Oleh Fachrul Rasyid HF
Tabatiak kaba dari kunjuangan Menteri Pekerjaan Umum (PU) Dody Hanggodo di Padang tanggal 29 Januari. Keceknyo, pambangunan jalan layan Sitinjau Lauik tahalang dek pembebasan tanah. Inyo mamintak Gubernur untuak sugiro manyalasaikan hal iko supayo proyek 2,6 T salasai tapek wakatu.
Iko bukan carito baru di Sumbar. Baa ka indak, ampia satiok ado tanah untuak jalan, baiak mampaleba atau mambukak jalan baru, salalu ado rintangan untuak maambiak tanah.
Nan paliang spektakuler adolah pembebasan jalan Alai-Bypass nan mamakan wakatu labiah dari 10 tahun. Bamulo dari zaman Walikota Zuiyen Rais (1993-2003) baru bisa dibukak manjalang akhia maso jabatan Walikota Fauzi Bahar (2013). Manuruik Kapalo Dinas Pekerjaan Umum Daerah Sumbar wakatu itu, Sabri Zakaria, 6 kali (6 tahun) dana APBN nan ka dipakai untuak mambuek jalan tapaso dibaliakkan ka pusat.
Harap diingek, rato-rato proyek-proyek gadang, tarutamo jalan jo jambatan, di Sumbar mangandalkan dana dari pusat dengan syarat Pemprov musti mandapek-an tanah. Artinyo kalau tanah tu indak lapeh dari berbagai masalah hokum dek Pemprov atau Pemerintah Daerah, dana pusat indak akan disadiokan.
Masalah timbua, walaupun pembebasan tanah alun salasai, tapi dek harapan dana pusat bisa dikaluakan sacaro capek, tanah tu dinyatokan sacaro resmi bebas dan urusan teknis diharokkan bisa disalasaikan sairiang jo pajalanan wakatu. Tanyato masalah teknis ko sabananyo mahalangi kamajuan pambangunan. Baitulah nan tajadi jo proyek jembatan layang Sitinjau Lauik.
Masalah komunikasi
Pembangunan nan paralu tanah salalu manjadi masalah. Nan jadi pertanyaan, apokah masyarakat anti pembangunan? Padohal, indak. Padohal nan mamintak dibukak jalan atau dibuek jambatan tu rakyaik. Tapi baa mangko satiok jalan dibukak, rakyaik protes bahkan maambiak ladiang? Baa kok duo keinginan nan samo acok bamasalah?
Ambo pernah mambahas masalah ko jo Ir. Dody Ruswandi, Kapalo Dinas Pekerjaan Umum Sumbar, di kantuanyo, 1999. Baa kok baitu, Pak Fachrul?”, tanyo Dody. Jawaban ambo sederhana sajo. Rencana jo awak (pemprov) Tanah jo urang (masyarakat). Jadi, baa caronyo mampatamukan rencana di ateh tanah tu, iko soal sosialisasi jo komunikasi.
Pejabat, khususnyo PU/Bappeda mamikiakan dan merencanakan pembangunan jalan atau jambatan sacaro jaleh dengan pertimbangan untuak 20 atau 40 tahun ka muko, dengan sagalo dampak positifnyo pado kehidupan rakyat.
Gagasan ko alun tantu dipahami dan bisa dicerna dek masyarakat. Urang-urang tu cenderung bapikia bahaso maso kini, tanahnyo diambiak atau dikurangi dan inyo maraso hilang. Jumlah ganti rugi sajo alah tabukti indak cukuik mayakinkan untuak manarimo keinginan pemerintah.
Jarak pamikiran pejabat pemda nan punyo rencana jo pamikiran urang-urang nan maraso alah kahilangan tanahnyo talalu jauah. Dan, hal iko hanyo bisa dikaikkan/didakek-an jo komunikasi dan sosialisasi nan tabukak, jaleh, jujur dan mayakinkan sahinggo curiga nan dikhawatirkan masyarakat indak timbua. Hal iko sangaik ditakankan pado era Orde Baru. Kalau KDH gagal mayakinkan warga, KDH bisa dihapuih dari jabatannyo.
Sayang, kini pejabat acok menjelaskan kepentingan rencana secara sepihak tanpa maagiah kesempatan masyarakat mayakini harapan terhadap prospek setelah proyek itu salasai. Padohal setelah jalan salasai, jangankan protes jo ladiang, maangkek sabuah jaripun nyaris ndak ado. Sadonyo bagaduru membangun warung, lapau toko dan harago tanah pun naiak balipek gando di sapanjang jalan tu.
Ir. Dody mangakui hal itu. Inyo maagiah contoh pangalamannyo dalam mandapekkan tanah untuak jalan layang Duku – Bandara Minangkabau. Di sampiang rencana jambatan ado tanah nan diparalukan. Warga manulak ganti rugi. Sudah tu, Dody mangaku inyo amuah mambali harago apo sajo nan dimintak. Syaratnyo kalau tanah tu nanti dibuek untuak pasa raya atau kadai, warga indak buliah protes. Keceknyo, baru sahari sasudah tu, warga datang baliak dan manyarahkan tanahnyo sasuai jo ganti rugi nan balaku.
Nan kito caliak salamo ko adolah sosialisasi dan komunikasi antaro Pejabat Pemerintah Provinsi jo masyarakat minim. Padohal, rencana apo sajo nan ingin direalisasikan di provinsi ko ampia indak disosialisasikan sacaro konkrit. Indak aneh kalau warga acok batanyo baa bantuak Sumatera Barat di maso datang. Lalu, tibo-tibo muncul proyek ABCD nan mambuek warga takajuik.
Hal iko indak hanyo tajadi jo rencana jalan nasional, provinsi atau kabupaten/kota, rencana jalan di daerah parumahan indak juo disosialisasikan dan dipantau sacaro serius. Akibatnyo, kini banyak jalan di kawasan parumahan nan alah ditelan dek parumahan dan alah barubah manjadi gang tikuih. Bahkan ado rencana jalan nan ilang sacaro langsuang.
Singkek carito, rencana di awak, tanah di urang ko kunci suksesnyo sabagian gadang ditantuan dek kamauan jo kamampuan pejabat untuak bakomunikasi jo basosialisasi jo rakyaik.
