Solok – Aia barasiah memang manjadi masalah mendasar di kota-kota, karano sumber aia ko umumnyo dari daerah tetangga nan dipakai dek Perusahaan Daerah Air Minum (PDAM). Untuak maningkean kualitas layanan ka masyarakat, Kota Solok tahun ko ruponyo mandapek dana dari pusat untuak maningkekan Sistem Layanan Air Minum (SPAM) labiah kurang Rp53 miliar.
Iko kabanyo akan dipakai untuk mampaelokan reservoar atau tampek bak panampuangan aia Perumda Air Minum Pincuran Gadang, Kota Solok.
Ketua DPRD Kota Solok, Fauzi Rusli kutiko Safari Ramadhan di Musajik Al Muhajirin, Nagari VI Suku, hari Akaik patangko manyabuikan itu ka jamaah. Tantu sajo sanang hati jamaah mandanganyo.
Manuruik Fauzi Rusli, pamanuhan pelayanan aia barasiah masih manjadi catatan di Kota Solok. Kualitas aia acok manjadi sorotan, tarutamo pado musim hujan. Tamasuak lo acok tajadi pamutuihan aia.
“Iko dek karano sumber aia PDAM di wilayah Kabupaten Solok alun maksimal. Ado sakurang-kurangnyo sajumlah sumber PDAM nan kanai banjir nan tajadi pado bulan November 2025 patang. Kualitas aia minum di Kecamatan VI Suku, Sinapa Piliang dan sebagian Tanah Garam masih alun optimal. Dengan pembangunan intake ko, Insya Allah tahun 2027 pelayanan aia barasiah akan optimal,” kecek Fauzi Rusli.
Di muko jamaah, Ketua DPRD juo manyampaikan program nan alah dijalankan salamo satu tahun di bawah pimpinan Walikota Ramadhani jo Wakil Walikota Suryadi Nurdal.
Manuruiknyo, janji politik Wakil Walikota Ramadhani jo Wakil Walikota Suryadi nan digarihkan dalam visi jo misi daerah tu diwujuikkan ciek-ciek. Indak hanyo perkembangan fisik, tapi juo non-fisik.
Pado taun 2026, Pamarintah Kota Solok akan malakuan duo program pambangunan infrastruktur, yaitu Musajik Sahara jo revitalisasi taman-taman Kota Solok. Salain manjadi pusek untuak kagiatan masyarakaik, Taman Kota juo diharokan manjadi magnet untuak kunjungan ka Kota Bareh ko.
“Nanti akan ado pamentasan budaya untuak generasi mudo Kota Solok di Taman Kota. Mampunyoi pamentasan budaya akan mangarahkan mahasiswa ka kagiatan-kagiatan nan positif. Apolai, kini Pemprov Sumbar alah manjadikan Silat sabagai ekstrakurikuler,” tambahnyo. (tan parpatiah)
