Nan mudo-mudo paralu tahu baso ado kato nan bantuaknyo beda sangenek dalam bahaso Minang, tapi aratinyo beda bana. Kato nan dimukasuik itu iolah sarik jo sariak. Jan nan sarik-sarik maaja anak tu, kecek urang gaek maso daulu. Mukasuiknyo, jan maaja anak nan payah-payah, lamo inyo manggarati.
Beda sarik, beda pulo sariak. Di Kota Padang, sariak ko malakek ka namo tampek. Namonyo Gunuang Sariak. Kok ditanyo ka nan mudo-mudo, apo mukasuik Gunuang Sariak, bagageh pulo manjawek, Gunuang Payah, Gunuang Susah. Baitulah jadinyo katiko bahaso Minang diindonesiakan. Dari Gunuang Sariak lah manjadi Gunung Sarik. Nan sariak tu beda bana jo sarik.
Dalam bahaso Minang, sariak tu bambu nan babatang tipih, ketek ukurannyo, tumbuah di tanah nan subua. Daerah tu banamo Gunuang Sariak dek maso daulu banyak bana sariak atau bambu tumbuah di sinan. Katiko Gunuang Sariak manjadi Gunung Sarik, tantu lah ndak suai namo nan diagiah meskipun sariak subana alah sarik ado di sinan.
Kato sarik jo sariak ko tamasuk kato nan banyak dipakai dek urang Minang. Cando iduik kini nan samakin sarik. Sarik mancari pitih padohal alah ka ilia ka mudiak manggaleh. Sarik mancari karajo padohal alah sarjana, alah tagadai sawah, tajua ameh, nan karajo ko indak tasuo juo. Dek mangko baitu, ado pepatah mangecek, mancabiak murah, manjaik sarik, mukasuiknyo mambuek cakak tu mudah, tapi manyalasaiannyo sangaiklah payah.
Kok bakawan-kawan baitu pulo, kawan bagalak nan banyak, kawan nan manangih sarik basuo, indak mudah basobok kawan nan subana kawan. Kok ado kawan, pas sarik iduiknyo tibo manyalang, pas alah sanang iduiknyo, lah pai sajo mailang. Kok lai ka untuang awak bakawan ka dirinyo, awak disayang, kok sempat tasingguang sangenek, langsuang jadi musuah. Kawan nan sarupo iko sabana ndak elok, apolai kawan nan beda keceknyo di muko awak, beda pulo di balakang. Sabana sansai awak dipagunjiangan.
Kecek urang tuo, kok dapek jadilah urang nan bijak, pandai manimbang-nimbang, jadi tampek urang batanyo. Cando pepatah, sarik kaji dek urang malin, sarik pitih dek rang kayo. Mukasuiknyo, apo nan jadi keputusan urang bijak tuh, batua-batua alah ditimbang-timbang untuang jo ruginyo. Tapi indak mudah bapakaian sarupo itu, harus banyak saba, hati harus lapang. Harus pandai manyanangan urang meski awak tahu, nan elok indak ka mungkin disampaian.
Nan bedo katiko urang mangecekan awak, kabau sakandang murah mangubalonyo, inyo subana sarik mangubalonyo. Mukasuiknyo, maadoki awak surang subana payah sampai bakieh urang, kabau sakandang labiah mudah manggumbaloi daripado awak nan surang. Kok ado urang banyak mampakecekan awak saroman itu, sabana habih main. Hiduik raso ndak iduik, urang ndak surang nan ka mandakek.
Lain sarik, lain pulo sariak pepatahnyo. Kok tadanga sariak indak babungo lai manjalehan baso ado urang nan alah indak dipicayo dek masyarakaik karano pernah mangarajoan karajo indak mambuek urang picayo lai. Baitu bana manjadi urang Minang. Harus elok laku jo parangai. Kok ka disabuik urang, kok dapek tasabuik nan elok-elok.
