Padang – Musajik khusus untuak padusi, baa lo curitonyo tu? Di Padang Priaman ado musajik nan khusus untuk induak-induak (kaum ibu) Namonyo Masjid Wanita. Tiok urang baru nan lalu di jalan Padang – Pasaman Barat, persisnyo di Sungai Limau pasti bakaruik juo kaniangnyo mambaco papan namo musajik ntun. Sabab, jarang tasuo namo musajik nan bak kian. Biasonyo pakai bahaso Arab atau pakai namo Masjid Raya, Masjid Agung, Masjid Jami’.
Musajik Padusi atau bialah wak sasuaikan sajo penulisan jo namo nan lakek di papan musajik tu, ‘Masjid Wanita’ iko ruponyo lah tamasuak panjang sejarahnyo. Dimulai kutiko zaman Ulando saisuak sekitar tahun 1920an.
Tahun nan lapeh, surek kaba digital kompas.com pai ka ingkin mancaliak bangunan ntun. Basuo jo panitia pembangunannyo, Faridah. Buk Faridah ko mancaritokan sejarahnyo, baraso musajik ko mulo-mulo namonyo Surau sajo. Dibuek dek Uci Maryam, urang kampuang di sinan.
Dek anak Uci ko, namonyo Nurlian, dikumpua an e padusi-padusi tuo nan ditinggaan laki di rumah tu. Nyo ajak jo mandenyo bagai mangaji basamo-samo, sumbayang basamo-samo bajamaah. Eh, lamo jo lambek lah barubah se rumah Uci Maryam ko jadi surau.
“Tapi jamaahnyo sado aleh padusi je nyeh,” kato Faridah nan dikutip dek koran digital kompas.com ko.
Tu baa kok banamo Masjid Wanita? Kan dek sari namo e Surau Induak-induak?
Ko carito Faridah, di maso lah bakambang ko, panguruih mancubo minta dana bantuan pembangunan ka Pemerintah Kabupaten Padang Pariaman, tapi ndak kunjuang dapek doh. Dima kolah salah e.
Panitia sudah tu datang bana ka kantua Bupati manannyokan permohonan mereka. Dapeklah jawek dari rang kantua Bupati. Bahwa utuk bisa dibantu jo dana APBD namo ‘Surau’ ndak bisa doh.
“Eh, baa dek baitu?” tanyo Faridah.
Rang kantua Bupati manjalehkan baraso nomenklatur ‘Surau’ ndak ado dalam daftar doh. Nan ado tu Masjid. Mako disarankan supayo panguruih mangganti namu dari ‘Surau Induak-induak’ manjadi Masjid Wanita. Sudah tu baru mailia bantuan dari pamarentah ko.
Kutiko masih banamo Surau Induak-induak, bangunan tu hanyo badindiang papan jo atok daun rumbio. Tahun 2001 masyarakaik mampaelok bangunan manjadi bangunan permanen.
Mulo-mulo memang hanyo kaum padusi sajo nan shalat di sinan. Jamaah nyo induak-induak, imam nyo induak-induak juo. Wirid-wirid diagiah dek induak-induak juo. Tapi kini musajik ko lah mulai mambukak untuk urang laki-laki.
Dulu gharim nyo gai padusi. Tapi kini Herman nan manjadi gharim musajik tu adolah laki-laki. Herman mancaritokan, sajak tahun 2000 musajik ko lah jadi rest are sajo. Bamyak musafir nan singgah di siko untuak shalat,” kato wee.
Karano didedikasikan manjadi musaji untuk kaum musafir, mako musajik ko dibukak 24 jam, ndak pernah dikunci.
Soal musajik padusi
Sabana e dima-dima negara Islam ado musajik padusi. Di Jakarta misalnyo di Istiqlal walaupun ndak disabuik ‘masjid khusus’ tapi ‘tampek jamaah panusi’ pun ado. Di babarapo negara maah banyak.
Di nagari Cino nan laweh ntun, banyak musajik khusus induak-induak nan dibangun ratisan tahun nan lalu. Bisa dicaliak di provinsi Henan, Shanxi jo Provinsi Hebei. Kutiko Dinasti Qing bakuaso, muslimah Hui mambangun musajik khusus induak-induak. Alasannyo Islam juo maajakan pemisahan padusi jo laki-laki.
Musajik padusi nan paling tuo umuanyo namonyo Musajik Wangjia Hutong di Kaifeng nan dibangun sekitar tahun 1820. Tapi di banyak tampek musajik khusus padusi di Cino ko adolah bangunan nan tapisah dari musajik gadang. Biasonyo pengelolanyo adolah istri dari imam musajik gadang. Biasonyo musajik padusi ko disabuik Shiniang.
Di nagari Maldives (Maladewa) ado juo musajik khusus induak-induak ko. Nagari pulau di Lautan Hindia tu adolah salah satu nagari Islam.
Di Maladewa ko musajik padusi disabuik nisha miskii. Di siko modelnyo sarupo di masjid Istiqlal, nan disabuik musajik padusi tu adolah bangunan tapisah jo musaji gadang tapi dikelola dek padusi-padusi. Pengelolanyo disabuik Mudahim.
Pado tahun 2005, dipakirokan ado 250 musajik khusus padusi di nagari pulau tu. Tapi sasudah gampo gadang Aceh nan sampai lo ka Maladewa mambuek banyak musajik rusak. Tahun 2010 musaji-musaji padusi ko di tutuik pamarentah dengn alasan biaya pemeliharaannyo gadang mek. Induak-induak diminta bagabuang sajo di musajik gadang untuk shalat.
Baitu juo di India, ado lo musajik padusi. Di wilayah persatuan Lakshadweep ado musajik padusi. Tapi itu ruponyo adolah bangunan-bangunan pribadi nan baukuran ngenek, nan dipakai sebagai tampek shalat khusus dek jamaah muslimah.
Pro-kontra
Tapi satantang buliah indaknyo dibuek musajik padusi ko sampai kini ulama masih lun bulek pandapeknyo. Ado nan mambuliahkan ado nan indak.
Kecek Imam Besar Masjid Istiqlal KH. Ali Mustafa Yakup, ndak ado masalah bilamana jo musajik khusus padusi doh. “Yo, ndak ado masalah. Buliah sajo, nan ndak buliah tu padusi maimami jamaah laki-laki,” kati Ali Mustafa nan dikutip dari voa-islam.com.
Sebagai pambandiang, Kementerian Perwakafan Mesir lah manegaskan ndak ka maagiah izin pembangunan musajik khusus padusi nan diusulkan dek sebuah Lembaga Swadaya Masyarakat (LSM) malalui Majelis Tinggi Urusan Islam.
Syeikh Syauqi Abdul Lathif, Wakil Kementerian Perwakafan manyatokan pemerintah manulak usulan tu. “Kalau namuah, Rasulullah saw mamisahkan laki-laki jo padusi dengan mambuekan untuk mereka musajik masiang-masing. Tapi itu ndak baliau lakukan. Malah sebaliaknyo, Masjid Nabawi diparuntuakkan bagi laki-laki jo padusi perempuan. Dan Rasulullah adolah sabaiak-baiak contoh,” katonyo. (tan parpatiah/dari babagai sumber)
