Jakarta — Gubernur Sumatera Barat Mahyeldi Ansharullah mausulkan ka Pamarintah Pusek supayo pangambangan Palabuahan Teluak Tapang di Kabupaten Pasaman Barat ditatapkan sabagai Proyek Strategis Nasional (PSN)
Manuruik Gubernur, palabuahan nan tapaknyo di pasisia barat Pulau Sumatera ko indak sajo penting untuak Sumatera Barat, tapi juo manjadi pintu masuak investasi, urek nadi logistik, jo pusek industri baru untuak saluruah kawasan Pasisia Barat Sumatera.
Usulan itu disampaian Mahyeldi wakatu basobok jo Menteri Koordinator Bidang Perekonomian RI, Airlangga Hartarto, di Gaduang Ali Wardhana, Kementerian Koordinator Bidang Perekonomian, Jakarta, Rabaa patang ko (22/7/2026).
Kato Mahyeldi ka mantari Airlangga, lah lamo urang awak manggantuangkan pangaluaran barang jo komoditas ka Palabuahan Teluak Bayua. Padahal, Sumatera Barat punyo pasisia nan panjang jo latak nan strategis mahadok ka Samudra Hindia. Dek sabab itu, alah waktunyo Taluak Tapang dikambangkan jadi palabuahan gadang nan mampunyoi fungsi logistik, industri, jo palayaran internasional.
“Sumatera Barat ko punyo posisi nan strategis di pantai barat Sumatera. Pangambangan Teluak Tapang bisa manjadi pintu masuak investasi sakaligus pusek logistik jo industri nan sanggup maningkekkan nilai tambah sumber daya alam daerah,” kecek Mahyeldi.
ka Mantari tu disampaikan bahwa nan dirancang bukannyo sakadar mambangun palabuahan, tapi mambuek Smart Green Industrial Port City, iyolah Kawasan Kota Palabuahan Industri Hijau Cerdas. Di sinan dirancang tumbuah kawasan industri hilia nan tasambuang langsung jo palabuahan moderen, sahinggo bahan baku dari Ranah Minang indak lai dijua dalam kaadaan mentah.
Pabilo Taluak Tapang lah jadi PSN, dampaknyo indak sajo dirasokan dek urang Pasaman Barat, tapi juo dek kabupaten jo kota lain di Sumatera Barat. Malahan, palabuahan ko diproyeksikan manjadi simpul logistik untuak saluruah Pasisia Barat Sumatera, taraso pulo manfaatnyo dek daerah Mandailing Natal di Sumatera Utara.
Pasaman Barat salamo ko dikenal sabagai salah satu lumbuang sawit di Sumatera Barat. Hasil kabun sawit nan barlimpah itu salamo ko banyak diangkuih ka Teauak Bayua untuak dikapalkan ka lua daerah. Jikok Taluak Tapang lah bakambang, biaya angkuik akan labiah murah, wakatu pangiriman labiah singkek, jo hasil kabun masyarakat pun labiah gadang nilai juanyo.
Di sampiang itu, Pamarintah Provinsi Sumatera Barat juo marancang mambangun industri kilang minyak (oil refinery) jo pabrik biodiesel babahan baku minyak sawit mentah (CPO). Kalau rancangan ko takadi, Teluak Tapang akan tumbuah jadi pusek ekonomi baru nan mamadukan palabuahan, kawasan industri, jo logistik dalam satu hamparan.
Salian usulan Palabuahan Teluak Tapang, Mahyeldi juo manyampaian harapan supayo jalan kareta api di Sumatera Barat diiduikan baliak. Manuruiknyo, kareta api penting untuak angkutan barang jo panumpang, mangurangi biaya logistik, sakaligus mambangkikkan pariwisata.
Usulan lain nan juo disampaian adolah pangacepatan pangambangan Energi Baru jo Tarbarukan (EBT). Ranah Minang dipandang punyo potensi gadang dalam tanago aia, panas bumi, jo tanago matohari nan bisa manjadi sandaran industri hijau di kamudian hari.
Mancaliak usulan-usulan itu, Menteri Koordinator Bidang Perekonomian Airlangga Hartarto manyambuik baik. Inyo mangapresiasi langkah Pamarintah Provinsi Sumatera Barat nan alah manyiapkan rancangan pambangunan jangka panjang untuak maningkekkan daya saing daerah.
Airlangga mangatokan, sadonyo usulan nan disampaian akan dikaji dulu sasuai jo aturan, tahapan parancanaan, jo kawenangan pamarintah pusek.
Audiensi ko manjadi salah satu ikhtiar Pamarintah Provinsi Sumatera Barat mampaarek hubungan jo pamarintah pusek, supayo pambangunan infrastruktur strategis, dapek dipacu labiah capek. (Tan Parpatiah)
