Lubuak Basuang — Jalan provinsi nan maubuangkan Padang – Koto Gadang jo Kota Bukittinggi, di Kabupaten Agam, putuih total dek badan jalan taban ulah hujan labek, hari Jumaik (11/9/2026) siang. Akibatnyo, jalan nan menjadi salah satu akses utamo antardaerah itu indak dapek dilalui kendaraan, baiak roda duo maupun roda ampek.
Badan jalan nan taban tu barado di Jorong Sungai Taleh, Nagari Baringin, Kecamaton Palembayan. Panjang bagian jalan nan rusak dipakirokan sekitar 20 meter, jo lebar mencapai ampek meter.
Dek kondisi badan jalan nan runtuah, arus lalu lintas di kawasan itu musti dialiahkan. Pengendara nan manuju kawasan tu diarahkan malalui Simpang Patai manuju Palupuh.
Kepala Pelaksana BPBD Kabupaten Agam, Rahmat Lasmono, mengatokan jalan tu rusak parah akibat longsoran tanah nan dipicu curah hujan tinggi.
“Putuih total jalannyo sanak, dan indak bisa dilewati dek kendaraan, sahinggonyo tapaso kito aliahkan ka Simpang Patai manuju Palupuah,” kecek Rahmat, seperti dilaporkan kantor berita ANTARA.
Di lokasi nan samo sabalunnyo memang alah tajadi longsor nan mengakibatkan bahu jalan mulai taban. Kondisi itu makin parah dek hujan nan intensitas nyo tinggi turun di kawasan tu sekitar pukul 13.30 WIB.
“Sebelumnyo di lokasi nan samo lah tajadi longsor nan menyebabkan bahu jalan, taban” katonyo.
Hujan nan turun cukuik labek mambuek kondisi tanah samakin labil. Tanah nan indak mampu manahan baban, ditambah aliran aia nan taruih mailia, akhirnyo manyababkan badan jalan runtuh.
Alat Barek lah di Lokasi
Setelah kajadian, BPBD Kabupaten Agam langsung melakukan koordinasi jo Pemerintah Kecamatan Palembayan dan Pemerintah Nagari Baringin untuak melakukan penanganan awal di lokasi.
Koordinasi juo dilakukan jo Dinas Bina Marga, Cipta Karya dan Tata Ruang (BMCKTR) Provinsi Sumatera Barat untuak mampacapek penanganan serta perbaikan jalan nan rusak.
Manuruik Rahmat, alat barek berupa excavator alah diturunkan ka lokasi untuak mendukung proses penanganan.
“Kini excavator lah di lokasi dan lah kito agiah tando bahwasanyo jalan taban,” keceknya.
BPBD maimbau masyarakat dan pengendara jan mamaksokan diri malewati jalan nan alah amblas. Pengendara dimintak maikuiki petunjuk petugas dan manggunokan jalur pengalihan nan lah ditantukan.
Masyarakat nan tingga di kawasan perbukitan maupun daerah nan labiah rendah di sekitar lokasi juo dimintak tetap waspada terhadap kemungkinan bencana susulan, tarutamo bilo hujan lebat kembali turun.
Kalau hujan turun labek dan lamo, warga dimintak mamparatikan keadaan tanah, lereng bukik, dan aliran aia di sekitar permukiman. Bilo mulai tampak tando-tando tanah bergerak atau longsor, masyarakat handaklah sugiro manjauah dari tampek nan barbahayo dan mancari lokasi nan labiah aman. (Tan Parpatiah)
