Sia nan ka manyangko, kutiko kami mambaok mahasiswa pai mangkaji tradisi urang Minang di pasisia, kami mandanga mahasiswa kami manyanyian lagu-lagu lamo nan labiah acok dinyanyian urang gaek bausia 60-an. Lah pueh jo lagu-lagu lamo, inyo puta lagu-lagu Minang. Nak indak disangko lai, saoto inyo banyanyi basamo-samo, lagu banamo Gasiang Tangkurang. Cando iko isi lagunyo:
Indak kayu, Mak, janjang dikapiang
Asakan dapek urang den cinto
Tolong tangkurak, namonyo gasiang
Namuah disuruah jo disarayo
Gasiang batali jo kain kapan
Di patang kamih malam jumahaik
Gasiang tangkurak nan den nyanyikan
Putuihnyo gasiang putuih makripaik
Lah manggabubu asok kumayan
Urang di dunia banyak kiramaik
Tolong, tolong lah jihin si rajo hawa
Gasiang tangkurak baoklah pasan
Jikok nyo lalok tolong jagokan
Jikok nyo tagak suruah bajalan
Di siko kini denai nantikan
Tolonglah japuik, japuik tabaok
Suruah nyo sujuik di kaki denai
Jikok tak namuah tanggang matonyo
Tanggang salero bia nyo rasai
Datang sijundai bia nyo gilo
Siang jo malam, nyo cari denai
Baru baru nyo sanang dek kiro-kiro
Antah indak tahu makasuik lagu ko, tapi dek didendangkan jo irama sanang dek panyanyinyo Ratu Sikumbang, lagu ko jadi hiburan dek anak-anak Gen Z. Jo hati sanang inyo banyanyi.
Kok dikana maso daulu, amaik lah takuik urang daulu manyabauik gasiang tangkurak ko. Urang daulu picayo, kok ado muda-mudi saliang jatuah cinto, tapi ndak dapek padusi tuh dek surang laki-laki, elok dek karano inyo rancak tapi sombong, kayo tapi ongeh, atau apo sajo nan bisa maambek cinto ka padusi itu, katiko itulah kecek urang, dukun batindak.
Di Minangkabau, jo gasiang tangkurang ko mantra dibacoan dan tajadilah padusi nan tadi tagilo-gilo ka nan maubekan itu. Dek dapek cinto dihati, dijago lah dari wakatu ka wakatu. Indak buliah lupo ka dukuan baliak, ka dukun baliak. Tapi ado pulo nan sampai basanang-sanang hati sajo. Lak tunduak gadih nan tu, inyo tinggaan bantuak urang gilo sampai indak ado nan namuah lai.
Kini zaman baubah. Sakali aia gadang, sakali tapian barubah. Zaman samakin canggih, lah indak ado bana nan picayo jo gasiang tangkurak ko. Mantun baitu, ciek duo di kampuang-kampuang masih ado juo nan mamakai. Tapi dek gasiang tangkurak lah babaok manjadi lagu nan riang, tantu samakin bakurang pulo lah karamaiknyo mantra ko.
