Bukittinggi — Di tangah hiruak-pikuak pasa jo pertokoan modern di Bukittinggi, ado ciek namo nan lah lamo bana dikenal urang: Yap Yek. Namo nan barangkali sederhana, tapi di balakangnyo tasimpan carito panjang tantang usaho, kapandaian tangan, pardagangan, jo parjalanan sabuah kaluarga nan mampatahankan usahonyo sampai barpuluh-puluh tahun, kini lah ampiang sa abaik.
Carito Yap Yek dapek wak muloi sajak 1928. Penelitian nan ditabikan dek Institut Seni Indonesia Padangpanjang manyabuikkan, New Yap Ya (namo nan dipajai kini) adolah salah satu merek sipatu kulik nan tuo di Bukittinggi, nan lah badiri sajak 1928 dan ditaruihkan turun-tamurun. Nan menarik, caro mambuek sipatunyo sacaro manual masih dipatahankan sampai kini.
Kalau dihetong sampai tahun 2026, bararti perjalanan Yap Yek lah ampia saabaik.
Bagi generasi tuo, pasti sangaik takana dek nyo carito lamo tentang Yap Yek. Namo YY itu barhubungan jo namo pendirinyo yaitu keluarga dari marga (She) Yap nsn pandai mambuek sipatu.
Dalam catatan perjalanan tentang Bukittinggi, Yap Yek dikenal sabagai toko sipatunyo urang nan punyo sakero tinggi, karano sipatu YY bukan sipatu nurahan.
Tahun 1928 manjadi tonggak awal perjalanan usaho nan kamudian dikenal jo namo Yap Yek. Usaho itu diwariskan dari satu generasi ka generasi nan lain.
Tumbuah di Janjang Minang
Yap Yek tumbuah di lingkungan pasa lamo Bukittinggi, di sakitar Janjang Minang.
Janjang Minang bukanlah tampek nan biaso-biaso sajo. Kawasan iko lah lamo manjadi bagian dari pusat pardagangan Bukittinggi. Janjang nan manyambuang kawasan pertokoan itu menjadi jalan lalu-lalang urang pasa, padagang, pembali, jo urang nan datang barwisata ka Bukittinggi.
Di suok-kida Janjang Minang, tumbuah baragam usaho. Salah satunyo ialah toko sipatu kulik Yap Yek nan dikenal karano mutunyo.
Mako, sajarah Yap Yek indak dapek dipisahkan dari sajarah pardagangan Bukittinggi.
Nan manjadi ciri khas Yap Yek dari dahulu iolah kapandaian tangan tukangnyo.
Sipatunyo dibuek sacaro manual. Kulik dipiliah, diukua, dipotong, lalu dirangkai jo jahitan nan rapi. Solnyo dikenal tabal, jahitannyo kuaik dan bahan nan dipakai tahan dipakai lamo
Catatan perjalanan pada tahun 2003 manyabuikkan, Yap Yek di Janjang Minang masih mambuek siapatunyo sacaro tangan. Bahkan, kalau ukuran nan dicari indak ado di rak, kaki pembali dapek diukua, lalu sipatunyo dibuek manuruik ukuran kaki urang nan mamakai nan msmakan wakatu sampai babarapo minggu.
Di sinanlah nampak parbedaan antaro sipatu buatan Yap Yek jo sipatu pabrikan.
Di Yap Yek, sapatunyo indak semata-mata barang dagangan nan diambil dari rak. Sapatunyo dibuek untuk urang nan akan mamakainyo.
Mutu nan manjadi ukuran
Pada maso dahulu, Yap Yek indak dikenal karano kotak sapatunyo nan mewah atau bungkusan nan rancak, tapi lantaran kualitet nyo tu haa..
Ado catatan nan manyabuikkan, sipatu produksi Yap Yek pada maso itu bahkan cukuik dibungkuih jo karateh koran koran. Sederhana dalam bungkusan, tapi kuaik dalam barang.
