Bukittinggi – Untuak manjago kenyamanan jo ketenangan masyarakat nan sadang manjalankan ibadah puaso, polisi di Bukittinggi bausaho menjago semaksimalnya kaamanan jo ketertiban masyarakat. Salah satu diantaronyo adolah manindak anak-anak mudo nan rintang balap-balap lia sambia pakai knalpot nan mamakak tu.
Hari Akaik kapatang, Polresta Bukittinggi malalui kegiatan Cipta Kondisi (Cipkon). Operasi tu memang menyasar balap lia jo nan mamakai knalpot mamakak nan dinilai maresahkan masyarakat.
“Malam hari terutamo sakali, banyak warga nan mangaluah dek bunyi kareh kanalpot pembalap-pembalap lia ko. Itu sangaik manggaduah ka ketenangan ummat Islam nan sadang baibadah tarawih,” kecek kumandan operasi, AKP Roni nan sahari-hari adolah Kasat Intel Polresta Bukittinggi. Nyo basamo-samo jo Kasatlantas nan takaik jo kendaraan bermotor.
Penindakan ko dilakukan sabagai respons ateh keluhan masyarakat nan maraso taganggu dek kebisingan, tarutamo kutiko menjalankan ibadah dan baistirahat pado malam Ramadhan.
Kegiatan nan dimulai pukua 22.00 WIB sampai 04.30 WIB tu mancakup patroli sasudah salat tarawih sampai lo manjalang wakatu subuah.
Baa hasia no Ndan?
“Dalam rantang wakatu itu tu kami berhasil manangkok puluhan kendaraan nan tabukti dipakai melakukan pelanggaran basararo pengendaranyo sekalian,” kato Roni. Lalu nyo maagiah data baraso ado 32 unit sepeda motor nan dipakai untuak balap lia jo knalpot brong nan ditangkok tu.
Manuruik kapalo intel ko, kegiatan tu marupokan komitmen Polresta Bukittinggi dalam menjago situasi keamanan jo ketertiban masyarakat (Kamtibmas) supayo tetap kondusif salamo Ramadhan 1447 Hijriah ko.
Inyo pun manambahkan, nyampang ado masyarakat mandanga ado urang balap lia atau pakai knalpot nan mamakak talingo, laporkan sajo ka Polresta Bukittinggi. “Sugiro kami tindak, asa laporannyo langkok,” katonyo. (tan parpatiah)
