Padang — Sakitar 5.000 kandaraan di Sumatera Barat diusulkan untuak diblokir STNK-nyo dek diduga malakukan pambalian bahan bakar minyak (BBM) barulang kali, dalam pola pambalian nan dipandang indak manuruik katantuan.
Pamblokiran STNK tu diajukan satelah ditemui adonyo pola transaksi pambalian BBM nan indak biaso. Nomor polisi kandaraan-kandaraan nan masuk dalam catatan tu alah diajukan untuak ditindaklanjuti manuruik aturan nan ado.
Wakil Presiden Komunikasi Korporat PT Pertamina Patra Niaga, Kitty Andhora, manyabuikkan, salain mangajukan pamblokiran tarhadap kiro-kiro 5.000 nomor polisi, inyo juo alah maajukan pamintak’an untuak mahapuih data ribuan nomor polisi nan diduga malakukan pola pambalian BBM nan indak sesuai jo katantuan.
“Pertamina Patra Niaga juo alah mangajukan pamintak’an panghapusan data tarhadap ribuan nomor polisi nan diduga malakukan pola pambalian nan indak sesuai jo katantuan,” kecek Kitty dalam katerangan tatulih nan ditarimo, Sinayan (7/9).
Langkah iko diambiek dalam rangka mamastikan BBM subsidi nan disalurkan, khususnyo Jenis BBM Tantu (JBT) jo Jenis BBM Khusus Panugasan (JBKP), sampai kapado urang nan memang barhak manarimonyo.
Dalam pangawasan di SPBU, tindakan juo alah diambiek tarhadap lembaga panyalur nan tabukti malanggar katantuan. Sapanjang tahun 2026, Sales Area Retail Sumatera Barat alah mambari 31 sanksi, barupo pambinaan sampai panghantian pasokan untuak sementaro wakatu.
Indak sampai di situ, tigo SPBU di Sumatera Barat juo alah dialiahkan pangalolaannyo sapanjang tahun 2026. Jo tambahan tigo SPBU tu, jumlah SPBU nan alah dialiahkan pangalolaannyo di Sumatera Barat manjadi anam SPBU.
Kitty manyabuikkan, satiok palanggaran nan tabukti indak akan dibiakan baiitu sajo.
“Satiok temuan nan tabukti sabagai palanggaran akan kami tindaklanjuti manuruik mekanisme jo katantuan nan barlaku, mulai dari pambinaan sampai kapado pamberian sanksi. Kami indak mambari toleransi tarhadap panyalahgunaan dalam panyaluran BBM subsidi, dek karano hal tu dapek mangurangi hak masyarakat nan saharusnyo mandapek manfaat,” kecek nyo.
Untuak mamparkuaik pangawasan di lapangan, sidak dilakukan pulo ka babarapo SPBU di Kota Padang. Dalam hal iko, pihak Pertamina Patra Niaga basamo jo Kepolisian Daerah Sumatera Barat jo Pemerintah Provinsi Sumatera Barat turun langsuang malakukan pamareksaan.
Dalam sidak tu dipareso prosés panyaluran BBM subsidi, kasasuai’an transaksi, panggunaan QR Code, sarana jo prasarana SPBU, sarato hal-hal lain nan bakaitan jo katapatuan lembaga panyalur.
Pangawasan tu dimaksudkan supayo panyaluran BBM subsidi bajalan luruih manuruik katantuan dan jan sampai hak masyarakat nan barhak manarimonyo malah jatuh ka tangan nan indak semestinya.
Pola pambalian nan barulang kali juo manjadi salah satu perhatian dalam pangawasan. Melalui catatan transaksi nan ado, pola pambalian dapek dipantau untuak maliek apakah ado pambalian nan manyimpang dari katantuan.
Kitty manyabuikkan, urusan pangawasan BBM subsidi bukanlah tangguang jawab satu pihak sajo. Karajo samo antaro badan panyalur, pamarentah daerah jo aparat panagak hukum sangatlah diparalukan supayo panyaluran BBM subsidi tatap bajalan sacaro tertib.
Pihaknyo manyabuikkan, pangawasan akan taruih dipakuek, baiak jo pamareksaan langsuang di lapangan maupun jo mamakai sistim digital.
QR Code jo catatan transaksi dimanfaatkan untuak maliek pola pambalian dan mandeteksi labiah dini kalau ado pambalian nan dipandang indak manuruik katantuan.
“Karajo samo jo pamarentah daerah jo aparat panagak hukum juo taruih kami lakukan untuak mamastikan satiok indikasi palanggaran dapek ditindaklanjuti sacaro tapek,” kato Kitty.
Masyarakat diimbau pulo supayo samo-samo mamantau panyaluran BBM subsidi di lapangan. Kalau ditemui panyalahgunaan atau panyalawengan dalam panyaluran BBM, masyarakat dapek manyampaian laporan melalui Pertamina Contact Center 135. (Tan Parpatiah)
