang yaitu hilangnyo surang warga Tanjuang di Bukik Kayu Sabatang. Inyo iolah nak mudo yang diduga alah malakuan suatu tindakan yang indak elok di sekitar kuburan Datuak Ongku. Inyo manabang batang kubang di ateh kuburan Datuak sambia bakato-kato kumuah dan inyo mangatokan bahwa kuburan Datuak hanyo kuburan biaso, indak ado yang karamaik di kuburan ko. Dianggap Datuak mandanga sagalo kato-katonyo yang indak sopan, maka dari itu nak mudo tadi hilang di Puncak Bukik Kayu Sabatang. Sasudah beberapa hari kamudiannyo, wargapun mandapek an anak mudo tadi dalam keadaan yang sangaik mengenaskan, cando siap jatuah dari jurang. Samanjak kajadian itu, warga sakitar pun mulai sadar kalau awak indak buliah bakato-kato kumuah. Selain itu, awak indak buliah maraso sombong apolai takabua. Karano sifaik itu sadonyo akan mambahayokan nyawa urang di tampek-tampek yang diraso karamaik. Tetapi, masyarakat di Nagari Tanjuang Sungayang indak baranti- rantinyo untuak mancari nafkah di ate Bukik Kayu Sabatang itu. Ado yang mancari kayu, batuang, san sampai ado yang mananam batang rempah-rempah mode batang kulik manih. Dan bukik itu alah panuah dek baragam buah-buahan, dari waktu ka waktu Bukik Kayu Sabatang alah banyak ditumbuhi jo batang-batang dan ado lo urang yang mambuek dangau di sakitaran bukik kayu sabatang.
Salain dimanfaatkan oleh masyarakat untuak mancari nafkah jo mananam batang karano katinggiannyo, masyarakat mamanfaatkan pulo Bukik Kayu Sabatang untuk manyalamaik an diri dari bancano alam yang malando nagari Tanjuang Sungayang yaitu Galodo. Salain itu, Bukik Kayu Sabatang dimanfaatkan pulo untuak masyarakat sebagai tampek untuk basantai, mode bamain olang-olang, banyak masyarakat yang
antusias untuak manonton pamainan tasabuik. Bagi masyarakat nagari Tanjuang Sungayang, permainan olang- olang alah manjadi permainan yang sangaik diminati dan disukoi sado urang, sampai-sampai pamainan itu alah dilombakan, hadiah yang diagiah sungguah sangaik menarik dan jadinyo banyak masyarakat yang nio ikuik balomba untuk mandapek an hadiah itu. Jadi, urang yang mangunjungi Bukik Kayu Sabatang jadi tambah banyak. selain karano penasaran samo caritonyo, banyak pulo yang datang hanyo untuak manonton tandiang olang-olang disinan.
Selain dimanfaatkan masyarakat untuak kegiatan yang positif, ado pulo sebagian masyarakat yang mamanfaatkan untuak kegiatan yang negatif, contohnyo pacaran. Karano Bukik Kayu Sabatang talatak di ateh puncak bukik yang tapancia dan banyak ditumbuhi oleh batang yang sangaik tinggi, keadaan tampeknyo juga sangaik jarang dikunjungi oleh masyarakat atau bisa dikatokan sebagai tampek yang langang. Pernah tajadi sebuah kejadian yang sangaik mamalukan di Bukik Kayu Sabatang. Dahulunyo tradisi pacaran indak ado, namun kini sairiang perkembangan zaman, banyak yang pai ka sinan hanyo untuak pacaran. Karano manuruik anak mudo yang pai pacaran, Bukik Kayu Sabatang iolah tampek yang sangaik tapek untuk baduo. Pacaran sampai kini masih dilakuan oleh nak mudo-mudo yang baru marasoan maso puber karano manuju maso pendewasaan. Dan disinanlah mereka balaku yang indak elok, tetapi Datuak akan maingekan nak mudo tu dengan caro Datuak surang. Yaitu dengan marubah bantuak tubuah Datuak manjadi harimau, lalu inyo mangauang-ngauang sakareh mungkin cando harimau yang sadang kalaparan. Wakatu mudo-mudo tangguang tu pacaran, inyo akan takajuik karano mandanga suaro harimau mangaum. Karano maraso sangaik katakutan, yang padusi pun batanyo ka yang bujang, “Uda, suaro apo tu da? Takuik adiak deknyo
