Padang— Buntuik tabukaknyo pakaro dugaan kredit fiktif jo kredit macet di Bank Nagari, khususnyo nan tajadi di Kantor Cabang Pembantu (KCP) Siberut, Kabupaten Kapulauan Mentawai, lah mambuek Kapalo Otoritas Jasa Keuangan (OJK) Sumatera Barat dipanggia dek Tim Penyelidik Pidana Khusus (Pidsus) Kejaksaan Tinggi Sumatera Barat untuak diminta i katarangan.
Pemeriksaan ko dilakukan bukannyo karano OJK diduga talibat dalam kredit fiktif, tapi untuak mandalami baa bana caro pangawasan nan dijalankan OJK salamo ko dalam pangaluaran kredit di dunia parbankan. Langkah ko dipandang penting dek Kejati untuak mancari gambaran salangkoknyo tantang apo nan manyababkan tajadinyo dugaan panyalahgunaan kredit nan kini sadang diproses hukum.
Asisten Intelijen Kejati Sumbar, Agustinus Hanung Widyatmaka, mangakui iyo Tim Panyalidik Pidsus alah mamanggia jo mamareso Kapalo OJK Sumbar.
“Tim Panyalidik Bidang Tindak Pidana Khusus Kejaksaan Tinggi Sumatera Barat alah malakukan pemeriksaan ka Kapalo OJK Sumatera Barat takaik jo dugaan kredit fiktif di wilayah hukum Sumatera Barat, khususnyo dalam panyalidikan dugaan kredit macet di Bank Nagari,” kato Agustinus, Kamih (23/7/2026 sarupo nan disiarkan dek kompas.com.
Manuruiknyo, nan didalami penyalidik adolah fungsi jo peranan OJK sabagai lembaga pengawas parbankan. Kejati ingin mancaliak sampai di ma na pangawasan dijalankan, sahinggo bisa manjadi bahan evaluasi untuak mancegah kajadian sarupo di kamudian hari.
Salian untuak kaparluan panyalidikan, Kejati juo mamaralukan pandangan jo masukan dari OJK untuak manjago sistim pangawasan sektor jasa kauangan, supayo praktek-praktek nan marugian nagari indak lai tajadi.
Pemeriksaan ka Kapalo OJK Sumbar ko manjadi sorotan urang banyak dek karano tajadi sabalunyo aparat panagak hukum maungkik satu persatu kajahatan di sektor parbankan di Ranah Minang.
Sabalunyo, Direktorat Reserse Kriminal Khusus Polda Sumatera Barat alah mambongka dugaan tindak pidana parbankan jo korupsi dalam panyaluran Kredit Usaha Rakyat (KUR) di Bank Nagari KCP Siberut.
Dalam pemeriksaan awal tu, nilai kredit nan diduga bamasalah mancapai Rp50,335 miliar. Audit investigasi internal Bank Nagari manamukan ado dugaan fraud dalam penyaluran KUR Mikro jo KUR Kaciak kapado 125 urang debitur, baik konvensional maupun syariah, salamo pariode Oktober 2023 sampai Mei 2025.
Kabid Humas Polda Sumbar Kombes Pol Susmelawati Rosya manyabuik, tigo urang alah ditatapkan sabagai tersangkaz. Masing-masing adolah Rino Edrica Purnama, mantan Pimpinan Bank Nagari KCP Siberut, Herdi Wahyu Anharu, patugas kredit, jo Mikael Sakeletuk alias Mikael, urang sipil nan diduga mancari data calon debitur.
Pakaro nan tajadi di Siberut ko kini indak sajo manyoroti dugaan korupsi di lingkungan Bank Nagari, tapi juo mambuek aparat panagak hukum mandalami sajoauh ma bana sistim pangawasan parbankan dijalankan. Harapannyo, dari panyalidikan ko lahia perbaikan tata kalola pangaluaran kredit di Sumatera Barat, sahinggo pitih nagari jo kapantingan masyarakat dapek labiah tajago dari praktek-praktek nan manyimpang.(Tan Parpatiah)