Itulah salah satu ciri usaho kerajinan pada maso dahulu: nan dijua bukanlah kemewahan kemasan, tapi kapandaian tangan jo mutu barang.
Generasi ka generasi
Usaho nan dimulai pado 1928 itu indak baranti pado satu generasi.
Catatan tahun 2003 manyabuikkan bahwa usaho Yap Yek ketika itu lah dikelola dek generasi katigo.
Artinyo, sabalum masuk ka abad ka-21, Yap Yek lah mampu malewati pergantian generasi.
Hal iko penting, karano banyak usaho keluarga nan lahia pado zaman dahulu akhiranyi hilang dilulua perubahan zaman. Tapi Yap Yek mampu lanjuik, basambuang, dan mampertahankan namonyo.
Penelitian tahun 2025 pun masih mancataikkan bahwa New Yap Yek merupaokan usaho nan diwariskan turun-tamurun dan caro mambuek samipatunyo sacaro manual masih dipatahankan.
Indak hanyo sipatu kulik
Ado ciek hal lain nan manambah nilai sajarah Yap Yek.
Pengrajin Yap Yek indak hanyo mambuek sipatu kulik. Mereka juo dikenal mambuek tarompa tradisional Minangkabau.
Dalam catatan tentang Yap Yek, tarompa buatan pengrajin toko iko bahkan disabuik sabagai salah satu nan terbaik di Sumatera Barat.
Yap Yek manjadi menarik kalau diliek dari suduik budaya.
Usaho iko lah menjadi tampek batamuannyo dua latar budaya: kapandaian urang Tionghoa dalam kerajinan sipatu dengan kehidupan masyarakat Minangkabau nan manjadi pasa sekaligus pangguno hasia kerajinan itu.
Indak ado nan paralu dipertentangkan. Nan ado ialah pargaualan dan karjasamo dalam kehidupan sehari-hari.
Zaman barubah, Yap Yek tatap basambuang Masuak ka zaman baru, namo Yap Yek kamudian dikenal juo sabagai New Yap Yek (NYY).
Zaman lah barubah
Kalau dahulu urang datang langsung ka toko, kini urang alah bisa mancari sipatu malalui telepon ganggam.
Kalau dahulu ukuran kaki diukua langsung dektukang sipatu di toko, kini urang lah biasa mamiliah ukuran dari daftar nan tasadio.
Kini New Yap Yek masih dikenal di kawasan Janjang Minang, Bukittinggi.
Lokasi iko manyimpan makna nan dalam. Hampia saabaik lamonyo, usaho itu tatap barado di lingkungan pasa dan pertokoan nan lah menjadi bagian dari wajah Bukittinggi.
Mako, kalau urang pai ka Bukittinggi, manuruik sajarahnyo, indak hanya Jam Gadang, pasa, benteng, atau janjang nan patuik diliek.
Ado pulo sajarah nan hidup di toko-toko tuo.Salah satunyo Yap Yek.
Sajarah Yap Yek sabananyo indak hanya carito tentang sipatu kulik.
Iko adalah carito tentang ketekunan.
Carito tentang sabuah kaluarga nan mampu manjago usaho nan diwariskan dek urang tuo ka anak, dari anak ka cucu.
Carito tentang pandai sapatun nan manarimo tantangan zaman, dari sapatuyang dibuek sacaro tangan sampai persaingan jo produk industri nan diproduksi dalam jumlah gadang.
Dan nan paling penting, iko adalah bagian dari carito Bukittinggi sebagai kota dagang.
Karano sejarah kota indak salalu tasimpan di gedung gadang, kantua pemerintahan, atau monumen.
Kadang-kadang sajarah justru tasimpan di toko ketek, di baliak potongan kulik, banang, panokok, cetakan sipatu kayu, dan tangan tukang sipatu. (tan Parpatiah)