da”, lalu ak bujang itupun manjawek, “Suaro apo ko diak, indak ado apo-apo disiko do kecuali awak baduo ajonyo. Mungkin itu hanyo perasaan adiak ajo”, mandanga jawaban dari anak bujang tasabuik, padusi tadi pun mampicayoinyo dan mereka pun malanjuik an kegiatan buruak yang mereka lakuan tadi walaupun masih dalam perasaan yang was-was kalau kan tajadi apo-apo. Sudah tu, karano indak mampicayoi kejadian tadi, Datuak pun mangulangi baliak tetapi labiah manakuik an dari yang sebelumnyo, sahinggo mambuek pasangan mudo tadi manjadi takajuik dan ketakutan sahinggo mambuek pasangan mudo-mudo tu langsuang lari tunggang langgang tanpa manghiraukan hal-hal yang ado disakitarnyo, yang jaleh, pasangan tadi tapancah untuak manyalamatkan diri masing- masing. Setelah sampai di bawah, pasangan tadi basarobok baliak dan mulai sadar kalau tampek tadi yobana karamaik karano mangingek carito-carito tentang bukik itu kalau bukik itu dijago oleh Datuak, dari urang tuo dan niniak moyangnyo. Dari situlah mereka sadar kalau yang mambuek mereka maraso sangaik kerakutan tadi iolah Datuak yang manjago bukik kayu sabatang. Lalu pasangan tadi pun bagageh pai maninggaan bukik kayu sabatang, namun anehnyo, masih ado juo remaja lain yang pai pacaran ka bukik kayu sabatang itu. Masih banyak yang malakuan hal-hal buruak sarupo pasangan mudo yang sabalumnyo. Datuak oun maraso sangaik berang karano tingkah laku sado nak mudo-mudi yang babuek indak elok di Bukik Kayu Sabatang itu tanpa maraso basalah dan tanpo raso takuik. Karano alah sangaik berang, Datuak pun marubah mukonyo baliak manjadi harimau, tapi yang kini labiah manakuikan, sahinggo siapo sajo yang mancaliaknyo langsuang jatuah pingsan. Tujuan Datuak malakuan itu sadonyo hanyo untuak manjago anak cucunyo dari perbuatan yang indak elok dan dilarang agamo. Saindaknyo mangharagoi kuburan urang-urang tuo dulu atau niniak moyang inyo.
Tarutamo mangharagoi urang tua awak surang.
Tatapi indak sado remaja yang mamanfaatkan Bukik Kayu Sabatang untuak kegiatan yang negatif, ado pulo yang mamanfaatkan untuak kegiatan yang positif, contohnyo bakemah. Selain tampeknyo yang rancak dan mampunyoi pemandangan yang sangaik indah dicaliak dari ateh, tampeknyo cocok pulo untuak bakemah. Banyak anak-anak mudo yang masih sakolah atau pun yang indak sakolah baarok untuak bisa bakemah disinan. Alah banyak yang malakuan kegiatan bakemah disinan dan wakatu itu tajadi kajadian yang sangaik manakuik an yang mambuek urang cameh. Ado ciek kelompok kemah yang mampunyoi anggota yang malakuan kemah disinan. Disinan, mereka harus mangonsumsi aia untuak minum, mandi, dan mamasak makanan. Wakatu itu, mereka mancari aia tetapi sarobok samo sumua tapi sumua itu alah kariang. Lalu taingeklah akan carito-carito dari urang yang dahulu tentang caro mambuek sumua itu baraia baliak. Akhirnyo mereka mambaka kamanyan di dakek sumua dan badoa supayo turun hujan dan sumua barisia aia. Sasudah beberapa saat badoa, tibolah hujan yang sangaik labek sahinggo sumua kambali tairisi aia. Hal aneh yang mambuek urang-urang manjadi tacangang iolah katiko hujan itu datang, langsuang mambuek sumua tarisi panuah dalam sakijok mato tanpa ado ambun saketekpun. Sasudah hujan baranti, mereka pun mancaliak tampek disekitar kemah tu indak ado tando- tando tajadinyo hujan, sado lokasi Nampak mode biaso sajo cando alun pernah tajadi hujan sabalunnyo, kariang tapi sumuanyo alah tarisi aia. Mereka pun batambah binguang samo keadaan itu, ado yang takuik, ado yang cameh, ado yang binguang, dan banyak yang dirasoan kasudah kejadian itu. Ado ciek urang dari anggota kemah itu iolah urang Tanjuang yang tingga dakek bukik kayu sabatang. Lalu inyo mancaritoan ka sado anggota perkemahan tentang baa awal mulo peristiwa
tajadinyo bukik kayu sabatang beserta sumuanyo. Sadonyo jadi takuik mandanga carito itu. Inyo mamintak ka Pembina perkemahan untuak baliak pulang, ado yang penasaran dan nio mancaliak kuburan Datuak itu.
Sasudah sado caritonyo salasai dicaritokan, suasana yang awalnyo heboh manjadi tanang. Mereka manjadi binguang dengan carito itu. Dan mereka pun bapikia, akhirnyo Pembina pun mamutuskan untuak mambaok anggotanyo untuk pai ka kuburan karamaik itu untuak mamastian kebenaran dari carito yang dicaritokan oleh ciek urang anggota tadi. Alah tibo disinan, mereka langsuang badoa di kuburan Datuak Ongku. Ado yang manangih karano maraso ibo, dan ado pulo yang maraso bangga ka Datuak. Katiko sadonyo alah salasai, merekapun mamutuskan untuk turun dari puncak Bukik Kayu Sabatang dan baliak ka rumah masiang-masiang supayo hal- hal yang buruak indak tajadi ka diri anggota kemah.
Sasudah babarapo lamonyo setelah kejadian bakemah tasabuik, baedarlah gossip tentang bukik kayu sabatang tapeknyo di kuburan Datuak. Banyak urang yang pai ka sinan untuk mandapek an ilmu hitam. Contohnyo ado wakatu itu urang-urang yang pai kasinan dengan caro bersemedi bahari- hari. Namun Datuak indak mambuliahan itu tajadi karano malanggar hokum ajaran agamo Islam. Jikok disalahgunokan atau jatuah ka tangan urang yang salah, akan mambuek hal yang fatal karano bahubungan samo hal-hal gaib. Datuak Ongku malarang itu sado karano inyo tau tentang ajaran Al- lah SWT bahwa urang yang mampunyoi ilmu hitam dapek manimbulkan sifat syirik ka Allah SWT dan Datuak tau apo ilmu yang elok sesuai samo ajaran Allah SWT. Pernah tajadi suatu kejadian di nagari Tanjuang, yaitu ado Bapak-bapak yang barusaho mamintak ilmu itu dengan tekad yang kuek. Bapak itu rela bersemedi salamo tujuah haru tujuah malam, indak akan dan minum di ateh puncak Bukik Kayu Sabatang. Inyo
manangih-nangih mamintak ka kuburan Datuak untuak maagiah inyo ilmu hitam. Bapak itu bakato, “Wahai bukik nan ambo hormati, agiahlah ambo ilmu yang tinggi, ambo ingin jadi urang hebaik dan dipandang oleh kerabat-kerabat ambo, sarato masyarakaik sanagarinyo”. Sasudah Bapak itu mangucapan kato-kato itu, tadangalah oleh Datuak. Ado pulo kejadian lainnyo yaitu urang yang alah diagiah ilmu yang luruih oleh Allah SWY, tapi urang tu malah barubah katiko inyo mandapek an ilmu yang tinggi, inyo lupo kalau ilmu hanyo untuak jalan yang luruih yaitu untuak hal-hal barubek untuak masyarakaik yang kerasukan setan atau hal gaib dengan caro marukiyahnyo dan hal yang dilakuan iolah untuak mambaleh dandam ka rang yang lamah dengan mangarajoannyo (santet), yaitu dengan maagiah panyakik yang mambuek urang lain sangsaro sampai maningga. Masyarakat Tanjuang Sungayangpicayo kalau santet acok tajadi di zaman dulu hinggo zaman kini masih bisa sobok samo urang-urang yang mamakai ilmu hitam. Datuak pun langsuang marabo gadang yang ditandoi dengan datangnyo patuih sacaro tibo-tibo ditangah siang hari yang langsuang barubah manjadi galok. Masyarakatpun langsuang tau kalau Datuak alah berang dan indak manyukoi hal-hal yang alah mambuek inyo berang tu. Datuak indak suko ado urang yang mamintak-mintak salain ka Allah SWT, Allah-lah yang patuik disembah dan tampek umaiknyo mangadu tentang kasulitan dunia karano yang mangatur dalam pambagian rasaki, jabatan, mati, jodoh, dan lain-lain, sadonyo ditantuan oleh Allah SWT, tergantung usaha surang-surang, bukan usaho yang indak elok. Sahinggo indak ado yang nio pai ka bukik kayu sabatang untuk mancari ilmu hitam.
Di bukik Kayu Sabatang, mulai manjadi rimbo karano alah banyak ditumbuahi batang-batang, sahinggo alah banyak binatang yang tingga disinan. Samanjak banyak kisah yang alah tajadi, samanjak itulah masyarakat Tanjuang Sungayang indak nio babuek tindakan yang kurang elok. Kini, bukik kayu sabatang alah samakin elok karano indak ado tajadi masalah yang dulu acok tajadi. Bukiknyo alah banyak ditumbuhi batang- batang, mulai dari batuang, kulik manih, buah-buahan, bahkan banyak dangau-dangau ketek. Bukik kayu sabatang manyimpan baragam kajadian mistis dan awak harus maambiak hal-hal yang positiif dari kajadian itu, picayo atau indak, hal itu memang alah tajadi. Sampai kini, banyak urang- urang yang pai naiak haji masih acok mancaliak wajah Datuak yang baribadah di Makah. Jadi, sado tampek yang basifat karamaik indak buliah disepelekan karano akan mambahayokan nyawo awak surang, dan labiah eloknyo awak labiah mangharagoi peninggalan dan mambudidayakannyo, jan sampai awak malupoan carito-carito rakyat yang ado disekitar awak.
Sebagai generasi penerus, kito harus manjago apo yang ditinggaan oleh niniak moyang kito atau apo urang pado zaman dulu. Kito harus malestarikan kebudayaan yang ado disekitar kito. Kito indak buliah marusak ataupun manjatuah an sado yang ditinggaan kapado kito. Kito harus malestarikannyo supayo anak jo cucu kito bisa marasoan atau mandanga carito dari kito dan bisa diingek dan dijadian pelajaran untuak kehidupan kelak. (Sumber informasi Ibu Mutir 70 tahun, Ibu Nurhainar 60 tahun).
